Netflix HK 終於都正式登陸啦！對於唔少美劇迷嚟講係一個天大嘅好消息啊！不過仍然有相當多 hit 劇仍然仲未有得睇住。如果搵唔到你想睇個套，又或者唔知睇咩好的話，不妨睇下今次已經係 Netflix 有得追嘅十大美劇推介，一邊煲住其他一邊等 Netflix HK 加番。
首選就係大熱嘅 How to Get Away with Murder 。故事講述著名刑事案律師兼法學院教授 Annalise 以及一群充滿理想嘅法學院學生，點樣不惜一切成功為案件版告打甩謀殺罪。而佢地自身亦被捲入一場又一場嘅謀殺案件，所有人嘅命運亦都因此而徹底改變。
至今已經去到第二季（季中停播，二月回歸），懸疑感仍舊十足，更加入多咗幾條複雜嘅感情線，由 hehe 到 sheshe 以至到 sheheshe （係咪好亂呢XD）都各有各精彩，佢嘅好睇程度絕對不輸當初假想敵 Scandal 。
要講大熱，當然都不得不提近期相當紅嘅 Jessica Jones 啦！故事講述唔想再做英雄嘅 Jessica Jones 去咗紐約地獄廚房做私家偵探。飽受創傷症候群折磨嘅 Jessica ，依然受到「心魔」所折磨，亦即係本劇另一主角 Kilgrave ，佢擁有能夠控制人心嘅超能力。 而係劇中，佢將會一邊繼續佢嘅偵探工作幫助他人，同時亦都要應付一直係佢腦中不散嘅心魔 Kilgrave 。
偏向心理驚悚劇嘅 Jessica Jones 係開播前反應麻麻，但其後好評不斷，收視最終亦都唔錯。相比起過往 Marvel 英雄劇角色刻板印象， Jessica 更加似一個有缺陷嘅超能力者，飽受折磨而退下唔想再當英雄，過著普通人嘅普通生活（當然事實上並唔可能）。 Jessica Jones 一開始睇會覺得成套劇好黑暗，但一路睇就會發現 Jessica 不停為自己意志同過去創傷奮鬥反反擊，睇住 Jones 就好似睇住黑夜中嘅星星咁慢慢發光。
Netflix 稱用戶平均每日看 2 小時 全球用戶人數突破 2.8 億 Netflix 停止 iOS 16 支援 新版程式僅對應 iPhone XS 以上機型
既然有 Jessica Jones ，當然唔少得同樣係 Marvel 以及嚟緊會合體成 Defenders 嘅 Daredevil 夜魔俠啦！主角 Matt 係一個拳擊手嘅仔，佢係救人時接觸到一種奇異放射性廢料導致雙目失明，但其餘四種感官就變得超級敏銳，令佢靜坐家中閉上眼亦睇到城市任何一處。係父親遭歹徒襲擊橫死街頭後，佢誓言要為無辜受害者復仇，同城市中嘅邪惡勢力抗爭。係日頭佢係一名普通律師，但夜晚就穿上紅色緊身衣，化身夜魔俠打擊罪犯。
雖然一樣以暗色調為劇嘅主 tone ，但同 Jessica Jones 唔同嘅係 Daredevil 係走向打鬥戲為主。佢唔以好多花巧畫面去強調佢聽嘅部分，反而讓演員有咗更好發揮空間；而且每集情節亦都相當吸引。 Daredevil 絕對係一套會睇上癮嘅（第一季完畢，第二季亦會係本年回歸）！
第四位就係 Gotham 哥譚。故仔講述蝙蝠俠世界嘅故事，不過主角並唔係蝙蝠俠，而係警察 James Gordon 。以罪案劇形式展現，每集 James 都會著手不同案件，而當中嘅壞人更係我地係蝙蝠俠中耳熟能詳嘅反派。
雖然收到唔少負皮，但卻仍然有唔少觀眾對佢嘅喜愛有增無減，而小編當然係其中一位！一樣以黑色調為主嘅 Gotham ，被視為「無蝙蝠俠嘅蝙蝠俠前傳」；但小編就覺得佢更似獨立出嚟故事。雖然睇唔到英雄儆惡懲奸，因為成套劇觀眾都係以追求公義嘅警察 James Gordon 嘅角度去睇，而唔係 Bruce Wayne ，不過咁反而換轉角度去睇反派點樣因貪婪權力而產生，非常之有趣。
故事講述係一次慘烈船難之後，花花公子 Oliver 失蹤五年認定死亡，直到佢被發現係一個偏遠太平洋小島上生還落嚟。當佢返到位於星城嘅家時，佢嘅母親 Moira ﹑感情深厚嘅妹妹 Thea 以及死黨 Tommy 都發現 Oliver 經過島上嚴酷生活改變咗好多。Oliver 隱藏改變後嘅自我，想要彌補自己年輕時嘅所作所為，同埋和前女友 Laurel 和好。 Oliver 秘密咁比自己一個新身份，一個名叫綠箭俠嘅治安維持者，為自己家族所犯嘅錯進行補償，同社會醜惡戰鬥，保護星城榮耀。
由 DC 漫畫改編嘅 Arrow ，由首播就經已有 400 百期嘅收視，依家更成為咗 CW 嘅長壽英雄劇。小編不得不承認睇第一季嘅時候有啲失望，因為主要都係先鋪排 Oliver 背景，然後一集一集咁獨立小故事咁打擊罪犯，內容上唔算好緊湊；但之後每一季嘅情況都有進步唔少，亦都會有鋪排懸念，可看度逐漸提升。
故事發生係十九世紀早期，維多利亞時代嘅倫敦，結合一眾熟悉嘅怪獸﹑恐怖同埋靈異故事人物。主角包括弗蘭肯斯坦博士同佢創造嘅怪物，以及王爾德筆下嘅不老人 Dorian Gray 同埋吸血鬼王 Dracula 。
Penny Dreadful 嘅反應通常好兩極化：一係鍾意到無法自拋，一係好快就會覺得好悶，睇唔明劇情做緊咩。其實咁並唔能夠怪觀眾，因為 Penny Dreadful 幾要求觀眾有一定文學根底同靈異故事認知。但當睇明白之後，就會發現 Penny Dreadful 嘅精緻同細膩，鍾意恐怖嘅朋友，小編係好強烈推介呢一套！
Netflix 稱用戶平均每日看 2 小時 全球用戶人數突破 2.8 億 Netflix 停止 iOS 16 支援 新版程式僅對應 iPhone XS 以上機型
故仔講述 Steven Avery 嘅悲慘故事：佢無故捲入一宗重大襲擊事件，其後被判入獄，服刑多年後無罪釋放。這宗獲釋案例引發美國刑法體系重大立法改革，而佢亦係出獄後提起訴訟，揚言揭發當地執法單位貪腐內幕，而最後嘅勝訴為佢帶來數百萬元賠償。然而，正當呢宗民事官司轟動社會之際，佢忽然成為另一宗恐怖案件的主嫌疑犯。
相當新嘅 Making a Murderer 推出無幾耐，回響相當唔錯，亦都係少數以記錄片形式製作嘅劇集。導演耗時 10 年記錄先至成功完成呢部記錄片，以極其真實嘅拍攝形式展現呢宗刑事案件嘅曲折離奇。
Better Call Saul 其實係 Breaking Bad 嘅衍生劇，不過更似係前傳。故事講述刑事律師 Saul Goodman 係幫 Walter White 做律師之前嘅故事，以及佢點樣從 Jimmy McGill 轉化做 Saul Goodman 嘅過程。
唔少美劇迷都好鍾意睇 Breaking Bad ，而暫時 Netflix HK 就仲未有得上，有興趣嘅讀者都可以選擇睇咗呢個前傳先！
故仔講述綽號「Red」嘅前政府軍事情報員 Raymond Reddington 一直被 FBI 追捕。佢同全球重要罪犯都有聯繫，因此有「犯罪界管理員」之稱。有一日，Red 突然走入華盛頓 FBI 總部自首，並指自己同 FBI 有相同興趣 – 捉拿危險的罪犯和恐怖分子。其後 Red 向 FBI 提出一個交易：佢會同 FBI 合作捉拿罪犯同恐怖分子，但只會同 FBI 新手Elizabeth Keen 對話。係 Reddington 自己嘅犯罪生涯過程中，佢製作咗一份「黑名單」，包含唔同政客、犯罪集團、間諜同恐怖份子，而名單上大多數人更係 FBI 所唔知道。
小編幾鍾意鬥智鬥力嘅劇集，尤其係當你以為故事正慢慢係到揭開嘅時候，你捉得住往後劇情發展，但原來並唔係你想像中嘅結局咁。懸念十足嘅黑名單絕對係值得煲嘅美劇之一！
故事根據《驚聲尖叫》系列電影改編，描述一段偷拍視頻係 YouTube 被人瘋狂轉載後，呢個平靜嘅小鎮上卻因此引發咗一連串謀殺案。看似平靜嘅小鎮背後曾經有過一段無人願意談起嘅黑暗歷史。或者呢段歷史正係呢名連環殺手展開殺戮嘅關鍵因素。
Netflix 稱用戶平均每日看 2 小時 全球用戶人數突破 2.8 億 Netflix 停止 iOS 16 支援 新版程式僅對應 iPhone XS 以上機型
