吉野家打邊爐一向都受年青人歡迎，特別係當中的芝士竹輪，入面的爆醬芝士令人一試難忘。但偏偏芝士竹輪一煲得一粒，又無得追加，總係覺等唔夠喉。最近吉野家就推出 120 分鐘任食任飲放題，一於用芝士竹輪餵飽你！聽落咁吸引，我依莉詩就第一時間去試啦！
因為今次的放題只搞一星期，仲只係得西環豐業大廈分店先有得任食，所以都估到有唔少人排隊，但萬萬都估唔到吉野家 Shabu Shabu 的威力足以令人如此瘋狂。排第一位的顧客 4 點就已經來到，仲係由天水圍遠度而來啊！亦因為新店面積唔算大，未到 5 點半，第一輪的坐位已經滿額，即時說其他的只好係店外苦等到 8 點先有得食。
▲ 5點多的時候，店外已有過百人排隊，大多都係年青人。
▲ 店內的位置唔多，坐滿人其實都有 D 逼，幸好呢度唔洗自己拎嘢，只要填好要 D 乜，職員都會送到你枱面。
食慣吉野家邊爐的都知有 D 咩材料，基本上問到要咩湯都知有番茄湯、日式雪濃湯和野菜清湯揀，而肉類就有牛肉、雞腿肉和豚肉，飲品就係可樂、茶定麵鼓湯。不過今次的火鍋醬料除了日式焙煎芝麻醬，更新加咗醬油、柚子醋、蘿蔔蓉和蔥花，另外仲有 30 款追加配料，包括肉類、海鮮、鍋物、蔬菜和麵食等任食。當中當然唔少得芝士竹輪同炙燒芝心包啦！
▲ 湯底有番茄湯、日式雪濃湯和野菜清湯 3款選擇，都係平時食開的味道。
▲ 火鍋醬料除了日式焙煎芝麻醬，新加了醬油、柚子醋、蘿蔔蓉和蔥花，不過我依然覺得芝麻醬最好味。
▲ 牛肉、雞腿肉同豚肉都係無限量供應，而且有超過 30 款配料追加，包括：肉類、海鮮、鍋物、蔬菜和麵食等。
▲ 芝士竹輪平時一煲得一粒，今次可以無限追加，當然要狂食啦！
▲ 新推出的炙燒芝心包芝士味不比芝士竹輪少架！鍾意食芝士竹輪的話一定要試埋呢款。
▲ 肥牛的質素同平時差唔多，不過不失。
▲ 只要 like 吉野家 Facebook Page 就會得到神秘配料，今日的神秘配料係青口啊！
由快餐店轉做放題混亂都係預咗，同平時食放題唔同，吉野家係劃一時段入坐，每日只有 6pm-8pm 同 8:15pm-10:15pm 兩個時段，而且需要先買飛後入坐，要一次過處理咁多客人有相當難度，所以入坐後未必有足 120 分鐘時間食。不過佢地都好細心，一早預備咗大量利是封，遇到客人有咩不滿都派疊俾佢地順番條氣。中途仲有有獎遊戲大送博多甜王士多啤梨，令氣氛非常高漲。
其實我覺得今次吉野家好聰明，明明 $138 食火鍋放題唔算太吸引，肉的質素亦唔高，唯獨配料比較優勝，但就因為時間短、只限一間分店就可以吸引咁多粉絲去試。某程度上，我更覺得今次活動係一場公關 show 或是實驗性的活動，不過唔知點解我就係為咗任食芝士竹輪而衝去排隊，或者這就是芝士竹輪的魔力吧！
原來想任食芝士竹輪要去到咁遠，仲要排長龍都未必食到，我今日就去咗各大超市尋找芝士竹輪的蹤跡，等大家可以一解芝士竹輪愁。根據係惠康、百佳、一田、AEON、759 阿信屋 同 佳寶 的地毯式搜索，我發現了一款外貌同吉野家極似的芝士竹輪，不過除了紀文呢個品牌之外就再無發現了。
▲ 最後我找來 3款同樣由魚同芝士製成的芝士鍋物，試下比唔比得上吉野家的芝士竹輪。
呢款同吉野家的芝士竹輪極似，同樣係獅子狗的外型中間夾住芝士，一啖咬落去芝士就會爆晒出嚟，一唔小心就會燙親個咀。
呢款魚豆腐有一粒粒芝士係入面，芝士顏色就夠特出，但就唔會流心，芝士味亦唔太濃。
魚餅相當大塊，雪白色的外皮包住淡黃色的忌廉芝士，剪開後有少許流沙，口感特別。
魚豆腐無乜特別，有少少芝士味，無乜大驚喜，而魚餅好淋，無芝士味，口感唔太好。我最鍾意食芝士竹輪，不過沒有吉野家的芝士咁濃，好似水咁。
吉野家的芝士竹輪芝士更多，咬落去 D 芝士會爆出嚟。魚豆腐芝士味較少，似普通魚蛋，而魚餅好粉，感覺好怪。
魚豆腐的魚味較重，芝士味唔多，而魚餅好淋，食唔出芝士味，都係芝士竹輪最好味，芝士好 creamy ，好滑，不過就無吉野家的咁多芝士。白忙一場，睇嚟想食到美味的芝士竹輪都係要去番吉野家，不過物以罕為貴，每次一舊就好了，任食就會好快厭啦！
吉野家西環豐業大廈分店
地址：西環石塘咀德輔道西347-349號豐業大廈地下G及H舖
供應時間：6pm-8pm；8:15pm-10:15pm
費用：成人$138；小童$98
備註：不設訂座，先到先得
相關影片﹕