「中秋你注定一人，無野食又無氣氛…」今年中秋連放三日假，琴日又有一日國慶假期，醒目嘅你一定識得「請三放九」，去個逍遙遊～點似得我呢啲窮忙族，又窮又忙，放假都繼續做做做… 不過吊頸都要唞下氣架，唔離開得工作崗位，就唯有自娛一下。繼上星期我玩左幾日 17 就覺得好無聊 delete 左（點知早幾日仲俾人下埋架！），我再接再厲上 App Store 睇下有咩新玩意，竟然俾我搵到隻唱 K App！
小妹讀中學的時候係唱 K 業最盛行的時間，嗰時一個月去唱幾次，成班同學仔一放學就去唱，考完試又唱，放假又唱，陳奕迅楊千嬅 Twins 容祖兒… 到後來唱梁靜茹五月天飛落海… 諗返起都青春呀！上左大學已經唱少左，Re-U 都只係食下飯咁，更不要說出左黎做野，我上一次入 K 房唱 K 已經係… 兩年前（平時係屋企開 YouTube 唱歌個啲就唔計啦 ?）。
講返隻唱 K App 先，中秋假期第一日就俾我搵到佢，我就勁開心，一得閒唔使應酬就塞住 Earphone 唱 K。我開頭唔知原來係會一路唱一路錄音，以為每次唱完就真係完好似唱 K 咁，後來有朋友問我點解我個 account 咩都冇，係咪收埋晒自己聽，我先知原來可以放上去開心 Share 不特止，仲可以邀請朋友一齊唱，同埋可以編輯自己把聲：多啲 Echo 呀 ，改變音效等等嘅超基本 editing。
個平台就唔係好多廣東歌可以揀黎唱（可能因為香港未興玩呢個 App），所以我而家呼籲大家一齊玩，擴充個 Database，不過有時唔唱齋睇，娛樂性都好豐富，仲可能發掘到下一粒天皇巨星。就係咁，我三日的中秋假期同埋國慶，就完左喇。話說聽日又放假，如果大家冇街去冇野做，都可以試玩下呢隻 Sing! by Smule，解下悶丫！
