以前放學蒲機鋪、網吧，再唔係就影下相紙相，但呢 D 係銅鑼灣好似愈來愈少咁，到底依家 D 學生放學仲可以去邊呢？最近發現咗個新蒲點，聲稱俾一個收費就可以任玩 10 種遊戲，今日我依莉詩就同籮文、Billy 一齊去睇下抵唔抵玩。
COMBO 係銅鑼灣 SOGO 對面的樓上鋪，交通方便，而場地亦相當寬敞， 3,000 多平方呎加上白色的外牆及光猛的燈光，同一般網吧、保齡球場等消遣的場地好唔同，形象更健康，甚至有去了青年空間的感覺。收費方面，試業做緊半價優惠 $30/hr 就可以任玩足球賽事直播、虛擬現實遊戲、桌球、桌上足球、飛標、乒乓球、賽車遊戲、私人影院、電視 PS 遊戲、電動麻雀、啤酒乒乓、各種牌類及版圖遊戲等遊戲。短短開咗幾日，我地 3 點鐘去到已經有 10 – 20 個學生玩緊，睇嚟都幾受中學生歡迎。
▲ 同機鋪、網吧等消遣的場地好唔同，呢度光線充足，有去了青年空間的感覺。
近年有幾間 Party Room 都引入了桌上足球呢個遊戲，玩法同桌球一樣，不過變咗用腳踏，考反射角度之餘，仲要考埋腳法，少 D 運動細胞都唔得。
講到 VR 虛擬實境遊戲，唔少人都上 YouTube 睇過片，但冇眼罩始終少咗份立體感。呢度就會每一兩星期推出一個新遊戲俾大家體驗。今次我地就玩咗過山車之旅同鬼屋，真係夠晒逼真，細膽的準備隨時尖叫吧。
賽車 Game 其實係屋企都玩到，不過呢度就有埋軚盤同座位，似足係機鋪玩咁，多機連線對打就更加刺激啦！
落酒 Bar 少不了掟鏢 show 下身手，但要威之前點都要交下學費。呢度就可以俾個機會你慢慢練習，$5 都慳番。
平時篤波最少都要玩成個鐘，其實篤多兩三局就開始厭，呢度就厭咗就可以隨時轉 Game，啱晒三分鐘熱度的人。
有時唔識打牌都幾樣衰，特別當個個都疊好晒 D 牌等你個下真係…而有咗呢部麻雀機，按個掣 D 牌就會自動疊好，唔識打都可以扮雀神啦！不過打親牌都要幾個鐘，咁其他人未無得玩？負責人 Zoe 就解釋，呢度專攻年青人生意，大家都係玩下就算，唔會認真計錢，所以會好快打完。佢仲講笑咁話「大癮嘅都去咗樓上麻雀館啦！」
桌球枱加塊板，唔洗 3 分鐘就變身成乒乓波枱，咁就可以猜下波啦！
第 8 同 9 的活動都係同一個地方進行，坐係梳化，睇足球賽事直播又得，打 PS 遊戲 都得，就好似係屋企咁。
玩到悶悶地，另一邊有多款卡 game 同 board games 選擇，等你可以同朋友坐定定邊傾邊玩。
雖然話俾一個價錢可以有咁多野揀，但因為場內同一時間會最多會放 80 人，如果想玩虛擬實境或者桌上足球呢 D 較吸引的遊戲就要等耐少少。幸好去得的多數係學生，所以大家都好守規矩，我地去的時候最多試過有 30 – 40 人，人人都有野玩，而且氣氛都幾好。不過當然，如果唔想下下等，除了 Walk-in，都可以選擇包場或者包房，咁個個都識就方便好多啦！
▲ 收費分為 3種，每小時計、包房 及 包場，入場時會每人派發一條手帶作識別，同樣可以任玩場內遊戲。
桌球「火箭」奧蘇利雲優才計劃成香港居民 喜愛香港稅制好、美食多、自然環境佳 Apple Immersive Video 系列首播 可於 Vision Pro 感受沉浸式體驗 Meta 放棄與 Apple Vision Pro 競爭 轉移重心開發低成本 VR 裝置
場地相當大，而且用白色做主調，加埋光猛嘅光線，俾人嘅感覺相當舒服。總共有成十種遊戲咁多，好動嘅可以玩桌球﹑掟鏢或者桌上足球，比較文靜嘅就可以揀賽車﹑麻雀或者 VR Game 玩，價錢亦相當合理，最啱一班人係銅鑼灣行街行到攰上去 hea 下！
其實呢度的遊戲唔算特別，好多樓上 Cafe 或者 Party Room 都有，甚至有 D 係屋企都有得玩，不過香港土地問題咁嚴重，想有個唔洗食野又可以 Walk-in 入去 hea 幾個鐘的地方真係好難，而且呢度感覺上都幾健康，又有咁多野玩，好過去網吧或者機鋪流連。最好就係包場可以自攜食物，啱晒搞班會活動。
COMBO
地址：銅鑼灣怡和街2-6英光大廈4樓
開放時間：星期一至四: 3:00pm-12:00am、星期至至日: 12:00pm-12:00am
查詢電話：2203 4277
相關文章﹕
桌球「火箭」奧蘇利雲優才計劃成香港居民 喜愛香港稅制好、美食多、自然環境佳 Apple Immersive Video 系列首播 可於 Vision Pro 感受沉浸式體驗 Meta 放棄與 Apple Vision Pro 競爭 轉移重心開發低成本 VR 裝置