HTC 剛剛先至推出 One A9，之前就傳年底仲有一部規格更強勁，擁有十核心處理器嘅 One X9 會推出。今日呢部「神機」就似乎有更多設計圖及規格流出，似乎外貌同之前流出的相片差不多，不過規格就弱咗少少，最少無咗十核心處理器。各位係 HTC 粉絲嘅 wire 民會唔會覺得失望？
據最新消息表示，One X9 預計會係 2016 年第一季推出，預計會比 HTC One M10（暫定名稱）呢部預計於明年發佈嘅新旗艦早。至於規格方面，其實都唔失禮，據 TENAA 消息指，佢會用上 2.2GHz 八核心處理器，有外媒表示會係 Qualcomm Snapdragon 820 處理器，但筆者覺得採用 MTK 處理器嘅機會更大。其他規格包括：2GB RAM、16GB 內置儲存空間（支援最高 1TB microSD 記憶卡擴充）、5.5 吋 1080p IPS 熒幕、1,300 萬像素主鏡頭、500 萬像素前置鏡頭（並非 UltraPixel 鏡頭）、支援 4G、內建 3,000mAh 容量電池及預載 Android 5.0.2 作業系統。
照呢個規格去睇，似乎確實會比 One A9 強，但似乎並未去到之前傳聞般「神機」。如果呢個真係 One X9 最終規格，唔知大家係更期待定係覺得失望呢？歡迎一齊傾下呀！
來源：TimesNews、nowhereelse.fr
