個幾月前小米先喺北京發佈紅米 Note 2，今日小米於吉隆玻又舉行發佈會，原來係發佈紅米 Note 2 嘅國際版！國際版有幾國際呢？等籮文話你知！
紅米 Note 2 今年8月中先喺北京發佈，不過就係只限內地有售。今次籮文遠赴吉隆玻又係搞咩呢？原來小米公佈十一月十一日（光棍節）就會喺香港、台灣、星加玻同馬來西亞同步發售紅米 Note 2 嘅國際版，同時仲會開售小蟻運動相機添。咁國際版同國內版又有咩唔同呢？其實最主要都係…
由於國情唔同，內地版紅米 Note 2 係唔支援所有 Google 服務，要 Download Apps 就要用小米應用商店，Search 嘢要用百度，又或者用偏門方法，例如刷 Rom 黎突破依啲限制。籮文曾幾可時就聽過有朋友講：「如果冇咗 Google，真係唔知點生活。」。小米有見及此，就喺香港、台灣、星加玻同馬來西亞同步發售嘅紅米 Note 2 國際版中附帶 Google 服務，喺以上地區買嘅行貨紅米 Note 2 就可以用到 Google 啦。
▲小米副總裁 Hugo Barra 發布會中就講到：「Wow～係可愛嘅 Google Logo 啊（中譯）」
▲新機到手有唔同介面主題俾你揀
▲一開機就見到附帶 Google Search Bar 嘅 MIUI 7 介面，咁先係架嘛
▲Google Play 無問題！
▲內置仲有 Google 嘅全套服務，連 404 not found 嘅 Facebook 都喺一個名為「推薦」嘅 Folder 入面可以搵到
紅米 Note 2 無論國際版定國內版都有一樣規格。採用 MTK Helio X10 八核處理器、5.5 吋 1080p 全高清屏幕、來自 Samsung 嘅 f2.0 大光圈 1,300 萬像素主相機、500 萬像素前鏡頭及 3060 mAh 可換式電池等，而售價則是＄1,099 港元。詳細評測可以參閱 Edward 早前於北京寫嘅文章。而今次發佈會小米亦透露十一月十一日會喺香港、台灣、星加玻同馬來西亞同時推出小蟻運動相機，而香港，預售優惠價為＄499 港元，官方發售價＄549 港元。依件事相信唔少香港米粉（小米嘅 Fans 咁解，咁大陸係咁叫架嘛）都等得好心急，想買就記得 Mark 低 11月11日中午12點，香港小米官網、小米之家、小米 x CSL 專門店同步現貨發售紅米 Note2，而小蟻就會同日開始預售。
【評測】小米 15 Pro 亮銀版國行開箱評測 凹凸玻璃搶眼兼好手感 + 熒幕表現依然出色 + 相機配置驚喜欠奉 + 旗艦級效能電量亦夠「長氣」 【評測】小米 14T Pro 開箱評測 單手操控表現佳 + 夜攝表現出色 + 熒幕顯示亮麗 + 電量超「長氣」可用足一天以上 + 超抵玩旗艦效能手機 支援多達四個摩打 2,054 匹馬力 小米發表全新智能電動車底盤
