籮文：「經典摺機 N 年後的新版」LG Ice Cream Smart 韓版機

2015-12-12

Published by

籮文

仲記得中學時期唔少家境富裕嘅女同學都揸住部 LG Ice Cream，我就只能夠去 M 記食兩蚊杯嘅真 Ice Cream。今年年頭 LG 就再推出一部新嘅 Ice Cream Smart，不過籮文就覺得市場定位由女性市場轉咗去長者市場，想知點解？繼續閱讀啦！

粉藍粉紅摺埋好少女 Feel

Ice Cream Smart 行 Android 4.4.2，部機個外表非常趣緻，有粉藍及粉紅兩色以供選購，機身膠感十足，個 Feel 似玩具多過似手機。中學時期，好多同學仔都會用千奇百趣嘅電話繩裝飾手機，依個年代仲有邊個會用電話繩呢，偏偏 Ice Cream Smart 保留咗一個圈圈喺鉸位俾你穿電話繩。（嚇死籮文，以為整爛咗一邊鉸位。）唔知你記唔記得以前嘅 Ice Cream，屏幕蓋係有閃燈，仲有 LED 走馬燈，可惜依一代通通都冇。

▲機身有點兒膠

▲「完整」嘅左邊鉸位

▲嘩右邊個鉸位爛咗？！原來係用黎俾你穿電話繩

▲機面只有一粒 LED 提示燈

打開蓋似長者機

摺埋就好有少女 Feel，咁打開又點呢？首先手感係非常好，多得圓渾機身，揸起黎好貼手。鍵盤按鍵大大粒，打電話又或者打字都幾爽，但係睇落就有啲似長者機，不過有粒好搶眼嘅黃色制，原來係 KakaoTalk 嘅快捷鍵，一開就可以打開韓國流行嘅通訊程式 KakaoTalk，不過香港又有幾多人係用緊 KaKaoTalk 呢？所以於設定中，用家可以自訂粒制開其他 App。而鍵盤有背光功能，但係亮度非常低，除非熄咗室內嘅燈，否則真係察覺唔到鍵盤嘅背光。

▲鍵盤按鍵大大粒，打電話又或者打字都幾爽，但係睇落就有啲似長者機

▲有粒好搶眼嘅黃色制，原來係 KakaoTalk 嘅快捷鍵，一開就可以打開韓國流行嘅通訊程式 KakaoTalk，不過香港又有幾多人係用緊 KaKaoTalk 呢？

▲而鍵盤有背光功能，但係亮度非常低

▲除非熄咗室內嘅燈，否則真係察覺唔到鍵盤嘅背光（方向制同 KaokoTalk 制都係冇背光）

▲如果你開啟一啲不支援 Keyboard 的 App，手機會彈出提示

兩種 Home Screen Setting

可能知道不少長者或小朋友會使用此機，手機內建兩款 Home Mode，除了普通常見的 Home Screen，仲有一個 EasyHome Mode，Icon 更大粒，介面更簡潔，去掉一些非必要嘅 App，更加易用。

▲可於 Setting 切換 EasyHome 及普通的 Home

▲比較貼近原生介面的 Home

▲Icon 大粒啲，簡潔啲嘅 EasyHome

3.5 吋 320 x 480 解像度螢幕可以 Touch

摺機黎講，3.5吋都算係大芒，但係 320 x 480 解像度就真係好似弱雞咗啲，正常距離觀察就已經見到不論文字或圖像都好有顆粒感。但係要讚嘅就係亮度唔錯，即使太陽照射下使用都可以清?閱讀畫面。而且螢幕係觸控式，就算遇到唔支援實體鍵盤嘅 Apps 或 Game 都可以用 Touch Screen 玩。仲有一點令依部機更似長者機，就係機仔細細但喇叭音量特大，用黎睇片都唔錯嘅，不過要成部機打橫都幾肉酸。

▲320 x 480 解像度就真係好似弱雞咗啲，正常距離觀察就已經見到不論文字或圖像都好有顆粒感

▲仲有一點令依部機更似長者機，就係機仔細細但喇叭音量特大，用黎睇片都唔錯嘅，不過要成部機打橫都幾肉酸。

前鏡得 VGA 解像度（30萬像素…）

擁有800萬後鏡頭，用返 Ice Cream Smart 個 Screen 睇相嘅時候以為質素麻麻，過返啲相落手機先見到原來唔錯喎！雖然解像度低，適度放大後，有油畫化但未算嚴重，而顏色表現就非常鮮豔。喂喂喂，又話主打女仔 Market，但前置鏡頭竟然得 VGA 畫質，即係30萬像素。自拍嘅嘢籮文識條鐵咩，所以邀請到依莉詩試一試，依莉詩表示由於像素勁低，影出黎就好似有自動美顏效果咁… 籮文表示，女仔諗法真係好難觸摸。

▲擁有800萬後鏡頭，用返 Ice Cream Smart 個 Screen 睇相嘅時候以為質素麻麻，過返啲相落手機先見到原來唔錯喎！

▲雖然解像度低，適度放大後，有油畫化但未算嚴重，但係顏色表現就非常鮮豔

▲喂喂喂，又話主打女仔 Market，但前置鏡頭竟然得 VGA 畫質，即係30萬像素。

▲自拍嘅嘢籮文識條鐵咩，所以邀請到依莉詩試一試，依莉詩表示由於像素勁低，影出黎就好似有自動美顏效果咁… 計我話，邊關事，依莉詩你本身靚咋！