睇到《夜半女敲門》呢個名同預告時，小編即時聯想起《人形蜈蜙》第一集同仲未係香港上映既《 Return to Sender 》：同前者一樣都係兩個女子走到陌生男子間屋，只不過《人形蜈蜙》個瘋子係屋內個位男醫生 Josef ，而《夜半女敲門》就係兩個女既先係瘋子，兩部片主要都係以屋內做主要拍攝場景；至於《 Return to Sender 》，雖然就唔係屋內拍，但就女主角 Miranda 同《夜半女敲門》兩條女一樣憎恨男人玩復仇，只不過《 Return to Sender 》中 Miranda 被賊仔性侵，原因鮮明得多；而《夜半女敲門》兩條女感覺就係，「我純粹想玩下你啲已婚男人有幾忍得」。可能兩套戲比小編感覺太深刻，睇完《夜半女敲門》之後覺得都幾失望，一啲都唔恐怖。想知點解就緊係繼續睇埋下文：
故仔講作為好老公好爸爸既 Evan ，當老婆同仔女唔係屋企時，兩個被大雨淋濕既蕩失路靚女求助；點知兩位靚女就黎勾搭佢，噩夢就此開始。一開始就帶入屋內影傢私影裝飾，配上大提琴奏出既恐怖配樂，個頭係開得幾好，觀眾好易入到氛圍；但係原來開頭個四十幾分鐘亦即大約近四成片長，都係用黎鋪排兩個靚女 Bel 同 Genesis 既瘋癲人格出場，實在拖戲太耐。貫穿整套戲，配樂同剪接都無大問題，符合依家恐怖片既基本標準，不過不失；但係拖戲以至到整個故仔，其實可取之處並唔多：劇本寫得唔好，BB 級既恐怖位以及兩位靚女演繹唔夠癲，即使今次奇洛李維斯表現唔錯，都救唔到今次呢套《夜半女敲門》，難怪係 IMDb 評分得 5 分。
若然用恐怖片既標準放落呢套戲中，你會發現幾失望既；但佢用左咁長時間做兩位靚女勾搭已婚大叔既鋪排，其實係幾值得學習下（姐妹們，學野啦！）。兩位靚女黎到 Evan 門口，唔強攻而等 Evan 對佢地放下戒心笑出黎先話入屋；入左屋兩位靚女先不停稱讚 Evan 既收藏同 DJ 才能，再借父親節孤寧寧而比個擁抱佢，雖然 Evan 好抗拒但不停用手撩佢全身； Evan 不停換位避靚女，於是兩女將話題轉向 Evan 老婆令佢無咁驚；之後就大講理想婚姻， Bel 更話「只有 3P 至可以確保老公唔會出軌」， Evan 已經臨近崩潰點。最後， Evan 原本成功抵制得住，直到入到浴室見到佢地裸體，兩女再摸向 Evan 下體（犯規啊！）， Evan 先至「投降」。
如果一黎就用肉體慾望去勾引 Evan ，相信佢好大可能抵擋得到；但經過一連串既 flirting 後，男人既獸性其實都逼近爆發點。睇完呢套戲包學識點做小三 XD （小編建議：學下就好，勿用！）
Bel 同 Genesis 兩個個樣咁天真可愛，又真係好難令人相信佢地係黎向已婚男復仇；但當佢地由兩個蕩失路既派對女，變成憎恨男人既瘋子時，小編唔係好感覺到個落差。加上奇洛李維斯飾演既 Evan 明明有多次機會走甩，但三番四次都係衰黑仔先比綁架初哥 Bel 同 Genesis 發現捉番，而且仲係犯好低級既錯誤。（小編：唔該！如果你「I wanna play a game」，都可以認真整啲恐怖遊戲，受害者都唔應該咁多機會幾乎逃脫）
睇晒成套戲，作為男性既小編一定要為男人平反一下！女主角 Bel 細個就被繼父性侵過無數次（另外個位 Genesis 就無交代），從此就對所有已婚男人都有憎恨同偏見。佢地係挑選男主角 Evan 之前就監視過佢，知道佢係顧家好男人兼好耐無搞野，其他屋企成員離開後就搵上 Evan 。兩女展開調情：借父親節藉口抱抱﹑不時用手撩撥 Evan 身體﹑對佢識 DJ 大讚… Evan 原本都成功壓制自己，但就係最後一刻兩女係浴室除晒衫露盡三點，並且不停摸 Evan 「那裡」同埋之後 xxx ，結果當然發生了。
Evan 自作自受？小編認同，我唔係想合理化佢出軌既行為。而係 Bel 同 Genesis 洗盡混身解數，都無辦法令佢投降做「裙下之臣」；最後除衫全裸仲伸手摸向 Evan「那裡」再跪低 xx ， Evan 先至再受唔到誘惑。作為男性有生理需求係好正常不過之事，而且兩女知道 Evan 既狀況而去攻陷佢，其實並唔公平。就好似依家既讓座文化，讓座既人既然值得被讚，但唔讓座並唔代表佢有住較差既人品，有啲人既需要並唔係表面可以輕易睇出，但唔代表佢地唔需要。 Evan 的確被下體沖昏頭腦，但錯唔係全在佢身上，但結局卻令小編覺得編劇想將錯都歸咎係 Evan 身上，係小編最唔想見到既價值觀出現係戲中。
雖然話 Trailer 應該係濃縮一啲精彩既片段吸引觀眾去睇；但其實若然濃縮完，觀眾去到戲院睇其實無話特別多啲乜野，最後都只係會比負皮。對於《夜半女敲門》，小編真係覺得要睇既其實大概都係預告睇晒（當然唔包括兩個女主角三點盡露個 part）。個半鐘戲，一大半用左黎鋪排，後半就用黎睇奇洛李維斯身手有幾差同埋有幾黑仔，其實除左結局係預告估唔到之餘其他都無特別了。（結局小編唔劇透你知，但唔算好懸念好特別）
小編覺得要比分《夜半女敲門》，連合格既分都無辦法比得出；但對於各位男性讀者想去睇 Lorenza Izzo 飾演既 Genesis 同 Ana de Armas 既 Bel 全裸，又或者只頂得算 BB 級既女性讀者兼想學 flirting ，《夜半女敲門》可能就岩你啦。
評分：4/10
