黎到第二十四部 007 《007：鬼影帝國》，同樣和上集《Skyfall》票房一樣大收，單係英國首映週已經收入 4100 萬英磅。不過上集同過去系列賣點有啲唔同，所以影評都非常兩極；而今集《鬼影帝國》小編就覺得返到 007 正軌，照顧到大部分觀眾既口味。但到底咁樣又好唔好呢？
好多人一聽到「公式化」就會覺得係負面，但小編覺得應用係 007 的話反而可能係件好事。今次《鬼影帝國》講述 James 收到 M (仲係 Judi Dench 個時)既最後任務：去墨西哥殺馬可·斯奇拉。點知發現背後有個強大既黑暗勢力： Spectre 。而且 Spectre 既首領 Ernest 竟然同 James 有私人關係，而 James 亦發現《量子殺機》既量力黨前成員白博士未死，佢指引 James 去搵佢個女瑪德琳，兩人一齊擊破 Spectre 。呢個公式可以話係任何一部 007 都搵得到，同之前《Skyfall》將重點放係劇情主軸上有啲唔同。但小編又覺咁樣既 007 先至係大部分觀眾心目中既 007 （雖然我都鍾意 Skyfall）。不過值得注意既係，今次《鬼影帝國》又係每解決事件都草草了事，小編睇到覺得：花左咁長時間竟然最後又用咁輕鬆方法 KO 大佬？
作為一個邪惡組織既大佬，同 James Bond 關係就如同無血緣既兄弟，其實 Spectre 大佬 Ernest 呢個角色可以有更好既發揮。但奈何睇晒成個故仔，都唔太覺佢恐怖，而且亦唔覺佢既能力有幾強；相反佢既出現場面唔多，而且感覺有啲弱智（佢所謂既報仇好無力）
講到 007 ，故仔似乎就唔會係各位入場睇既最主要原因吧。今次《鬼影帝國》既 CG 其實感覺比較弱，就以一開頭係直升機追殺馬可·斯奇拉個場為例，其實剪接整左好多用 CG 整既畫面入去，但反而令人感覺「假得濟」。整體黎講 CG 比以往黎講唔算太好，但打鬥畫面多左場景亦都豐富左包括係墨西哥既日頭萬聖節活動同邦女朗躲藏既雪山診所，呢啲都係成套戲視覺效果上加番唔少分的。
今次 Spectre 返到 007 正軌，就岩番晒以前觀眾啲口味，可能係見到 Skyfall 既負皮掛；雖然都唔錯，但對於幾鍾意 Skyfall 模式 sell 劇情主軸既小編黎講反而幾懷念。雖然我講左好多次 Skyfall ，但其實今次 Spectre 都有佢自己既可取之處：故仔同上兩部有連繫 ﹑ 最老「美魔女」邦女郎 Monica Bellucci ﹑ 豐富既場景同打鬥（加埋超索靚女Léa Seydoux），其實可以見到今次都係為左迎合返大部分觀眾既口味。雖然話《鬼影帝國》 148 分鐘並無冷場，但奈何成個主線故仔唔多吸引， James Bond 啲武器又好 1999 ，加埋又成日賣錶賣車置入式廣告，大大影響觀感，所以小編只係比 7 分。
評分：7/10
