聖誕節唔少人都會捨得食番餐貴嘢，如果唔早 D book位都好難有得食，所有我依莉詩就開始尋味之旅，幫大家篩選各餐廳的聖誕套餐，而今日要介紹的就係位於銅鑼灣登龍街的白木屋。
聖誕節難免要預留一筆錢去暴飲暴食一番，而呢個套餐用咗含大量纖維的豆渣蓉 同 加入透明質酸的湯底等。可以話夠食得健康之餘又美顏。
▲ 豆腐迷你沙律 單品$28
前菜選用含大量纖維同蛋白質的豆渣蓉，混入薯仔同野菜製成，食落感覺好粗糙，而且好飽肚。
▲ 冬之特選剌身拼盤 單品$298
剌身拼盤有秋冬當造的鰤魚同松葉蟹腳，加上牡丹蝦、旗魚、三文魚、帆立貝同三文魚籽。剌身都係厚切，食落肥美，不過唔算太新鮮，唔會話有太鮮甜的感覺。
▲ 自家製暖暖豆腐 合桃味噌汁
豆腐係白木屋的皇牌菜式，每日係餐廳新鮮即製，配搭以可抑制皮膚炎症的OMEGA 3脂肪酸同美肌維生素 Biotin的核桃、味噌煮成的季節限定合桃味噌汁，非常特別。
▲ 上桌時侍應會捧著一大個木箱端出熱烘烘的白滑豆腐。一打開蒸氣冒出，未食都感到溫暖。
▲ 正當以為豆腐會似豆腐花一樣嫩滑的時候，原來質感並沒有想像中滑，反而非常粗糙，不過就有好香豆味。
▲ 鐵板野菜和牛串燒 單品$78
淋上照燒汁的和牛串分別捲住雞脾菇同日本青椒仔，口感各有特色。食完之後再食少少粉絲同蘿蔔絲可以減低油膩感。
▲長腳蟹海鮮雪見鍋 單品$298
整個套餐的重點係加入了透明質酸的冬日鍋物，一層層可驅寒的蘿蔔蓉和日本直送的水菜鋪滿鍋面，營造出賞雪的浪漫。
▲ 新鮮的長腳蟹煮調後肉質鮮甜。
▲ 抹茶白玉蜜豆 單品$32
抹茶白玉同草莓白玉紅紅綠綠，充滿聖誕氣氛，淋上黑蜜後味道提升不少。
▲ MIGAKI-ICHIGO Canette 士多啤梨氣酒 單品$88
聖誕節唔飲番杯香檳都唔似食咗聖誕大餐，呢種氣酒香甜清新，容易入口。
除了套餐，仲有唔少加入美顏功效的菜式。雖然睇又睇唔到，心知食一次唔會立即變靚，不過就覺得幾特別。
▲ 透明質酸牛油果鮮火腿三文魚卷 $68
三文魚含有豐富的脂肪酸同可抗氧化的蝦青素等美肌成份就係人都知，而且掃上咗一層薄薄的透明質酸，非常特別。
▲ 美白潤膚卡姆果梳打 $42 (左)、豐富骨膠原蕃茄汁 $42(右)
卡姆果係至今為止含最多維他命 C 的植物，含量係檸檬的 60倍，而味道有 D 似百香果，酸酸甜甜，非常開胃。至於蕃茄汁有 D 似茄汁，同樣酸酸甜甜。
呢間店位於一樓，主要以日式裝修為主，木枱椅、木隔板同木門充滿日本特色。除了普通枱外，餐廳旁有一排 VIP Room，每間 VIP Room 都有高牆和獨立門，私隠度十足。
▲ 其中一排的枱有矮屏風圍間，形成一個個的角落。
▲ 每間 VIP Room 都有高牆和獨立門，私隱度十足，不過有 D 細最多只可以坐 5-6個人。
雖然白木屋係香港唔算出名，性價比亦唔算太高，不過選擇食材方面幾有心意，不但選擇含大量纖維、蛋白質、維他命 C 等健康材料，部份更會加入透明質酸同骨膠原。據稱食之餘仲可以美顏，最少佳節暴飲暴食極都有番 D 安慰。而獨立包廂可以坐最多 6個人，情侶或者一家大細去食都有個私人空間。如果想試記得早一日 book 位啊！
打卡指數 ★★★☆☆
美味指數 ★★★☆☆
食店：白木屋 (2457 7488)
地址：銅鑼灣登龍街28號永光中心1樓
