Lenovo 今日於香港正式推出平板手機 PHAB Plus。PHAB 之名源於 Phone ＋ Tablet， PHAB Plus 採用一體成型金屬機身，厚度只有 7.6mm，備有 6.8 吋 Full-HD 螢幕，有灰色、銀色及香檳金色可供選擇，不過有意見就話依部 PHAB Plus 外型好似 iPhone 6 Plus，唔知實際用落又係點呢？以下有更多內容。
見到外型第一印象就令籮文覺得好似 iPhone 6 Plus，尤其係機側伸延至機背嘅兩條灰色絕緣帶，而且揸上手兩部機都係鋁金屬一體成型嘅機身，所以手感亦好相似，機身同樣有少少跣手。而唔同嘅係 PHAB Plus 有 6.8 吋 Mon 比 5.5 吋 Mon 嘅 iPhone 6 Plus 更大部，更接近平板嘅 Size，而厚度有 7.6mm。
PHAB Plus 機背上方為 1cc 喇叭組，比一般手機約 0.5cc 的喇叭更響亮。音量鍵及開關制都位於右側，而左側就係 SIM 卡托盤，PHAB Plus 支援雙卡（Micro Sim ＋ Nano Sim）不過 SD 卡槽同 Nano Sim 卡槽係共用的。而值得一提嘅係 Lenovo 轉咗新 Logo 啦，喺機背就可以見到鏡面嘅新 Logo，比舊 Logo 更年輕。Lenovo PHAB Plus 有三款顏色可供選擇，耀金、皓銀同太空灰…啊唔係，係傲灰。總結成部機嘅外觀，一個字「型（不過仲係覺得好似 iPhone 6 Plus）」。
▲Lenovo PHAB Plus 有三款顏色可供選擇，耀金、皓銀同太空灰…啊唔係，係傲灰。
▲音量鍵及開關制都位於右側，而左側就係 SIM 卡托盤。
▲機底 USB 位。
▲喺機背就可以見到鏡面嘅新 Lenovo Logo，潮！
PHAB Plus 有 6.8 吋 1920 x 1080 螢幕，解像度達 326ppi，細緻度唔錯，由於用嘅係 IPS 螢幕，可視角度亦好闊，從不同角度睇都可以清晰睇到畫面。6.8 吋螢幕雖然大，但單手操作都冇太大問題，因為 Lenovo 喺軟件上作出了補救，只要於螢幕上畫一個 C 字，就可以啓動 One-hand Mode，將整個畫面收縮到螢幕下方，將機身向右傾斜畫面就會收縮到右下方，反之亦然，方便用家左右手都可以實現單手操作。同時亦有單手鍵盤、單手快捷、輕搖一下即可鎖定 PHAB 及類似 LG 手機的連按兩下螢幕喚醒手機的功能。
▲PHAB Plus 有6.8吋 1920 x 1080 螢幕，解像度達 326ppi，細緻度非常好。
▲只要於螢幕上畫一個 C 字，就可以啓動 One-hand Mode，同時亦有單手鍵盤、單手快捷及類似 LG 手機的連按兩下螢幕喚醒手機的功能。
▲螢幕上方拉落黎，開關以上功能。
▲更有類似 iPhone Assistive Touch 的廣泛觸控捷徑，按一下即可返回主頁或開啟自選應用程式。
▲同偏藍嘅 LG G4 相比，PHAB Plus 螢幕顏色更自然
大專手提電腦優惠計劃 2024 各電腦品牌學界獨家優惠 聯想 Legion Y700 (2024) 現身 旗艦級配置遊戲平板
機背上方可以見到鏡頭同閃光燈之外，仲有一大排嘅喇叭，依排 1cc 嘅喇叭就係 PHAB Plus 嘅賣點之一，比一般手機約 0.5cc 的喇叭更響亮，音質亦會提升，籮文就試睇咗一條電影預告片，即使周圍環境好嘈，對白聽唔清，不過手機喇叭發出嘅槍聲爆炸聲就好震撼。PHAB Plus 仲配置 Dolby Atmos 杜比全景聲技術，用喇叭就比較難聽到效果，但插耳機後除咗聽到左右邊聲音，仲好似聽到上面傳黎嘅聲音，睇戲時音效就更加立體更有臨場感，但可能就要配合更好的耳機至享受到啦，因為籮文用過現場提供嘅頭戴式耳機，聽得到效果，不過用上自己嘅入耳式耳機，效果就冇咁突出。此外，依部機有足足 3 組智慧型全方向嘅 Mic，360 度環迴收音，配合消噪技術，就算搭地鐵講電話都可以好清晰。
▲機背上方可以見到鏡頭同閃光燈之外，仲有一大排嘅喇叭，依排 1cc 嘅喇叭就係 PHAB Plus 嘅賣點之一。
▲開杜比個 App 就可以自訂 Setting，有個人化嘅音效享受。
▲籮文就試睇咗一條電影預告片，即使周圍環境好嘈，對白我就聽唔清啦，不過手機喇叭發出嘅槍聲爆炸聲就好震撼。
講到好多人都好重視嘅相機環節，PHAB Plus 有 F/2.2 光圈、1,300 萬像素主鏡頭配合雙色 LED 閃光燈，驚喜嘅係可以拍到 60fps 嘅全高清影片。而前鏡就有 500 萬像素，數據上算係不過不失。試機場地燈光昏暗，仲有紫色紅色燈光效果，這樣的極端環境正好挑戰一下 PHAB Plus 相機的對抗能力。
▲PHAB Plus 有 F/2.2 光圈、1,300 萬像素主鏡頭配合雙色 LED 閃光燈。
▲相機介面簡潔，按鈕位置亦相當就手。
▲場地雖然昏暗，PHAB Plus 亦發揮到 F/2.2 光圈嘅功用，即使處於暗位的先生，五官輪廓亦清晰可見。
▲環境燈光影響下，PHAB Plus 1,300 萬像鏡頭仍表現出不錯的飽和度。
▲即使放大後，可見昏暗環境下成像仍然不過不失，牆上的相片邊緣可以見到仍然好實淨，油畫化唔嚴重。
PHAB Plus 搭載 Snapdragon 615 八核心處理器配合 2GB RAM，內置儲存空間有 32GB 並可以插 SD Card 擴充容量，但加插 SD Card 就要犧牲雙 SIM 卡嘅功能，不過計我話，32GB 已經足夠大部份用家使用，SD Card 都慳返。3,500mAh 電池，據官方資料，備用時間可以長達 350 小時，播片都可以播到 10 個鐘，正常使用應該用到 24 小時，算係咁。而跑分方面，比僅次於 LG G3，表現唔算好，不過依個價位黎講都算係突出。
▲跑分表現不代表一切，至少籮文玩咗陣，全程冇 Lag 冇窒。
PHAB Plus 最大賣點就係界乎 Phone 同 Tablet 之間嘅 6.8 吋大 Mon，有手機嘅單手操作同方便攜帶，有平板嘅大螢幕優勢，而價錢亦比同類型對手，如 Huawei MediaPad X2 等更便宜。啱晒鍾意搭車睇片，又嫌手機個 Mon 細，又嫌平板太大部，又唔想帶晒兩部嘅朋友，籮文認為 Lenovo PHAB Plus 係超值之選！
售價：$2,488
查詢：Lenovo（2516 3938）
大專手提電腦優惠計劃 2024 各電腦品牌學界獨家優惠 聯想 Legion Y700 (2024) 現身 旗艦級配置遊戲平板
