喺香港呢個美食天堂想流行美食好簡單，日本流行嘅芝士撻、韓國嘅九層塔都可以隨時搵到，不過邊一間好食，邊間氣氛好真喺好難知道。以為除咗睇 OpenRice ，仲有另一個選擇，就喺呢個專門講飲講食嘅社交平台 － iPick。
可能你會覺得都有 OpenRice 啦，點解仲要用 iPick 呢？咁資訊無人厭多嘅！要講 iPick 嘅優點，我覺得佢個界面比 OpenRice ，首頁只有 6個 icon，簡單易用。另外，如果寫食評只需要登入 facebook 或 wechat，寫最少 10個字就得，比起 OpenRice 要寫埋食評標題同最少 80字方便得多，岩晒我呢 D 唔想諗咁多字嘅懶人。同樣，因為一定要登入 facebook 或 wechat 先可以寫食評，可信性亦相對提高。
▲ 首頁嘅 6粒 icon會因應潮流美食而改變。(期待遲 D 會有蒸氣火鍋同邪惡芝士 icon)
▲ 食評最少 10個字就分享得，仲可以揀 share 唔 share 埋去 Facebook。
相機食先基本上喺十個有八個香港人都會做嘅指定動作，而 iPick 就好似美食版嘅 Facebook咁，只要按下方嘅「足跡」按鈕，就可以即刻睇到你 Facebook 嘅朋友去過邊間餐廳，有咩評價。如果喺「搵食」途中見到有咩岩心水，仲可以利用 Meet-up 功能建立搵食飯團，即刻約飯腳。呢兩個功能聽落幾好，亦可以增加食評可信度。不過，前提喺你先要有朋友。
▲ 足跡入面可以睇到你朋友嘅食評，唔洗喺 Facebook 度係咁碌。
▲ 揀岩心水餐廳就可以隨時約飯腳。
咁講嘅，就算你無朋友，iPick 都一樣有野睇嘅。雖然佢有嘅資訊同 OpenRice 差唔多，都喺餐廳地址、電話、消費嘅基本嘢，而且食評都唔夠 OpenRice 詳細。不過佢部份餐廳會有360度相片睇，咁就可以更清楚餐廳環境啦！另外，佢仲有一班「搵食團隊」四出覓食，定期推介 D 好餐廳俾你，我見佢個觀塘工廈小歐遊專題寫得唔錯架，等我搵日 lunch 去試下先！
▲ 萬一你真喺無朋友，「發現」都仲有 D 食評家嘅食評俾你參考嘅。
▲ 睇完 360度餐廳全景相就可以更清楚知道個環境。各位男士們，聖誕節、情人節前夕你識用啦！
▲ 「搵食團隊」定期都會推出一 D 美食專題，好岩 D 鍾意四圍試新嘢嘅朋友。
