喪屍鍾意食腦就係人都知，但原來做人都一樣要「食腦」！ Lab Made 喺今個萬聖節連同電影《戇 Scout 打爆喪屍城》推出全新口味雪糕，見到外形血淋淋嘅喪屍腦，我依莉詩當然急不及待食番個補一補。
Lab Made 份子雪糕店每兩三個星期就會推出新口味雪糕，本來已經夠新奇刺激，估唔到係 10月 22 至 11月 1 號期間更大搞恐怖氣氛，推出食腦同痴線蜘蛛兩種口味。
▲ 當然我搵緊喪屍腦係邊到泥嘅時候，雪糕機突然霧出白煙，仲傳來陣陣涼意。
▲ Zombie’s Dessert – 食腦 $44/$46/$48
小食評：原來大腦係由士多啤梨奶凍製成，不過食落無乜味，要同埋用士多啤梨醬整成嘅血醬同紅絲絨蛋糕整成嘅血塊先有味道。雖然食住呢杯雪糕打片夠晒嚇人，不過底層嘅蛋糕味雪糕好快溶，所以影相要快手啦！
▲ Crazy Spider – 痴線蜘蛛 $44/$46/$48
小食評：痴線蜘蛛嘅雪糕係好濃嘅海鹽焦糖味，食落咸味有 D 重，幸好有杏仁碎、甜忌廉同蛋糕碎中和，將整體味道提昇到另一個層次。而用來裝飾嘅 比利時朱古力「蜘蛛網」同「蜘蛛」手工竹炭曲奇味道唔太出，不過用嚟做裝飾就可以點出萬聖節主題。
Lab Made 嘅份子雪糕 向來以味道新奇作招來，奶醬脆多、英式糖漿餡餅等，兩至三星期就轉一次款，好啱貪新鮮嘅人。不過今次兩款 Halloween 雪糕味道唔算太特別，蛋糕味同海鹽焦糖味之前都出過。而「食腦」外型特別喪屍腦加血漿亦夠心思，啱晒相機食先嘅朋友，相反「痴線蜘蛛」貌相平平，唔太討好。整體來說，以四十幾蚊一杯嘅萬聖節主題雪糕都算不過不失，我覺得經過試下就好，唔需要特別去食。
查詢：Lab Made (3462 6528)
