昨晚 Apple 終於推出 21.5 吋採用 4K Retina 熒幕的全新 iMac，相信唔少 wire 民都好想知道呢部 iMac 究竟表現點樣？尤其是用咗全新 4K 熒幕，究竟質素如何？Edward 今日就火速從 Apple Store 買到此機，一用真係不禁大呼：「返唔到轉頭！」
今次 Apple 終於肯推出細尺寸的 iMac，既然都係叫做 iMac Retina，除咗熒幕解像度都升級咗之外，係外形設計上都同之前 27 吋的 iMac 5K Retina 一樣，都係採用金屬機殼，以及機背機邊較薄機中間較厚的設計。
▲iMac 21.5″ 4K Retina 係設計上同之前推出嘅 iMac 5K 27″ 係一樣，機背都係機邊較薄，機中央較厚的模樣。
▲仍是採用全金屬機殼設計。
▲開關制仍設於左方機背位置。
▲至於端子方面，設有 3.5mm 耳機插孔、SD 卡讀卡器、4 個 USB 3.0、2 個 Thunderbolt 2 及 10/100/1000 Gigabit LAN。
▲熒幕角度同之前 iMac 一樣可以調整。
至於今次 iMac 21.5″ 4K Retina，最重要的特點肯定係個 4K 熒幕。熒幕解像度為 4,096 x 2,304，Edward 用 iMac 入面嘅 Safari 瀏覽網頁以及 YouTube 影片，發現真係好 sharp，細字都睇得好清楚，加上 Mac OS X El Capitan 加入咗全新的蘋方字體，令睇網頁時十分舒服，細字都睇得好 sharp 好清楚！
▲今次的全新 iMac 21.5″ 採用全新的 4K 熒幕。
▲熒幕解像度為 4,096 x 2,304。
▲加上 Mac OS X El Capitan 後，加入咗蘋方字體，瀏覽網頁上真係好 sharp。
人工智能脫衣程式 強制從 App Store 下架 Apple 被批反應緩慢 中國手機市場競爭激烈 iPhone 從銷量首位直接跌至第五 Apple 推出開源生成式 AI OpenELM 有 4 種版本 + 可在手機上運行
至於顏色方面，筆者用上了 Spyder 5 測試 iMac 21.5″ 4K Retina 嘅熒幕，預設的白平衡好準確，以 6500K 為日光白色，iMac 21.5″ 4K Retina 數值為 6931K，亮度亦有 437.91 cd/m2，顏色準確度算是頗為準確。不過再用 Spyder 5 cal 過熒幕，就睇到 iMac 21.5″ 4K Retina 係熒幕預設值上，係紅色方面似乎 over saturated 及整體偏青，經過計算調較之後，就變得正常番，模特兒膚色亦變得紅潤番無咁面青青了。
▲使用 Spyder 5 測試熒幕預設白平衡，獲得 6931K 讀數，算係頗為準確。
▲再用 Spyder 5 調較過熒幕，未調較前可見上方模特兒面上膚色比較青，中間教堂的牆身亦比較近淺啡色。
▲調較後，模特兒面色變回較紅潤，教堂牆身亦比較近正常嘅啡紅色了。
另外，係色域上面，今次 iMac 21.5″ 4K Retina 亦十分出色，可能大家無為意，今次呢部新 iMac 用上咗全新嘅 P3 色域，相比同事天恩所用嘅 iMac（2011 年中），以及之前嘅 iMac 27″ 5K Retina，都擁有更廣闊的 AdobeRGB 色域，達到 AdobeRGB 91%，尤其係螢光綠色方面，更加比上文提及嘅兩部 iMac 闊得多，可以顯示更多綠色層次。如果大家想用 iMac 21.5″ 4K Retina 執相或剪片，而相片、影片又較多螢光綠色的部分，大家應該會留意到層次感會比之前嘅 iMac 更佳。
▲以 Spyder 5 測試過，可見 iMac 21.5″ 4K Retina 的熒幕，色域達到 AdobeRGB 91%，色域可說十分廣闊。
▲相比 iMac 2011 年中版本，AdobeRGB 色域只達 81%。
▲就算係相比舊年年底推出嘅 iMac 27″ 5K Retina 嘅熒幕，AdobeRGB 都係只去到 80%。
▲用來欣賞 4K 60fps 影片，可見 iMac 21.5″ 4K Retina 嘅熒幕，係顯示螢光綠色上係比舊 iMac 更多層次，從蜥蝪身上層次分明嘅綠色可見一斑。
另外，iMac 21.5″ 4K Retina 雖然用上金屬機身，但整部機背散熱做得好好，筆者用測溫槍測試過，係正常使用情況下，機背溫度最高都係 32 度以下，一般來講都係介乎 28 至 30 度左右，十分冷靜。咁大家就唔洗驚部機咁薄會出現過熱問題啦。
▲機身十分冷靜，筆者用測溫槍量度過，一般使用情況下，最熱嘅位置只係機背左上角，溫度亦只係 31.1 度左右，十分「冷靜」。
如果大家想買 iMac 21.5″ 4K Retina，可能會覺得 $11,488 都幾抵買，如果單睇一部有 4K 靚芒又有 i5 四核處理器、8GB RAM 嘅靚仔一體式 AIO 電腦嘅話，真係似乎幾抵；但大家唔好忽略兩件事：首先係 iMac 21.5″ 4K Retina 標配只係配備 1TB 容量硬碟，而且轉數只有 5400rpm！筆者用測試硬碟速度嘅軟件測試過硬碟嘅讀寫速度，發覺讀取及寫入都係分別得 98.8MB/s 及 97.4MB/s，雖然都唔算好慢，但當第一次開機後進行 indexing、平時開機、又或者要抄寫大容量檔案個時，就會覺得比採用 SSD 硬碟嘅機款慢好多。如果你係用慣 SSD 嘅 wire 民，筆者建議大家唔好慳，買機個時將硬碟最少升級至 1TB Fusion Drive，當中會有 24GB SSD + 1TB HDD，而 OS 就會安裝係 24GB SSD 入面，咁大家就唔驚開機慢啦！反正都係 +$780，呢樣值得升級。不過呢樣只能改善開機速度問題，如果大家想連讀寫速度都加快，就要升級用 2TB Fusion Drive 啦，但要加增成本就達到 $2,340，係咪值得就見仁見智了。
▲iMac 21.5″ 4K Retina 標配嘅 1TB 5400rpm 硬碟，讀取及寫入速度，分別只有 98.8MB/s 及 97.4MB/s，一般應用係夠，但相比 SSD 都係慢。
▲從以上影片可見開機都要 44 秒，接近一分鐘，確實比較慢。升級為 1TB Fusion Drive 應可有效提升開機及讀寫檔案嘅速度。
人工智能脫衣程式 強制從 App Store 下架 Apple 被批反應緩慢 中國手機市場競爭激烈 iPhone 從銷量首位直接跌至第五 Apple 推出開源生成式 AI OpenELM 有 4 種版本 + 可在手機上運行
另一項就係 RAM，iMac 21.5″ 4K Retina 本身就配備咗 8GB LPDDR3 記憶體，對於一般使用嘅用家，例如：打下機、上下網、睇下片、甚至 casual 剪片嘅用家來講，都算夠用。但如果對於需要使用 iMac 進行立體圖像處理，又或者剪片要加唔少 effect，又或者想玩對圖像處理要求較高遊戲嘅 gamers，8GB RAM 用起來就有啲捉襟見肘啦。
大家可能會話：咁之後覺得唔夠先再加 RAM 囉！Sorry，今次呢部 iMac 取消咗機背嘅加 RAM 蓋，成部機係一體成形密封設計，所以係唔支援事後加 RAM 嘅。因此筆者建議呢批用家，買機時一定要加 RAM 到 16GB，咁樣用起來就會順好多。但成本都唔平，都要 +$1,560，係咪值得大家自行決定啦。
▲全新 iMac 取消咗機背加 RAM 揭蓋，不支援日後再加 RAM。如果嫌 8GB RAM 唔夠用，就記住要上官網購買時順便加 RAM 啦。
最後大家可能會問：升 RAM、升 Fusion Drive，咁處理器又洗唔洗升級去到 Core i7？筆者就用 Geekbench 3 測試過，發覺無論係 32-bit 定係 64-bit 測試入面，Single Core 效能都分別有 3,318 分及 3,794 分，而 Multi Core 效能更有 10,878 分及 12,813 分，十分理想，對於一般用途嘅大部分用家來講，標配嘅 Core i5 處理器都已經夠用。
▲標配嘅 iMac 21.5″ 4K Retina 規格為 Intel Core i5 3.1GHz 四核心處理器、8GB DDR3 RAM 及 Intel Iris Pro Graphics 6200 圖像處理晶片。
▲使用 32-bit 測試，Single Core 及 Multi Core 測試，均獲得 3,318 分及 10,878 分。
▲再使用 64-bit 測試，Single Core 及 Multi Core 測試中亦獲得 3,794 分及 12,813 分，成績相當唔錯。
咁圖像處理又如何？雖然 iMac 21.5″ 4K Retina 唔似今次同樣新推出嘅 iMac 27″ 5K Retina 咁配備獨顯，只採用 Intel Iris Pro Graphics 6200 內建圖像處理晶片，但筆者測試後發現呢粒晶片效能一啲都唔差，用來播放 YouTube 4K 60fps 影片都十分暢順，效能綽綽有餘！所以大家就算唔升級處理器，拿部新 iMac 來睇 4K 影片，都唔洗擔心效能不足啦。
▲圖像處理效能如何？從佢可以順暢播放 YouTube 上 4K 60fps 影片，大家就唔洗擔心啦。
今次 Apple 推出 iMac 21.5″ 4K Retina，整體來講表現真係好好，尤其係個 4K 熒幕，無論係色準、色域以及清晰度，質素真係拍得上坊間 5、6 千蚊嘅 4K LCD 熒幕，作為一部萬頭嘅 AIO電腦來講，真係幾令筆者感到驚喜，而睇慣 Windows 7 + 1080p LCD 熒幕及 MacBook Air 11″ 1,366 x 768 熒幕嘅筆者，用過 iMac 21.5″ 4K Retina 之後真係一用愛上，返唔到轉頭！但大家記住要買真係唔好買標配，最少都加 $780 配番個 Fusion Drive，咁用落就更加爽啦。
但成部 iMac 係咪真係無嘢彈？其實都有少瑕疵，呢一點就落係今次跟機全新嘅 Magic Keyboard 同埋 Magic Mouse 2 上面啦，因為用起來真係無用舊嘅 Apple Wireless Keyboard + Trackpad 咁好用。究竟係點解？大家睇埋筆者同事天恩測試全新 Magic Keyboard、Magic Trackpad 2 及 Magic Mouse 2 嘅速測文，就會一清二楚了！
售價：$11,488 起
查詢：Apple（800 908 988）
人工智能脫衣程式 強制從 App Store 下架 Apple 被批反應緩慢 中國手機市場競爭激烈 iPhone 從銷量首位直接跌至第五 Apple 推出開源生成式 AI OpenELM 有 4 種版本 + 可在手機上運行
