繼中村藤吉之後，係京都有二百多年歷史嘅抹茶甜食店 － 京はやしや（Kyo Hayashiya，或名「京林屋」或「林屋茶園」亦登陸香港啦！身為一個抹茶控，我依莉詩當然急不及待去試啦！
和式茶座帶出京都風味
日本人做事一絲不苟，坐落希慎廣場 6樓係 10月 8日開幕嘅香港店做足足籌備咗 3年。設計上以和風木色為主調，充滿日式風味，亦因為京林屋係焙茶嘅始祖，所以店內特設兩個和式茶座，等客人有更高私隱，係入面輕輕鬆鬆傾下計，品下茶。
▲ 希慎 6樓主要買女性產品為主，姊妹們如果行到攰可以入去坐下，食個 Tea。
▲ 雖然店舖面積唔算大，但以和風木色做主調令環境感得好舒適。入到去就好似去咗第二個空間，忘記自己身處百貨公司一樣。
▲ 旁邊特設兩個和式茶座，等客人有更高私隱，係入面輕輕鬆鬆傾下計，品下茶。
原材料空運到港，即製即賣
京林屋係將茶類設計成甜品嘅先驅，甚至係日本第一間創造抹茶芭菲嘅鋪頭，抹茶甜品當然有保證。呢度嘅天下の昔、抹茶蕨餅、林屋抹茶芭菲都好出名，相信唔少去過京都嘅朋友都食過。為確保可以係香港都食到日本嘅原汁原味，甜品原材料唔單止由日本新鮮空運到港，仲由日本師傅親自主理，每日即製即賣，唔會隔夜，所以要食就襯早啦，買晒就無架啦！
▲ 林屋抹茶芭菲（$88）
小食評：既然講得係第一間創造抹茶芭菲嘅鋪頭，嚟得京林屋梗係要試下經典嘅林屋抹茶芭菲啦！一層層嘅芭菲有抹茶雪糕、白玉、抹茶啫喱、忌廉同桃，好有層次。每一層味道各異，但唔會搶味，一齊食又有另一番口感。而我最欣賞抹茶啫喱，食落有濃濃茶香，口感清新，令整個芭菲唔會太膩。
▲ 蕨餅三種盛 $88
小食評：如果細食，但又想食多 D 款可以揀蕨餅三種盛，除咗有抹茶雪糕、白玉同紅豆外，仲有每日新鮮製造嘅抹茶蕨餅。抹茶蕨餅外表好似啫喱，但口感比較煙韌、柔軟，咬斷之後係口中又覺得好滑，有淡淡抹茶味，加埋抹茶粉和黑糖味道就更甜更香。
▲ 焙茶餡蜜 $68
小食評：如果厭抹茶味太濃，焙茶系列亦係另一選擇。焙茶雪糕味道比較淡，少咗入陣餘甘，配埋紅豆、白玉同寒天就更加有口感。如果比較鍾意食甜嘢，加番少少黑糖味道就更好。
▲ 抹茶紅豆年糕甜湯 $68
小食評：最近天氣轉涼，食個抹茶紅豆年糕甜湯都唔錯，不過抹茶味道較淡，要同紅豆一齊食先夠味，而年糕相當煙韌，要咀嚼一段時間。
▲ 抺茶牛奶 $42
小食評：除咗甜品，都可以飲番杯抹茶或者焙茶，價錢由$40-$52不等。而我就揀咗抺茶牛奶貪佢有抺茶味之餘有奶香，而且相對甜，口感濃郁。
依莉詩：「淡淡抹茶味，食落回甘唔太苦」
自問都係一個抹茶控，對抹茶甜品都算講究。呢間嘅抹茶雪糕味道唔算濃，唔會有好厚粉味，亦唔太甜，食落有淡淡抹茶香，回甘唔太苦，易入口。而抺茶牛奶都好濃郁，好適合天氣凍嘅時候飲。不過店舖面積比較細，就算和式茶座坐得好舒適，但當星期六日人多嘅時候都唔好意思坐咁耐呢！
京林屋
地址：銅鑼灣軒尼詩道500號希慎廣場6樓603-604號舖
營業時間：星期一至四11:00-22:00；星期五至日11:00-23:00
分享到 :
最新影片
