呢幾年 Snoopy 都係 apm 過聖誕，今年亦唔例外，更以首部《史諾比：花生漫畫大電影》中的經典場景做主題。就等我依莉詩帶領大家一齊遊歷 6大夢想區啦！
既然《花生漫畫》將會首度搬上電影大銀幕，第一個景點當然係星級影院沙發，你可以坐上去同一班老友記包括Snoopy、Woodstock、Charlie Brown 及 Lucy齊齊邊食爆谷邊睇電影。
星級影院沙發後後係一間 20呎高，以《花生漫畫》最為人熟悉的狗屋為設計藍本的 Snoopy 經典紅屋。望住Snoopy躺在屋頂上發白日夢，加埋旁邊的聖誕裝飾，真係好想立即去放聖誕假！
講到全場最高當然係 10米高的 Snoopy 飛機師造型飛船。巨型的Snoopy 頭戴復古飛行帽，繫上紅色長頸巾，盡顯機師的英姿。不過要影企佢的英姿最好就上 2樓啦。
▲ 穿上飛行裝備的 Snoopy 同女朋友菲菲登上聖誕飛船。
除咗矗立了多棵聖誕樹外，仲有多棵以 LED 屏幕建構成的數碼聖誕樹，營造出五光十色的冰雪森林。Snoopy 與好友Woodstock 以聖誕潮 Look上陣，坐上雪橇向途人大派聖誕禮物， Charlie Brown、Lucy 及 Linus 紛紛換上溜冰鞋，玩轉雪地的不同角落，兄弟 Ola f更與聖誕雪人結伴出巡同大家影相。
▲ Charlie Brown 換上溜冰鞋，玩轉雪地的不同角落。
▲ 坐係雪橇上的 Snoopy 準備出發送聖誕禮物啦！
Snoopy 係過去 65年陪伴過唔少人成長，係商場大堂高層就有一個 65年珍藏展，展出多年來的經典絕版精品，每件展品彌足珍貴，絕對是粉絲們不能錯過。
▲ 睇番 50-60年代的《花生漫畫》，原來以前的 Snoopy 瘦 D 架啵！
另外，大堂高層更有一間 Snoopy pop up store，獨家引入花生漫畫電影主題限定產品，包括各式各樣的精品擺設、文具以至公仔等，俾粉絲們齊齊入手。
▲ Snoopy & friends 的公仔可以掛係聖誕樹做裝飾呢！(大 $350、細 $95)
▲ 用 Snoopy 餐盒 ($116) 裝飯唔知會唔會食多 D 架呢？
▲ 兩層高的餐盒 ($132) 加埋暖水壺 ($112)，野餐用就最啱。
▲ 呢 D Snoopy 簿 ($18) 睇落好懷舊啊！
Snoopy 係 APM 搞咗咁多年好似已經無乜驚喜，影相位亦好似少過上年，不過講聖誕氣氛又真係唔差嘅。至於珍藏展同 pop-up store ，我估 fans 點都會去睇下架啦！另外，係影相同一日，我同換咗一身 Charlie Brown 服飾嘅 Mr. Wally 做咗個專訪，大家要密切留意啊！
聖誕氣氛 ★★★★☆
必影指數 ★★★☆☆
必買指數 ★★★☆☆
日期：2015年11月15日至 2016
地點：APM 大堂及大堂高層
