嚟緊就係聖誕，而且好快又到新年啦啵。咁多假最好就當然係周圍去玩啦！今年迎嚟兩個大型嘉年華：上年已經係香港搞過嘅 AIA 友邦歐陸嘉年華再度歸來，以及啱啱係趕及聖誕前夕開張嘅東華慈善嘉年華。有時間又夠銀彈去玩晒當然最好，但如果你荷包已經瘦到皮包骨，不妨睇吓今次嘅重點比拼，睇吓你會想揀邊個嚟玩啦！
作為 90 後嘅小編，「嘉年華就是要機動遊戲呀 不然要幹嘛！」就刺激機動遊戲而言， AIA 2015 有： Atmos Fear ﹑ Freak Out ﹑ No Limit ﹑ Remix ﹑ Mach 5 ，而且仲有今年新推出嘅 Das Fun Schiff ﹑ Space Roller ，款款都非常刺激，fing 得勁之餘又夠耐，小編每次返落嚟都會再上去玩多次先心息 XD！ 至於東華方面，刺激嘅機動遊戲主要係有極速空降﹑超級搖滾以及萬眾矚目嘅陀飛輪。就數量上明顯輸俾 AIA ，但由於東華係全新而 AIA 嘅大多沿用上年機動遊戲，鍾意新鮮感嘅朋友可能就會想揀東華！不過，東華機動遊戲明顯速度都較慢，fing 嘅篇幅細，同埋好快就玩完（陀飛輪都係得兩分鐘咋），未夠喉就已經玩完。有錢玩多次唔是問題，但要重新再排過隊你又肯唔肯呢？而純就刺激度嚟講，雖然 AIA 2015 啲野好多都玩過，但對小編嚟講依然刺激，起碼唔會鎖速鎖太勁，玩嘅時間又夠長，所以依然非常正非常抵玩。
嘉年華除左比我地呢啲成年人玩，亦都有唔少小朋友嘅機動遊戲比啲家長帶仔女嚟玩！而 AIA 今次仲加設左唔少專為小朋友而設嘅機動遊戲：Balloon Ride ﹑ Cyclone Coaster ﹑ London Bus ﹑ Rockin Tug 26 ﹑ Santa’s Train 等等，極之豐富，小朋友玩足半日都唔怕話悶！而東華亦設有專為小朋友而設嘅機動遊戲，有雙層旋轉木馬﹑鞦韆樹﹑繽紛可可杯以及極速滑梯等，好玩度都相當高，兩者不相伯仲。
玩嘉年華就緊係要玩攤位，玩攤位前就緊係要睇公仔吸唔吸引先落手啦！今年 AIA 啲公仔（相比起上年）相當靚，當中最熟悉嘅當然有胡迪﹑巴斯光年﹑毛毛﹑大眼仔﹑雪寶以及史迪仔…個朋友 Angel 。不過由於 AIA 攤位遊戲眾多，當中亦有唔少伏味濃嘅核突公仔，各位真係要睇清楚先好行埋去玩啊！小編覺得 AIA 攤位嬴獎唔算難，但就要拎大獎唔易，而有啲時候小獎竟然唔係佢擺係攤位嘅小尺寸版本（啊，小編玩雪寶嘅攤位換左唔知咩返嚟）！
而東華嘅攤位，由於小編去當日未開齊，但就已經見到晒各個攤位嘅獎品公仔，當中有米奇﹑米妮﹑ Inside Out ﹑跳跳虎﹑小熊維尼等，啲公仔好多都係你喊得出名嘅卡通人物。而其他個啲包括冬甩﹑熊貓﹑熊仔等等，亦都非常可愛。行晒成個東華攤位一轉，小編都搵唔太到樣衰公仔，所以可以安心根本你想要咩公仔或者鍾意咩攤位遊戲嚟決定玩咩。
AIA 票價為 $125 ，當中 25 蚊係入場費，而另外個 100 蚊就係換成十個代幣。至於東華票價為 $180 ，20 蚊為入場費， 40 為攤位遊戲費， 120 為機動遊戲費 ；而且東華早前更推出多項優惠，當中包括 $145 買正價票以及 20 蚊體驗門票。好明顯嚟講東華會平少少，而且每賣一張票更會有 40 蚊捐比東華三院協助弱勢社群。「嘩！咁明顯東華會抵玩過 AIA 喎！」
小編反而唔係咁睇，因為仲有機動遊戲價錢同飲食嘅部分。雖然兩者機動遊戲唔同無得直接比較，但刺激度兩者都唔算差天共地，價錢亦都差唔多，但 AIA 勝在玩時夠長，玩耐少少個價錢都抵返啦！而且更重要係，若然要係嘉年華玩足成日就逼住要係入面食野，而 AIA 嘅食物無論係種類同味道上都比東華嬴成條街（小編最鍾意都係食羊肉捲啊 XD心心眼），由 $40 ~ $80 不等，豐儉由人；而東華今次由爵士餐飲集團包辨飲食，選擇相對少之餘亦唔算特別，價錢唔算好貴但個份量同味道太唔成正比，實在有少少失望。
不過小編鍾意東華用卡形式多過 AIA 換代幣形式，因為拎住一堆代幣真係好驚會唔見左個而且玩時又要數，用卡就相當方便，唔洗數就咁嘟一嘟就扣左錢玩得（不過唔見卡就等如唔見晒入面所有錢）！
今次嘉年華 AIA 同東華仲分別帶嚟紫色牛牛劇場同英國頂級雜技團，比大家除左入場玩之餘更可以睇 show ！紫色牛牛將會由十二月到出年二月為各位帶嚟係愛丁堡藝穗節同倫敦演出過嘅合家歡節目，當中有雜技﹑喜劇﹑音樂等等，而亦都有我地嘅香港代表泰臣﹑林二汶以及卓韻芝表演添架，陣容可以話非常豐富，每日都有唔同嘅精神節目。而東華今次帶嚟嘅係英國頂級雜技團，由 25 位世界級表演者帶嚟嘅全方位雜技表演，包括：高難度踩鋼線﹑過場小丑，以及最危險緊張嘅「電單車極速激戰」等。
紫色牛牛就係每場節目收費，門票價錢由 $380 到 $580 不等；而英國頂級雜技團就由 $290 到 $490 不等。就價錢而言，英國頂級雜技團好似相對抵睇，而且有非常多的雜技表演收看，小編睇左足足個半鐘有多；但咁並唔代表紫色牛牛唔抵睇。因為今次紫色牛牛請嚟嘅表演者亦都相當著名，價錢比英國頂級雜技團貴亦相當合理，包括喜劇表演者 Russell Howard ﹑ 肌肉男同百變妖后艷舞嘅《BRIEFS 炫褲兄弟》以及當代雜技團隊 A Simple Space 等等，節目之多不輸英國頂級雜技團。
咁講左咁耐，到底點揀好呢？如果你鍾意刺激嘅機動遊戲而有足夠銀彈，就去 AIA 啦！因為佢款式夠多，玩嘅時間又多，刺激度又夠高，小編覺得係 AIA 玩半日都未必玩得厭！但如果係一家大小去玩的話，小編就反而建議東華。東華個場比較細，而且除左唔少為小朋友而設嘅機動遊戲之外，仲有好多配套設施都係為左小朋友而整嘅（詳情可以睇埋之前嘅東華試玩），咁就唔怕小朋友「咋型」話行到攰都無野玩。
如果想知更多詳細資料，就記得睇返 AIA 攻略 同埋 東華試玩 ！
相關影片﹕