G-SHOCK 超多款點選好 ? Katie 走訪時代廣場 G-FACTORY 求答案

2015-12-16

Published by

高威

G-SHOCK 已經成為很多人嘅愛錶，但種類繁多，有啲錶走潮款路線，有啲走專業求生多功能，就算各 Wire 民都未必熟得晒。今日 Unwire 就帶大家走訪位於時代廣場9樓嘅 G-FACTORY，仲會帶埋靚女Katie一齊去揀 G-SHOCK 手錶做聖誕禮物送畀男朋友。

旗艦店夠新夠齊唔怕花多眼亂

就算以 G-SHOCK 咁受歡迎，周街都有得賣，點解仲要去專門店 G-FACTORY 買呢？嗱，你買 iPhone 都會走返去 Apple Store 買啦，係咪？小編作為 G-SHOCK Fans，都一定揀去旗艦店睇，因為旗艦店一定最多最齊款，而且仲會分好晒類，你想睇邊一款，去返相應嘅專櫃就齊晒，最方便一定係咁！

分類按照不同用家而設設有 5 大專櫃

喺時代廣場 G-FACTORY 裡面，佢已經將不同嘅手錶按不同用家嘅類別分類，分別有最為用家熟悉嘅 G-SHOCK 、追求簡約及實用外表嘅EDIFICE、高貴與時尚兼備嘅 SHEEN、專為年輕女性而設的 BABY-G 專櫃以及專門為戶外活動而設嘅 PROTERK 全部按唔同嘅用家需要分類，可謂照顧周到。

G-FACTORY設有 5 大專櫃，方便唔同嘅用家需要，大家揀手錶時又可以更舒服，唔使搵到頭暈眼花喇！

可叫店員幫你揀

因為 Casio 實在有太多唔同嘅款式，小編的靚女性朋友 Katie都煩惱送邊款錶俾男朋友好，店員都會非常貼心地問下 Katie 想送啲咩款嘅錶好，店員就話一款外型強悍同功能齊備嘅手錶就比較適合，例如今年 Casio 2015 年最新嘅 Master of G 系列手錶，分為海、陸、空三種以唔同主軸嘅極限型手錶，每隻都獨當一面架！(咁似國產 007 對白?)

當我哋一進入 G-FACTORY ，我哋馬上就去咗 G-SHOCK 嘅專櫃，睇下今季有啲咩新款。

店員亦都好親切咁即時為我哋介紹返今年最新嘅 G-SHOCK Master of G 系列手錶，離遠睇都已經覺得吸引！

店員講返， MASTER OF G 系列主打三款，分別為空之王者(GPW-1000)，陸之霸者(GWG-1000)，海之強者(GWN-1000)，針對唔同環境使用需要而設，例如最中間嗰隻陸之霸者 (Mud Master) 咁，佢有防震，仲可以防止塵埃或泥土進入手錶！媽呀，好型呀！

去 G-FACTORY 做訪問，當然都係想知道最新款嘅潮流配搭啦！而店員就話俾我地知，今年興黑色襯金色，貪佢 tough 得嚟又夠 cool，唔使成隻都金色咁「土豪」！就好似呢隻 Master of G系列嘅海之強者 (Gulf Master) 咁，佢係今年嘅「黑 x 金」別注版，比原版更加型格！

全新Master of G系列「黑 x 金」別注版, 比原版更型格。

Katie 手中戴緊個隻係 Master of G 系列其中之一嘅 Gulf Master，別注版以金色錶圈最為搶鏡，但其實錶圈上 +10與-10數值係用嚟表示出氣壓差，當氣壓有巨大上升或下降時，位於10點鐘方向的轉盤內的指針會搭配鬧鈴提示。所以唔只睇得，仲好有用。

不過 Katie 話，佢都係鍾情呢隻空之王者 (Gravity Master) 咁話，啱晒佢個空少男朋友。因為空之王者配備咗一塊同 Sony 合作生產嘅低耗電 GPS LSI 晶片喺入面，而呢塊晶片可以接收訊號自動判別不同時區及夏令時間制，從而調整至當地準確嘅日子同時間。小編心諗，點解而家啲手錶咁勁嘅？