香港科技園公司上星期發佈左由 4 間本地公司製作嘅 Apps 及網上平台，方便在學及有志進修人士學習。小編見呢幾個 Apps 都幾有趣，將會連續介紹呢 4 個 Apps，想知點用同埋有咩特別，就留意我的試用報告喇！
你地細個嗰陣有冇試過用生字卡記英文單詞呢？小編細個好鍾意畫公仔，有時仲會自製有圖畫的生字卡，一路畫一路寫可以入腦啲丫嘛！而家所有野都數碼化，唔使再用人手自製生字卡了，下載個手機 App 就已經可以隨時隨地學生字。咁啱小編最近學緊韓文，一於就試下用 SnapWord 幫下手學生字先！
SnapWord 其實係影像化的 Google Translate，大家都係影相「翻譯」，不過 Google Translate 係認字，SnapWord 就係認物件。SnapWord 透過人工智能「深度學習（Deep learning）」技術，讓系統分析一百二十幾萬張圖片，學識辨認物件。SnapWord 現時已認得過千種物件，幫你學生字。SnapWord 的使用方法非常簡單直觀：影相＞學字＞收藏，佢最好的地方在於可以溫習返你曾經學過的字，唔記得又可以睇返，對於好似小編而家忙到死又無時間整生字卡的人來說，真的十分方便。
小編覺得呢個 App 對於初學外語的朋友就非常適用喇，但係必須留意，同 Google Translate 一樣，個 App 係要上網先用到架，因為佢涉及雲端數據分析及計算，所以 Offline 唔上網係做唔到「即時翻譯」架。不過！你可以溫習返之前學過嘅生字架嘛～
呢個 App 雖然簡單易用，但有幾個問題。首先預設語言暫時只有【英文】，即係你冇得預設做中文，然後學英文?… 如果想用黎學英文就未必得喇。另外，一啲非物件類或非形象化的東西，例如動詞、形容詞等等就無辦法辨認到，所以這個 App 還是有局限的。小編就建議語言初學者可以試用這個 App，但中高階的語言學習還是要靠其他辦法。不過聽講 SnapWord 遲啲會有更新，推出旅遊版，方便大家自由行去旅行的時候用，到時再睇下會唔會有其他功能先！
分享到 :
最新影片
