啲繪圖板出晒名好用嘅 Wacom 啱啱舉行咗一個新產品發佈會，向大家介紹三款新產品，包括智慧數位筆記本 Bamboo Spark、新款 Intuos 數位繪圖板及壓感觸控筆 Bamboo Stylus fineline 2，想知更多請閱讀以下文章。
今次 Wacom 一口氣推出三件新產品，三件都各有特色。專為 iPad 用家設計嘅觸控筆 Bamboo Stylus fineline 2，唔使等 iPad Pro 都可以 iPad 上用有壓力感應功能嘅觸控筆；Intuos Draw/Art/Comic 繪圖板，最平嘅 Draw 版本只需＄588 蚊，令鍾意畫畫嘅人進入數碼繪圖界嘅門檻降低，啱晒學生哥！而最矚目就係 Bamboo Spark，透過 Bamboo Spark 你可以將你用紙筆畫嘅野傳送度你嘅裝置上。
驟眼睇，你會以為 Bamboo Spark 只係一個 Tablet 套又或者筆記簿，實際上唔係咁簡單！唔少人都比較鍾意用紙筆黎畫圖起稿多過用電子裝置，不過儲存方面又會好煩啦，一本本畫簿擺到成屋都係咩，吓吓要 Scanner 就仲麻煩！Wacom 就知依件事幾煩，所以就推出咗 Bamboo Spark。只要打開 Bamboo Spark，用附送嘅原子筆繪圖，Bamboo Spark 就會自動將你嘅筆跡記低，手機或平板上 Download 咗 Bamboo Spark 專用 App，藍芽連接咗 Bamboo Spark， 㩒幾下，就可以將你用原子筆所畫嘅野 Sync 到 App 入面儲存，仲可以重播一次你嘅筆跡，又或者再進一步上色創作。
▲驟眼睇，你會以為 Bamboo Spark 只係一個 Tablet 套又或者筆記簿，實際上唔係咁簡單！
▲ Wacom 邀請到又係 Model 又係設計師嘅 Lilian Kan 示範 Bamboo Spark
▲筆跡紀錄好準確，冇誤差！好似影印一樣
▲ 籮文當然唔執輸，即席揮毫，寫咗個剛勁有力嘅 UNWIRE.HK 出黎。第一次 Sync 只要打開 App ，Pair 咗部 Bamboo Spark。
▲跟住指示按 Bamboo Spark 上嘅按鈕
▲ 而家我嘅墨寶就有個電子版本儲咗喺部 Tablet 度啦！
頭先講到，Bamboo Spark 對 Artist 起稿都好有幫助，不過起完稿 Save 咗落 iPad 度，之後想上色又點呢，依個 Moment ，Bamboo Fineline 2 就幫到你。Bamboo Fineline 2 係一支觸控筆，咪以為同街邊檔賣個啲觸控筆一樣喎，Fineline 2 筆尖幼好多，想畫精細線條時兩者效果會差好遠架！只要藍芽連接咗 iPad 就可以用得。充電兩小時就可以用到廿個鐘，持航力唔錯。不過就真係要記得充滿電啦，因為試過一支唔夠電嘅 Fineline 2，作畫時係會窒窒窒下窒下。同埋依支筆只支援 iPad 架咋，其他裝置嘅用家就得個望字。
▲咪以為同街邊檔賣個啲觸控筆一樣喎，Fineline 2 筆尖幼好多，想畫精細線條時兩者效果會差好遠架！筆頭位置會有粒快捷鍵，對應唔同 App 會有唔同功能。
▲我地邀請到 Wacom 嘅 Promoter 妹妹幫我哋示範，首先起咗個框先
▲透過 Wacom 自家 Bamboo Paper App，隻筆發揮唔錯，見 Promoter 妹妹兩三下手勢就上晒色。
▲除咗揀色，都可以選用唔同筆觸、粗幼
▲搞掂!
今次 Intuos 系列係早前 Intuos Pro 系列嘅入門版，價錢比較大眾化，Intuos Pro 系列最平嘅 Intuos Pro Small 都要賣 $1,990，但今次 Intuos Comic 嘅大 Size 版都只係賣$1,588，最平嘅 Intuos Draw 更加係只賣 $588，令鍾意畫畫嘅人進入數碼繪圖界嘅門檻降低，啱晒讀 Design 嘅學生哥啦！三個型號 Intuos Draw、Intuos Art 及 Intuos Comic 最大分別就係附送唔同嘅 Software，例如 Intuos Comic 就會送用作裝作動漫嘅 Clip Studio 同 Anime Studio。而除咗 Draw 版本，其餘兩個版本都支援多點觸控功能，可以用常用的手勢黎縮放、旋轉及平移你嘅作品。另外，三個型號係有分 Size 架！ Draw 只有 Small Size，Comic 就只有 Medium Size，而 Art 版本就有晒兩個 Size，各位準用家記得買適合你嘅型號呀！
▲左上角右上角有四粒快捷鍵，用家可以自行 Set 快捷功能，例如放大縮細，Undo Redo。
▲三個版本，兩種 Size，想買嘅朋友記得買適合自己嘅型號啦！
Bamboo Spark 售價： $1,288
Bamboo Fineline 2 售價： $488
Intuos Draw 售價： $588 (Small)
Intuos Art 售價： $788 (Small)，$1,588 (Medium)
Intuos Comic 售價： $1,588 (Medium)
查詢：3718 5222 （Wacom）
