自 70 年代開始都依家，原力從來都無減弱過。最新一集《星戰》電影公映前，時代廣場就由明日開始至 2016年 1月 1日舉行《星球大戰》大型展覽，好讓一眾星戰迷再次聚集。依家就等我依莉詩率先帶大家睇下第一彈展出嘅珍藏啦！
淨係講頭 6 集電影 (未計啲動畫外傳)，白兵都已經唔知出咗 N 咁多個形態，最新一套《星球》電影中亦帶嚟新白兵，以簡約線條繼續吸引大家。今次展覽就有 8 個新版 Stormtrooper 空降時代廣場，各位星戰迷要把握機會同佢地嚟個世紀接觸啊！
▲ 新 Stormtrooper 嘅頭盔線條簡約咗，仲散發出幾分可愛添！(我地女仔係咁睇架啦 XD)
▲ 唔知支槍射唔射到激光呢？(誤)
同完新白兵合照，另一個展覽重點就係 13 個真人原大角色模型，當中包括黑武士、R2-D2、C-3PO、尤達大師、Han Solo (碳化版) 同 Clone Captain Rex 等都一一展現大家眼前。
▲ “You don’t know the power of the dark side…” (咳… 扮唔到黑武士把聲)
▲ 有星戰死忠話 Clone Wars 最唔好睇，但戲中 Clone Commander Cody (中) 同 Captain Rex (右) 真係幾有型。
▲以電影高度像真嘅雕刻同塗裝技術打造嘅 1:1 C-3PO 全球限量 250套，而且仲內置亮燈同發聲功能，係咪好想帶番屋企呢？(唔知古天樂個玩具倉有冇呢？)
▲ BB-8 好正咩？(其實都係) 但 R2-D2 先係王道囉！
▲ Yoda 嘅頭髮係咪好真呢？其實植入咗白色纖維仿真頭髮，造工好仔細架！
原定 2026 上映星球大戰電影延期 檔期由《冰河世紀 6》取而代之 傳星球大戰將再拍三部曲 由 X-Men 系列編劇 Simon Kinberg 主理
除咗人物角色，提到《星戰》又點少得激光劍！單睇由星戰達人 Joseph 借出嘅電影中簽名式絕版光劍珍藏已經值回票價。(呢個展覽係免費嘅) 其中最值得睇嘅絕對係《星球大戰首部曲：威脅潛伏》中 Darth Sidious 嘅徒弟 Darth Maul 將絕地武士置諸死地嘅激光劍！(呢~ 雙頭果把呀！)
▲ 電影中 Obi-Wan Kenobi 曾經用呢把光劍擊敗 Grievous 將軍，而呢件模型全球都係只有 4500 把咋！
成日話限量版好罕有，其實自己整就更加獨一無二。30 歲嘅星戰達人 Ray Wong 係是本地少數嘅手辦模型原型師，佢由 1999 年開始製作 Scout Trooper 參加模型比賽，之後更嘗試創作第一個人像雕塑 Luke Skywalker，目前已經製作超過 80 件的星戰模型。今次佢就襯機會拎咗部份出嚟滿足一眾星戰迷。
▲ 每隻 7″手作模型都係由 Ray 親手造架！
▲ 連背面都整得相當細緻。
另外，資深星戰達人 Howard Chan (亦係你地成日進貢嘅 Hot Toys 主理人) 都展覽帶來咗 16 隻 1:4 及 1:6 嘅星戰模型限量珍藏，唔算好特別，好多都喺信和 20 樓見過架喇…
影相位又點止白兵咁少。係星球大戰光劍攝影區就有 紅色、藍色、綠色同係《星球大戰:原力覺醒》中出現嘅 Kylo Ren 紅色十字型光劍，等大家可以一嚐手持光劍拍照嘅滋味。
▲ 除咗影相 同 睇珍藏，各位星戰迷只要係每晚 7時30分以星戰造型或手持光劍現身，就有機會得到《星球大戰:原力覺醒》電影海報一張 (限量500張)，去之前記得諗定點著啦！
係咪未夠喉呢？話明係第一彈就梗係有第二架啦！11月27日至1月1日就會推出包括《星球大戰:原力覺醒》珍貴真人原大人像及 Hot Toys 1:6 場景佈置及樂高星球大戰大型展覽等，想知最新消息要睇實 Unwire 啦！
日期：10月24日至 2016年1月1日 上午10時至晚上10時
地點：時代廣場 露天廣場 及 地面展覽廳
原定 2026 上映星球大戰電影延期 檔期由《冰河世紀 6》取而代之 傳星球大戰將再拍三部曲 由 X-Men 系列編劇 Simon Kinberg 主理
