望一望月曆，原來已經踏入農曆十二月，年尾要送舊迎新，於是我就「係咁易」執下公司張枱，見到有好幾個流動充電器（即係「尿袋」）擺左係度冇用過，問同事一係就話冇用，一係就話壞左，叫我掉落垃圾筒。好啦，掉左落垃圾筒之後，我望住佢地，唔知點解覺得有一種不負責任的感覺，可能係驚佢地會爆炸掛，所以跟手我就執返上黎，睇下有冇更好的處理方法。
以港女的常識推論，「尿袋」在結構上應屬於充電池，理應可投放充電池回收箱內，但環保署的減廢網頁上只說充電池（battery）可供回收，並沒有說流動充電器－「尿袋」（portable charger）可否回收，所以港女就打去問個究竟。
環保署負責人回覆指「尿袋」可以放入充電池回收箱，但一般的充電座就不可以了。大家亦要留意「尿袋」於放入回收箱前，要先用皺紋膠紙將所有插頭及破損位置封口，如果「尿袋」機身的破損程度較大，則需要用膠袋裝好並封口，才好放入回收箱。
全港有超過 600 個充電池回收點，包括全港所有地鐵站、全港所有麥當勞、部分便利店、屋苑、商業大廈等，詳細地點可於此連結找到。
「尿袋」裏面的鋰電池含重金屬，是危險品，如果棄置不當會嚴重污染環境，對動植物亦有害。不過，充電池內的金屬物料是可以加工循環再用的，適用於重工業及輕工業。香港現時並沒有工廠循環再造充電池，收集後的充電池會先由承辦商儲存好，然後運到外地再造。據環保署資料顯示，在港收集的充電池會運到韓國處理，循環再造。
而家愈來愈多電話內置電池，不讓用家換電，貌似更環保，但其實製造更多廢物，因為電池壞了基本上不能換過舊新的電池，變相逼用家成部機拎去整，最後高昂的維修費令用家寧願買過部新電話；當電池老化，逼用家長期吊住「尿袋」，用壞左又多一個電子廢物。所以，為了不破壞日漸惡化的環境，我地要主動做好回收工作喔！