SAMSUNG CSC
上星期【萬聖節敢死隊】去咗海洋公園挑戰 6大鬼屋 已經嚇到我依莉詩生蝦咁跳，但慢慢都估唔到好戲在後頭！今日就由我同隊員籮文帶大家掀開哈囉喂其餘 4大鬼屋嘅面紗。
▲ 我地幾驚辛苦逃出陰屍路後，籮文仲自己一個經歷死後「頭七」添！不過，佢依然話唔驚囉！
每年最恐怖個間鬼屋通常都喺只限自己一個人入場，真喺少 D 膽都唔敢玩。今年更張恐怖升級，大玩港人熟悉既恐怖元素 －「頭七」！試想一下，突然有一日你明明仲有知覺但唔郁得，俾人放咗上靈床，「仵作」帶你由掛住自己「車頭相」嘅喪禮開始前往陰曹地府，呢 10 分鐘嘅模擬經歷應該令你永世難忘。
位置：動感天地
開放時間：上午 11 時 – 晚上 11 時
本來傳媒可以入去影相，不過我太細膽無跟足全程，只係喺「停屍間」同「靈堂」送咗籮文「最後一程」就喺番「人間」等佢。單憑我只係睇咗呢幾間房，其實我覺得無《 逃出陰屍路》咁恐怖，唔會有人嚇你，個個都死氣沈沈、目無表情，反而有一種不安，親人離世嘅畫面都一一重現眼前，個心好唔舒服。
驚嚇度 ★★★★☆
必玩指數 ★★★☆☆
號稱最恐佈嘅 H15，一入到去首先要影車頭相，影完車頭相，仵工就要我除鞋除襪，所有仵工都唔會嚇你，反而係好嚴肅，我有名乎其實係等死嘅感覺。其後，我入到去停屍間，仵工叫我訓上一張冷冰冰嘅靈床上面，講一句「安心上路」就推咗我走，由於整個裝潢同氣氛都好沈重，我當堂實在感覺到唔捨得，唔捨得家人、所有朋友… 真係唔捨得死住。由喪禮我見到自己嘅車頭相開始，我經歷包括有道士為我破地獄、有瞻仰遺容嘅儀式、有人燒金銀衣紙俾我，仲叫我「收嘢啦！」、「投胎要做個好人呀！」。最記得去到一個位，完完全全靜晒黑晒，伸手不見五指，嗰幾十秒完全冇野發生，處於一個幽閉空間嘅我的確感到無助，再次有等死嘅感覺。
整個旅程除咗視覺上好寫實之外，由於有 Meyer Sound 嘅音效特別設計過，加強聽覺上的感受。去到最後，行奈何橋，孟婆比咗杯孟婆湯我飲（孟婆湯事實上係乜，就要賣個關子先），仲有一個利是封，入面有粒糖，無錯，依封一封吉儀，始終個靈堂太真實，利利是是都係拎封吉儀好。老實講，驚就唔係太驚，反而係不安。 H15 令我對生命嘅意義有好大反思，可以視作一個生命教育課堂，人死後會去邊？係上天堂定係落地獄都唔重要，最緊要珍惜生命，仲要趁在生就追逐自己嘅理想，唔好好似籮文咁，死到臨頭先黎唔捨得呀…
驚嚇度 ★★★★☆
必玩指數 ★★★★★★★★★★（五粒星滿分，我俾十粒。不過可惜已經 Full Booking，未 Book 嘅你想玩都冇得玩啦！）
▲ 去到最後，行奈何橋，孟婆比咗杯孟婆湯我飲。（孟婆湯事實上係乜，就要賣個關子先)
The Walking Dead 應該唔少人都睇過，呢間鬼屋就喺以劇集 《 陰屍路》 ( The Walking Dead) 多幕經典驚慄場面塑造出嚟，令你猶豫置身喺喪屍圍城嘅極度恐慌，必須想盡辦法面對喪屍嘅凶猛突襲，由詭秘嘅小鎮監獄走到終點站。
位置：海濱樂園廣場
開放時間：下午 1 時 – 晚上 11 時
呢間相信喺 10間入面最恐怖嘅鬼屋，入到去唔單止黑，仲會分唔到邊 D 喺真喪屍，邊 D 喺假喪屍，隻隻都會隨時走過嚟。而且場景都相當逼真，特別穿過巴士同監獄個陣感覺就好似完全置身電影一樣，咁俾喪屍包圍，搵唔到出路。無論有無睇過《 The Walking Dead》應該都一樣覺得恐怖！
驚嚇度 ★★★★★
必玩指數 ★★★★★
雖然我只係睇過幾集 Walking Dead，不過都感受到依間鬼屋嘅故事性，唔同其他鬼屋，逃出陰屍路除咗有鬼（喪屍），仲有啲未變喪屍嘅人類。當你被喪屍圍困，就會有啲人類出黎幫你手，你當刻真係會心存感激。相信有追開 Walking Dead 嘅話一定會愛上依間「逃出陰屍路」鬼屋。
驚嚇度 ★★★★☆
必玩指數 ★★★★★
▲ 場景都相當逼真，特別喺穿過巴士個陣會有一大班喪屍圍住你。
▲ 沿路會有一 D 人保護你，唔俾喪屍埋到你身。不過佢地都唔喺善良得去邊。
▲ 有一些喪屍會隔住鐵絲網嚇你，雖然走唔到出嚟，不過同樣恐怖！
▲ 就算唔敢入鬼屋，戶外都有幾隻 Walking Dead 俾你影下相。
傳說有一個失意嘅木偶師將眾玩偶注入法術，希望將佢地變成照顧患病愛妻嘅小助手，可惜最後玩偶慘被邪靈附身變成妖怪，大開殺戒，唔知你又可唔可以幫佢捉番呢班失控嘅木偶呢？
位置：極速之旅旁
開放時間：下午 1 時 – 晚上 11 時
呢間鬼屋嘅驚嚇指數同《 逃出陰屍路》不相百仲，雖然每間房場景唔算大，但就佈置到好似 70、80年代嘅舊玩具店、舊屋邨一樣，到處都喺被肢解嘅公仔，令我諗起細個聽個好多洋娃娃嘅鬼故，隨時會望住 D 公仔自己嚇自己！
驚嚇度 ★★★★★
必玩指數 ★★★★★
原來木偶都可以咁可怕，鬼屋嘅佈置可愛得黎又帶恐佈，並有啲舊香港嘅 Vintage 風，有一啲好懷舊嘅香港玩具。如果你係 80後 或 70後一定更有感受，幻想下入到鬼屋嚇親你個啲正正係你小時候玩開嘅玩具，實驚啦！
驚嚇度 ★★★★☆
必玩指數 ★★★★★
▲ 玩具店入面有好多舊式娃娃，只喺望到都覺得恐怖。
▲ 你會敢同佢一齊玩嗎？
哈囉喂點止喺年青人玩意，今年多啦A夢再次喺哈囉喂出現，只要啟動影城內嘅控制台、音效同水晶球，就可以施展七彩繽紛嘅神奇魔法，同多啦A夢、多啦美、大雄、靜香、胖虎同小夫拍電影。
位置：威威天地
開放時間：上午 11 時 – 晚上 11 時
多啦A夢影城嚴格嚟講唔喺鬼屋，只喺有 D 公仔比你影下相咁，但就好過好過要喺商場同人逼先影到。個影城控制台其實只喺有 D 掣禁下，會有燈光效果，唔喺咩科技嘢，不過我好欣賞個度 D 演員，好帶動到氣氛。
驚嚇度 ☆☆☆☆☆
必玩指數 ★★★☆☆
都係志在影相囉，始終本人對多啦A夢冇咩興趣，如果換做 IQ博士、百變小櫻、或者蝠蝙俠會比較好。帶住小朋友（例如依莉詩）哈囉喂期間去海洋公園唔想佢嗌到鬼殺咁嘈又或者扯到你件衫鬆晒，多啦A夢影城係唔錯嘅選擇，如果係成班大人去就可以慳返啲腳骨力，Skip 咗依個位。（不過靜香係幾正嘅）
驚嚇度 ☆☆☆☆☆
必玩指數 ★☆☆☆☆
▲ 就算唔入影城，兒童天地都會有好多影相位架！
▲ 唔知書桌喺咪時光機嚟呢？
▲ 兒童天地仲有間賣多啦 A 夢萬聖節精品嘅鋪頭架，fans 們可以去搶購下。
相關影片﹕
