上個星期返左學校上堂，重溫「學生身份」的美好。席間，有超過九成都係中國同學，我以自己毫不表示驚訝的反應感到驚訝。因為係第一堂，按照「慣例」，老師係會充滿好奇心咁叫各位同學自介，同時講下黎左香港一段時間之後觀察到的不同。
課室入面的大陸同學有差不多一半來自北京，講完自己背景之後，佢地開始講：香港係購物天堂，有好多商場；香港交通好方便，地鐵四通八達；香港好有人情味，阿伯跌低竟然有人走過去扶佢起身；香港空氣好好，北京完全呼吸唔到… 其中，仲有一個同學咁樣講：
「香港好像不太先進，想要付錢、交費、處理小額交易等，都不能用手機 APP，我們都在用支付寶，QQPay，微信支付… 不知道香港的電子支付是不是太過早熟，導致容納不到新科技。」
而堂上老師就話，係呀，香港自從係 97 年出左張八達通之後，就冇其他電子貨幣取代到佢嘅位置喇，就算係 PPS 繳費靈，都冇得爭。
講真，個啲透過手機應用程式付款的乜乜 Pay，其實已經唔係咩新科技，幾年前就已經聽過，而香港最近先後出左 Apple Pay/ Samsung Pay/Tap & Go/KISS 一大堆流動支付平台，但點解香港都仲係咁唔普及呢？
我真係有諗過，係咪真係金管局啲條例太嚴，門檻太高，令新公司不能加入競爭呢？香港係咪真係人口老化得咁緊要，導致我地接受唔到新科技呢？後來我係度諗（戴頭盔伸脷：非專業判斷，純個人分享，不喜請指教），係咪因為香港太細太方便，所以先冇人用！
首先，交通方面，搭公共交通工具、泊車等，都可以用八達通嘟一嘟搞掂，好似都幾方便丫…
第二，交費。基本上水電煤費、信用卡費、學費，全部都可以係便利店搞掂，而便利店真係梗有一間係你左近… 當然你想足不出戶，亦可以用 PPS 繳費靈，信用卡費網上過戶亦得。冇乜問題丫？
第三，購物 Shopping，都可以碌卡八達通丫；網上購物，碌卡囉，好似話八達通都得。 仲唔夠方便咩？
係！係唔夠嘅，因為我以上講嘅都係一啲非常傳統的消費模式，潮流興「顛覆」傳統，所有野都減省人手，用手機 order、俾錢、然後先到服務/產品體驗，好似訂 iPhone 6s 咁 Uber 係其中一個例子，而係中國，已經衍生出好多唔同種類 O2O 的 Startup 公司，你唔好理安唔安全先，但人地就係有 Idea 有錢有 13 億人的大市場，可以做到好多香港因為人少少實驗唔到嘅野。
唔好咁灰住，雖然我地電子 Pay 呢方面好似有啲落後，但我地始終係有優勢（正能樣 Mode，繼續自我麻醉），例如我地三權分立有完善的法治體制（喊出黎，俾人講一講，搞到我有啲 Sam Hui，不過好在我地啲大法官有啲都仲係正常的）；我地相對自由（至少仲上到 Google ， Facebook 同 Instagram…）；我地醫療服務好好…等等。
我希望以上的「優勢」仍然係成立的，咁我同中國同學吹水的時候，就唔使面懵懵咁啦…
作者妍嫣，每天都懷著山區兒童的心情上班的偽 OL，決意要見證 IT 業在香港發光發亮。
