一年 N 度閃光彈爆破的節日又到了，相信唔少「空虛寂寞凍」的小毒毒都深受其害！小妹最近睇左幾單日本關於「反戀愛資本主義」的新聞，覺得實在太有意思了！點解香港冇類似嘅行動架？
我諗各位小毒毒都好清楚「去死去死團」，以防有人唔清楚「去死去死團」係乜，我已經幫大家查左喇！根據香港網絡大典，「去死去死團」係源自日本漫畫《彩虹化身俠》及《去吧！稻中乒團》的，稻中乒團係專門以「破壞情侶」為目的，佢地「以一種戲謔的方式，用搞笑、娛樂的風格表達單身的孤單」。「去死去死團」係節日零舍活躍，尤其情人節、聖誕節等呢啲會有眾多情侶慶祝的節日，我諗唔使解釋大家都明掛～
如果大家呢幾日都要過 Lonely Lonely Chrismas，千祈唔好過度倚賴你的「手足」，我相信其實都仲有好多朋友都係活係 Single Hell 嘅，點解大家唔襯呢個節日，約埋班朋友一齊慶祝呢？
其實聖誕都係一班朋友或者家人開開心心過嘅日子。不過講就咁講，大部份後生嘅都唔會想同屋企過，尤其是唔係個個屋企都咁西化。當西人聖誕喺出面凍冰冰落哂雪嘅天氣下可以匿喺間屋仔圍埋喺火爐隔離食火雞，我哋就喺熱死辣辣嘅香港屈起一間幾百呎嘅屋企，可能食嘅係冬至食剩嘅豉油雞或者白切雞。到想約朋友喇喎，一個就已經佳人有約，另一個單身朋友就嫌一班小毒毒出街獻世就不如匿埋屋企自己過算數。
平安夜喺香港係一個同情人節冇乜分別嘅節日，最多可能唔使送花咁解。周圍嘅西餐廳又一定坐地起價，又貴又唔抵食。正面啲咁諗，其實單身都可以慳返一大筆。不過其實聖誕節食貴食平都係有得揀，而單唔單身呢…… 都係唯有祝大家早日脫團啦咁，Merry Christmas！
最後點一首歌俾大家，唔好哭哭喔～