航拍機大家可能就玩得多，而大家如果無咁多 budget 而又想玩航拍題材的話，可能就會諗到 Minidrones 。而 Parrot Minidrones 就推出左全新一代既一系列 minidrones ，小編揸上手其實幾興奮：「咁細部又可以用電話 App 操控咁爽既？」但到實際試玩後就理解售價如此平價總有些少取捨……
所有 Parrot 既 Minidrones ，無論係陸上既 Jumping ﹑ 飛行既 Airborne 以及水上航行既 Hydrofoil ，都會係由手機 App – FreeFlight 3 去操作，變相用家就帶少個遙控器，出去玩就緊方便既。不過兩面睇，其實個 App 都幾 Chur 電，如果要用到成日就實要帶尿袋。
而最令小編失望既係，原來第一次連線之後就要更新，而且就算係用 4G Plan 都更新成半個鐘有多；如果你同朋友一人一部，拎出街而且企埋一齊更新的話更會隨時連錯線。
介面既豐富程度非常抵讚，左右兩邊控制亦唔難理解：左面控制升降和向左向右移動，而右面控制機身旋轉。而其他所有設置亦都放晒係上方，點擊打開將會發現 minidrones 可以玩好多唔同花式；不過，小編就嫌畫面「太花」，掛住望控制就望唔到影相畫面，需要一啲時間適應過後先至可以同步到過黎。至於小編唔鍾意既一點係，唔係起機一刻就馬上能夠影相，而係需要用户按右上邊既拍攝按鈕先至可以影到相 。
介面唔夠直觀可以比啲時間慢慢上手，但連線問題可以點解決？如果有睇小編段 Crazy Test 片的話，都會發現玩玩下竟然會 disconnecting ，而且部機仲唔會停繼續自己 run ，差啲飛出街非常驚險啊。而且 disconnecting 既情況唔只出現一次，第二﹑第三次都係咁，似乎個 App 需要時間去做 bug fix 喇。 Minidrones 既賣點係夠細，但呢個反而成為左佢室外玩既缺點，因為輕細所以一大風就隨時被吹走，不過成班同事係 office 玩又幾開心嘅。
至於 Jumping 系列，同以上兩部唔同，係陸上行走同跳躍而非飛行，反而令小編覺得幾有驚喜幾好玩。因為 Jumping 既旋轉同跳躍花式雖唔算特別多，但可以做到類似「breakdance」既效果，非常得意；同朋友一齊挑戰邊個跳得最好，係階級邊玩睇邊個可以最快跳晒上去，其實都幾有趣。
其實今次 Parrot Minidrones 已經係新一代，不過規格都是比較入門(當然因為售價真的便宜)，包括 30 萬像素相機同只可拍 480×640 短片（當佢係一部玩具多過相機 LOL），玩 Minidrones 的優點係夠細可以係細少空間玩，但同一缺點是太細又輕，大風易被吹走.. 個 app 未成熟有時會斷線，拎出街玩真係要特別小心。
Parrot Minidrones 定位有 D 讓 billy 不明白。小編覺得，若然要係市場有突破，一係將定價大幅調低做小朋友市場，一係就專注係高階市場上，將各規格都調高至與現今航拍機可相比。至於依家呢幾部好像是相對平價的大朋友玩具，但這規格可能好快就覺得要升級買貴價玩具了，猶如一台入門試玩初學機，是為著正式的貴價航拍舖路
Airbrone Night 建議零售價： $988
Airbrone Cargo 建議零售價： $788
Jumping Night 建議零售價： $1498
Extra Battery （一套：電池 + 充電線）建議零售價： $199
