明日就是 9 月，對於手機迷科技迷來說，每年 9 月都是新產品推出，甚至搵銀的好機會。因為月初會有 IFA 2015 柏林消費性電子展，之後 9 月 9 日又有 Apple 的發佈會。可以預期 IFA 2015 會有各式各樣的新手機、智能手錶和電子產品，令人目不暇給。
至於 Apple 發佈會就有新 iPhone，甚至有傳會有全新的 Apple TV。唔知讀者們有冇發覺，近期的手機在正式發表前，都有相片和規格配置流出，甚至有網民比媒體更早取得真機搶先拍片實測。有新機推出，作為傳媒人被搶飲頭啖湯固然會有點唔忿氣；不過最唔開心的卻是失卻了那種萬眾期待的興奮。還記得元祖 iPhone 未發表前已經傳聞 Apple 會進軍智能手機市場，但設計和功能卻在發表當日才公開，大家「嘩一聲」的興奮感覺嗎？
現在 Galaxy Note 5、S6 Edge Plus 早早在發佈前一段日子，已經於網上被看光光，當收看發佈會就變得非常沒趣。很多人會認為提早「爆料」是廠商放風造勢，究竟孰真孰假讀者們心裏有數，不過舉行盛大的發佈會都是希望搶佔媒體版面，讓更多消費者知道新機發表的消息。如今爆料過多令新鮮感減弱，是否適得其反呢？