畫電路圖對好多人嚟講都好抽象，如果有今次介紹嘅電路墨水筆應該會易學好多。呢支筆上年 1月係 Kickstarter 籌集成功，依家係香港一個新開、專賣集資網站中創新產品嘅網上平台 － One More Step，有得賣！就等我依莉詩試下好唔好玩先。
呢套 Basic Kit 入面有一支特製電路墨水筆 (Circuit Scribe) 以及多件組件，包括電池、 開關、 電阻、 電晶體等。初學者可跟住練習簿，用電路墨水筆畫出電路圖，再加入相關組件就可以通電，令 LED 燈發光。即畫即刻睇到效果，而且每件組件好大舊，比起平時用麵包版拮 D 細細件嘅零件入去方便好多，初中生都應付到。用呢支筆學基本電子同電路概念，的確有趣好多。
▲ Basic Kit 內有一支特製電路墨水筆、電路模板、標示貼紙、磁板、 9V電池、 SPST開關、2粒雙色 LED 燈、NPN 電晶體及多個電阻，可以寫出多個簡單嘅電路。
▲ 每件組件背面都有磁石，讓組件可以固定係磁板上。
▲ 右邊係平時用嘅 NPN 電晶體，總體積比起 Basic Kit 入面嘅細粒好多，砌到眼都朦。
▲ 只要將磁版放係白紙底下就可以固定後加上去嘅組件。
▲ 跟住利用電路模板同電路墨水筆係白紙上畫出設計好嘅電路圖，當然亦可以跟練習簿畫。
▲ 之後將相應組件放係電路圖嘅接駁圓點上。
▲ 最後就做測試，我係 2針連接器拮入光敏電阻器，如果用手掩住電阻會熄燈就代表成功啦！
有咗呢支筆真係易學好多，不過就有朋友好醒咁話：「我買支鉛筆俾你未得囉！」所以我就試下用 4B 鉛筆 畫一幅差唔多嘅電路圖，發覺又真係通到電，不過因為導電性無咁強， LED燈無咁光，而且每條線都要畫得粗好多同大力好多先得。睇嚟都係電路墨水筆比較方便。
▲ 用 4B 鉛筆畫電路圖，每條線都要畫得粗好多同大力好多先通到雹。
▲ 不過鉛筆電阻比較強，所以 LED燈無咁光。
話明用嚟學電路概念嘅 Basic Kit ，安全當然重要。雖然佢用 9V 電池，不過每個組件上都已經設有電阻，所以幾乎放係電路上任何一個位置都唔會燒，最多都只係喺電源開關亮紅燈提醒你已經有短路出現。咁就唔怕玩幾玩就壞啦。
▲ 將電源開關接駁 9V電池就可以供電。
▲ 如果短路會亮起紅燈，但組件唔會燒。
▲ 就算亂駁，NPN 電晶體亦沒有壞掉。
以前中學學畫電路圖總係覺得好抽象，根本唔知自己有無畫錯。而呢支電路墨水筆畫出嚟嘅線可以直接通電，即時知道有冇畫錯，學畫 Circuit 就易明好多。加上點砌都唔會燒就可以更大膽去嘗試，作為學習電路概念嘅開始，應該可以大大提升初中生對電子嘅興趣。
售價：＄350
相關影片﹕
