AIA 嘉年華上星期就開咗幕，可惜我依莉詩就無去到，另一邊廂，東華嘉年華都係噚日正式開放啦！睇廣告成日都見到嗰個 360度狂轉的陀飛輪，都估到東華嘉年華的機動遊戲一定好刺激，所以我就邀請埋遊戲王 Billy 一齊試玩！

a) 3 大嚇破膽機動遊戲

多得機電署的默默努力，嘉年華中最嚇破膽機動遊戲都能夠趕係聖誕前開放，其中包括最萬眾期待的陀飛輪啊！

1) 360度狂轉－陀飛輪

入到門口第一樣見到就係 2015年瑞士創新製造的機動遊戲「 陀飛輪」。由 3個四方大型框架組成，24個玩家一字排開，3個框架會同時向不同方向「迴環立體式」旋轉對抗地心引力，絕對係挑戰玩家瘋狂極限。

收費：$120 /次

Billy 點評

望見實物好似無傳聞的咁高同轉得咁快，但上到去原來都相當暈。3大個 4方框框框住自己，望到眼花花，而且不時上下左右倒轉都分辨唔到自己咩狀態，不過 $120 咁快玩完，覺得性價比唔高，如果調快少少個速度同可以玩耐 D 就更好啦！

刺激度 ★★★★★

離心力 ★★★☆☆

抵玩度 ★★★☆☆

2) 終極跳樓機－極速空降

官方聲稱呢部係全球最高移動式終極跳樓機，望落又真係高過海洋公園個跳樓機好多咁。要從27層樓（80米）頂峰瞬間垂直急速下墜，無重飄浮感交織壓力與緊張，我諗起都唔敢玩。

收費：$100 /次

Billy 點評

雖然今日天陰陰，不過上跳樓機睇風景真係一流。一開始佢會慢慢上到頂，離心力唔會太大，之後仲會停十幾秒俾你欣賞風景，但旁邊幾位就嚇到好驚，擔心唔知幾時跌落去。一衝落嚟個下原來都幾驚，真係超快，不過有一下會減速，比個心理準備你。個人就覺得跌一次就無，好似唔太夠喉。

刺激度 ★★★★☆

離心力 ★★★★☆

抵玩度 ★★★☆☆

3) 轉轉海盜船 ── 超級搖滾

呢個有 D 似海盜船但又不斷轉的「超級搖滾」一次過可以坐 24個人，每次會擺動至30米高空，而座椅圍繞垂直軸 360度轉動。時向內時向外被不斷旋轉。好懷疑自己係咪入錯咗洗衣機啊！

收費：$50 /次

Billy 點評

3個入面呢個最好玩，有離心力又未至於大到揮唔到手，手揸 Go Pro 都可以輕鬆同對面傾計，又唔暈，景又靚。雖然唔係最刺激，但係最好玩。(當然我係為咗俾大家有第一身體驗先拼死帶 Go Pro 上去啦，大家唔好學啊！)

刺激度 ★★★☆☆

離心力 ★★★★★

抵玩度 ★★★★☆

b) 6 大小朋友級遊戲

除了刺激的機動遊戲，嘉年華有唔少適合一家大細的機動遊戲。主辦單位更由今日開始到 12月 27日推出優惠，只要 $20入場費就可以憑門票免費玩指定家庭式機動遊戲一次，當中包括「超級紐約滑梯」、「繽紛可可杯」、「迷你小鞦韆」、及「極速滑梯」，父母們可以慳番唔少呢！

 

1) 瀡唔斷氣－超级紐約滑梯

去年美國「Super Bowl超级碗」活動期間熱爆紐約時代廣場的 6層樓高超级滑梯今次首度係亞洲亮相。超乎想像的高度配合特製滑板，讓大人細路感受世界級瀡滑梯樂趣。希望唔會噋親個 pat pat 啦！

收費：$40 /次

依莉詩點評

相信呢個係全場最啱細瞻又想有少少刺激的我玩的遊戲。由 6層樓高超级滑梯望落去其實都幾驚，第一次瀡的時候我仲不停用雙手剎停 (唔好學我)，不過第二次我就無咁驚，訓晒個人落去，一瀡到尾好爽架！

刺激度 ★★★☆☆

離心力 ★★☆☆☆

抵玩度 ★★☆☆☆

2) 超迷你－繽紛可可杯

呢個咖啡杯真係超迷你，雖然話可以容納一個大人同兩個4 歲或以上細路一齊坐，不過坐咗依莉詩上去已經無位啦！而且唔似一般咖啡杯中間可以自己轉，果然係一個小朋友的玩意。

收費：$30 /次

3) 小朋友 only －迷你小鞦韆

同樣呢個鞦韆都係超迷你，只限 105-140cm 身高玩，不過見到 D 小朋友玩得咁開心，父母應該肯課金嘅。

收費：$30 /次

4) 樂園必有－極速滑梯

呢條滑梯無論係模擬樂園定現實的嘉年華都有，夠晒經典，而且大人小朋友可以一齊瀡，總算係親子同樂。不過 $30 玩一次我會選擇玩超级紐約滑梯啊！

收費：$30 /次

5) 小朋友車迷最愛－ Hot Wheels 100 米跑道

男仔通常都鍾意車，呢條 100 米跑道就可以比小朋友一嘗賽車的滋味，不過架車都幾細，只限 3 – 8 歲、120cm 以下小朋友玩，依莉詩想入去玩都唔得添！

收費：$40 /6 分鐘

6) 海盜冒險之旅 － 迷你高爾夫球樂園

Golf 同海盜原來可以放埋一齊，呢個以海盜冒險主題的高爾夫球樂園就好啱爸爸教小朋友打 Golf 啦！要令高爾夫球穿梭海盜裝置之間，少 D 耐性都唔得架！

收費：$40 /15 分鐘

c) 攤位公仔率先睇

本來對唔玩機動機遊戲的我，攤位遊戲係我的重點，點知去到一個都未準備好，只係見到一隻隻公仔等緊我呢！

▲ 公仔上同 AIA嘉年華差唔多，不過大獎好似無咁巨型。

▲ 整到一半的攤位，大概會係保齡球之類的遊戲吧！

▲大大個冬甩好好味咁啊！

▲ 跳跳虎好似 AIA 嘉年華都見過啊！

▲ 呢 D 動物背囊睇落唔太吸引咁。

▲ 呢對熊，要中就要中夠一對！睇嚟男士們要諗下玩唔玩呢個攤位好啦！

▲ 熊貓好可愛呢！

依莉詩遊感

東華嘉年華同 AIA 嘉年華差唔多同期舉行，好自然大家都會用嚟比較。講到機動遊戲種類同價錢其實大家都差唔多，同樣顧及到大人小朋友的需要，如果想浪漫拍下拖，或是一家大小找個假日好去處的話也不錯。不過東華嘉年華好多嘢都未準備好，如果要去我建議等到 1月大部份嘢開齊先，特別係啟德郵輪碼頭交通唔太方便，又未有太多食物種類提供，打算 hea 足一天的話記得帶定乾糧啊！

東華慈善嘉年華2015

日期：2015年12月23日至 2016年3月28日

時間：2015年12月23日至 2016年 1月3日: 11am – 11pm ; 2016年 1月4日後: 3pm – 11pm(星期一至四)、11am – 11pm (星期五六日及公眾假期)

地址：前啟德機場跑道

門票：$180 (包機動遊戲面值 $120 及 攤位遊戲面值$40 )、小童及長者免費入場

 
相關影片﹕