你對上一次扭開收音機係幾時呢？考 DSE / 會考 / A-Level 中英文 Listening 個陣？上季嘅賽馬日？定係揸車個陣？又或者可能耐到你都唔記得左。收音機呢啲咸豐年前的產物，對於大家來說可能太遙遠了，想聽電台節目大可以上網或用 Apps，使乜用收音機？
剛過去的星期日，當大家在看 CCTVB 假普選選港姐的時候，我電視都冇開，連明珠 930 都懶得睇，係屋企聽左一晚收音機（事實係我晚晚都聽）。個晚電台播左兩次羅生門，我不禁慨歎：「乜冇其他歌喇咩，使唔使一首歌一晚播兩次呀？」跟手將呢個「大發現」share 係 Facebook。
朋友見到我個 post 有部收音機，就問：「乜你咁 old school 嘅，時光倒流呀？聽電台唔用 Apps 咁倒米架你！」我才發覺，一．原來我係少數人仲會聽電台節目；二．原來收音機已絕跡於家庭；三．原來唔用 Apps 係倒米的行為 。
自從 CCTVB 的節目愈來愈劣質，我屋企已經慣性唔開電視（有時會睇下 HKTV），只會聽收音機。一早未起身已經聽到媽媽係度聽緊 881 的《晴朗》，對於一起身就趕頭趕命要出門口的我來說，朝朝都有陳志雲、陳聰同郭志仁幫我 brief 每日重點消息，仲成日都請到好有 soundbite 的嘉賓講野，呢短短的 30 分鐘好 fruitful。
隨後返工，我有時（其實好少可 XD）都會偷懶，上網聽下 BBC Radio 4，因為有時差，所以都係聽佢地早晨節目。最鍾意就係聽介紹書的節目，有時仲會請到作者講兩句。
放工返到屋企，繼續係聽緊收音機，好彩的話可以聽到陰謀人播歌，有時亦會聽雲妮播歌，再聽葉宇澄（雖然都係播歌，亦只係半個鐘，但晚晚都鬧佢個節目…），最後一路聽才子一路中眼瞓…
聽收音機最好的地方係唔使上網，冇 data 都聽到，仲可以一路做住其他野一路聽，唔使再望住個 mon，俾對眼休息下（實情係，我繼續㩒電話 XD）。其實開收音機某程度上都係想屋企有啲聲，唔好太靜，減低一個人食飯的孤獨感啫。係咪真係咁 old school 呢？有少少啦，不過總好過睇劣質電視節目浪費我寶貴的休息時間。
日本推出多功能藍牙 Cassette 機 可聽收音機、轉錄 Cassette 帶成 MP3
