週末終於有時間為 iPad 升級 iOS 9，完成後不免四圍篤下，篤下篤下就自自然然去了 Facebook。雖然平時返工放工搭車時都會睇下 Facebook，但甚少細心留意每個朋友 Timeline 的內容，畢竟 Facebook 的運算方式估佢唔到，經常錯過了朋友的更新，同時又會彈出無謂廣告。
坐下來想起幾個關心的朋友，朋友 A 添丁後就只貼 BB 相，朋友 B 成了某政團的信徒，不斷轉發新聞評論。還有當 Facebook 是旅行相簿，每次更新都是北海道、巴黎之旅相集。又有被手機遊戲霸佔，Timeline 只有遊戲成就的朋友。最怕那些朋友只轉發「人生道理」貼圖，看著他們的 Timeline 只有一個字：悶。
看著看著發現有朋友專貼騎呢新聞，例如大陸女生為迫男友買 iPhone 當街剝衫、FFx 的 Sugar Baby 和二次創作「天使得得 B 」版。除了名人明星會請助手管理員打理 Facebook，一般人都是亂來。由於「日久失修」，Facebook Timeline 漸漸成為了反映自己生活另一面的鏡子，將自己的 Taste 或沒有 Taste 展露在人前。於是昨晚臨睡前，我的活動就是將自己的 Timeline 整理一下，以免出醜人前。