Asus 早前一口氣推出三部 ZenFone 2 系列手機，除了早前依莉詩介紹過的 ZenFone 2 Selfie，今次籮文介紹這部 ZenFone 2 Laser 亦是抵玩之選，這部 5.5 吋 720p 屏幕嘅平價手機，配備 1300 像畫素雷射自動對焦 PixelMaster 主相機，對焦比其他自動對焦手機快頗多，想知實際使用如何？以下有更多詳細測試！
一打開個紙盒，跟機嘅都不外乎係說明書、USB線、叉機同耳機，不過令籮文最驚喜嘅係個入耳式耳機，首先外型上，有同心圓嘅紋路，金屬感重，造工仔細，戴出街用都唔會輕易俾人認出「啊你用跟機耳機！」，而籮文亦試過，佢嘅音質更加係超越好多其他大廠嘅原廠耳機，真係估佢唔到。
▲一打開個紙盒
▲跟機嘅都不外乎係說明書、USB線、叉機同耳機
▲令籮文最驚喜嘅係個入耳式耳機，首先外型上，有同心圓嘅紋路，金屬感重，造工仔細，戴出街用都唔會輕易俾人認出「啊你用跟機耳機！」，而籮文亦試過，佢嘅音質更加係超越好多其他大廠嘅原廠耳機，真係估佢唔到。
ZenFone 2 Laser 有黑白紅三款顏色可供選擇，望落閃令令，以為係金屬材料嘅背蓋，揸上手先知唔係喎，原來係比較少見嘅陶瓷塗裝黎嘅，摸落有柔軟嘅感覺，亦唔會跣手。機背有類似 LG 嘅孤型設計，機身兩側厚度更加只有 3.9 mm，令手感更圓潤，但代價就係平放手機喺枱上使用嘅時候機身就會兩邊 fing。開關制、音量制等位置都有同心圓嘅紋路，光線底下更顯得高貴，而機面下方的紋路望落去更有些少迷幻的感覺（靚唔靚就見仁見智，我就覺得有啲眼花）。由於機身兩側特薄，音量就擺咗喺機背，而電源制就喺機頂，有啲唔就手，不過 ZenFone 2 系列手機都有輕觸螢幕兩下 lock/unlock 嘅功能，所以電源制基本上好少機會要用到。無論仔細嘅機身造工，以至個原廠耳機嘅造型，籮文覺得成件產品都好時尚，設計師嘅心思值得一讚。
▲機頂電源鍵及耳機孔
▲機背音量制
▲機側超薄切！同5蚊銀厚度相差無幾
▲機面下方的紋路望落去更有些少迷幻的感覺
【評測】ASUS ZenFone 11 Ultra 外形 手感 屏幕 相機 效能詳細開箱評測 【評測】ROG Zephyrus G16 (2024) 外形 手感 打機表現 效能 鍵盤 端子開箱評測 【評測】ASUS ZenBook Duo 外形 手感 功能 使用體驗 屏幕 操控 效能開箱評測
ZenFone 2 Laser 螢幕有 5.5 吋，都算係大 Mon，不過解像度就得 720p ，除返開像素密度就得 267 ppi，數據上就係麻麻地架啦，不過依個價位咁嘅質素都算合理，如果你對螢幕表現有較高要求，我就建議買 Full-HD螢幕嘅 ZenFone Selfie 啦！而喇叭表現，睇佢機背下方一排喇叭咁顯眼，果然音量係好足夠，而且開到最大音量都唔會好拆，去郊遊去野餐用黎聽歌係爽嘅。
▲顏色冇大問題，用家亦可以自行調教色溫，更有藍光 Filter
▲機背喇叭音量係足夠，而且開到最大音量都唔會好拆
搭載 Android 5.0 Lollipop 嘅 ZenFone 2 Laser，用家介面用上 Asus 自家訂製嘅 ZenUI，比原裝 Android UI 更多個人化設定，亦有 ZenMotion 讓用家可以透過簡單嘅手勢，快速啟動唔同嘅功能。先有 Asus 的 Launcher，Wallpaper、轉頁動畫、App Icon 等都可以隨意換，甚至可以換主題風格，不過籮文個人就比較喜歡簡單啲嘅桌面，如果你都係同我一樣諗法，我就建議去 Google Play Download 第個 Launcher 用啦。Asus Launcher 冇乜用，不過 ZenUI 就抵讚嘅就係 ZenMotion ，用家黑屏嘅時候可以用手勢啟動唔同嘅功能，例如：畫個 「S」字就可以開訊息功能，畫「C」字就可以開相機。而 ZenUI 有個詭異之處就係當開啓單手模式時，畫面會縮埋一角，市面上唔少手機都有依個功能，不過奇怪嘅係ZenFone 2 Laser 嘅畫面會預設縮埋去左下角，右手點用呀！而籮文搵極都搵唔到點樣將佢移到右下角。唉！搞咗成日，最後終於搞到。而預載嘅 Apps 一頁睇晒，不過依一頁入面就有好多個 folder… 一個名為 Apps4U 嘅 Folder 入面就有 TripAdvisor、EZTABLE 等等，如果用家認為無需要，可以逐一刪掉…
▲ 可於 Manage Home 頁面作各種個人化設定
▲ ZenMotion ，用家黑屏嘅時候可以用手勢啟動唔同嘅功能，
▲ZenFone 2 Laser 嘅畫面會預設縮埋去左下角，最後籮文發現原來要按住個框框 1-2 秒鐘先可以開始將佢拖動
▲預載嘅 Apps 一頁睇晒，不過依一頁入面有好多個 folder，例如 Apps4U Folder入面有 TripAdvisor、EZTABLE 等等。
講到 ZenFone 2 Laser 嘅主打當然係相機功能，後鏡有 f/2.0 超大光圈，輕易可以拍出淺景深效果，相片更立體更有層次感，亦有雙色溫閃光燈，昏暗地方影相亦可以拍到準確顏色，雖然 1,300 萬像素後鏡頭像素唔算特別高，但 ZenFone 2 Laser 嘅最大賣點就係在於 “Laser”！ZenFone 2 Laser 嘅後鏡搭載雷射自動對焦技術，對焦拍得住同樣有雷射對焦嘅 LG G4，除咗快之外，通常在低光源環境下傳統自動對焦都會失準，而使用雷射對焦技術無論環境幾暗都好，都可以準確對焦，內置多種拍照模式，除咗常見嘅 HDR、全景模式等，仲有手動模式，就好似單反咁可以隨意調較 ISO 、快門、焦距等，享受更大嘅攝影樂趣，另外亦有低光源模式、超高解析度模式等，全部都好實用。而 ZenFone 2 Laser 前鏡頭就有 500 萬像素、85˚ 廣角自拍鏡頭，以及 140˚ 超廣角全景自拍模式，一大班 Friend 都影得晒，但係就唔似主力自拍嘅 ZenFone Selfie 有自拍閃光燈，不過可以另外購置 Asus 嘅 Lolliflash 補光燈，。
▲鏡頭左方為雙色溫閃光燈，右方則是雷射對焦
▲手動模式，就好似單反咁可以隨意調較 ISO 、快門、焦距等
▲內置多種拍照模式，除咗常見嘅 HDR、全景模式等，仲特有低光源模式、超高解析度模式等
▲前鏡頭都有全景自拍模式
▲後鏡有 f/2.0 超大光圈，輕易可以拍出淺景深效果
▲從餐廳拍下窗外風景，由於室內室外光暗相差太大，導致室外天空過度曝光
ZenFone 2 Laser 支援真正雙卡雙待，唔會佔用 SD 卡槽，真正方便到需要中港兩邊走嘅用家。而跑分方面 ZenFone 2 Laser 跑到 30482分，咁嘅價位黎講都算唔錯，籮文用落都鮮有 Lag 機情況。
▲跑分方面 ZenFone 2 Laser 跑到 30482分，咁嘅價位黎講都算唔錯
▲ZenFone 2 Laser 支援真正雙卡雙待，唔會佔用 SD 卡槽，真正方便到需要中港兩邊走嘅用家。
【評測】ASUS ZenFone 11 Ultra 外形 手感 屏幕 相機 效能詳細開箱評測 【評測】ROG Zephyrus G16 (2024) 外形 手感 打機表現 效能 鍵盤 端子開箱評測 【評測】ASUS ZenBook Duo 外形 手感 功能 使用體驗 屏幕 操控 效能開箱評測
ZenFone 2 Laser 最抵玩之處都莫過於雷射對焦，對焦速度比其他傳統自動對焦手機快近2倍，除咗對焦快，其他相機功能亦好出色，內置不同嘅攝影模式並唔係 gimmick 野，而係真正實用，就好似前鏡嘅全景模式，十幾廿人 Selfie 都得。不過我就寧可俾多幾百蚊就可以買到 1,300萬像前鏡後鏡，其他配置亦較高級嘅 ZenFone Selfie 啦。
售價：$1,499
查詢：ASUS（3582 4770）
【評測】ASUS ZenFone 11 Ultra 外形 手感 屏幕 相機 效能詳細開箱評測 【評測】ROG Zephyrus G16 (2024) 外形 手感 打機表現 效能 鍵盤 端子開箱評測 【評測】ASUS ZenBook Duo 外形 手感 功能 使用體驗 屏幕 操控 效能開箱評測
