港人活用 「3D 打印」重現童年過年喜悅！專訪藝術家 Angryangry

商場的裝飾絕大多數都係大型裝置，等經過的人可以影下相，而東港城今年的新年裝置亦唔例外，中間放一個高達 6米的由 3D打印技術製成的巨型縷空花瓶，聯同港台藝術家運用 3D打印作品塑造出「3D打印藝術萬花園」。今日我就訪問了藝術家 Angryangry 同 來自台灣的創作團隊 Fabraft ，了解一下 3D 打印技術如何與藝術結合。

想香港人回憶一下童年過年的美好

由 80後本土藝術家 Angryangry 設計的作品以「花城舊事‧集體回憶」為題，將佢自小居住裕民坊的生活的一點一滴，利用3D 立體打印技術將現實及幻想實現於十個香港建築地標作品之中。 Angryangry 自問「這是一個好老掉牙的題材，不過衣食住行就係香港人最關心的議題。」但佢希望透過立體作品讓更多人記得同知道以前新年的習慣同重拾童年回憶，喚起共鳴。「我住係觀塘廿年，依家裕民坊重建咗，所以我將好多小時住的記憶投射係作品入面，好似以前係銀都戲院睇過方世玉，於是就畫方世玉個牌係銀都戲院門口，又因為我係客家人，新年會用大吉水沖涼，象徵大吉，所以就將故事放入某個單位。」

▲ Angryangry 其中一個作品以佢以前做廣告時番工的地方，鰂魚涌的濱海街為籃本，加入伴隨佢成長的紙包奶，突顯出戰後七層大厦的建築特色，亦因為佢以前經常係度搵食，所以建築物上畫滿滷水鵝、小鍋米線、湯飽、港式茶餐廳及五金店等招牌，充滿本土情懷。

▲ Angryangry著中作品中每一個細節，就好似樓梯設計成離地都有故事。原來濱海街因為近海，所以興建時離地少少，防止海水倒灌，但因為樓宇兩邊屬於唔同地產商，有道路業權爭議，如果樓梯掂到地就會俾人告，所以佢就以「要離地呀！」來點出呢個奇怪的現象。

▲ 另一個作品利用外表似新年的全盒的九龍城寨的舊樓外貌，重現 Angryangry 童年時過新年的情景。「以前舊樓可以拜神，依家新樓就無，我好懷念個陣香燭味。」

 

▲ 雖然話係新年的題材，但其中一個單位以「廿八座大王」做主題，如果聯想到同黨燒屍好似唔太吉利啊！

▲ 以前小朋友鍾意係狹小居室內舞獅賀歲，依家好似都無人會咁做了。

▲ Angryangry 記得「以前隔離有個阿伯每年係走廊放張枱寫揮春派俾街坊，覺得以前街坊街里連繫強好多。」

▲ 而馬頭角呢幾條街都有佢的特色，「我覺得同新年好夾，當中 11條街名字首以中國傳統吉祥動物命名，如：龍、鳳、鹿、麒麟（麟）、鷹、鵬、雁（鴻）、蟬、燕、馬（駿）及鶴，十分好意頭。」

▲ Angryangry 將香港唯一的圓筒形廉租屋 — 勵德村的圓形建築與點心蒸籠糅合，天台放了一籠燒賣，非常有趣。

▲ 每一家每一戶都有佢地的故事，簡單一句「喂落嚟打牌喇！」，正好喚醒了以住鄰舍之間的娛樂。

3D 模型更易令人記得細節

睇過 Angryangry 展出的 3D 作品似模似樣，原來今次係佢第一次利用 3D 立體打印技術創作。「之前做開平面設計，今次係第一次用未用過的物料同方法創作，十分有挑戰性。而且我覺得民間可以做一 D 嘢去保留建築文化，而今次的立體作品每一間屋入面都有故事，相信比起睇相會更有共嗚。」當然，因為第一次用 3D 立體打印技術，Angryangry 都出現過困難，「我的作品係喺 3D 立體打印的模型上加上紙品及輕黏土等等組合而成，但用油性筆的時間就試過唔記得噴油，搞到化晒，好彩好彩早開始，可以及早補救，唔影響展出。」因此，Angryangry 最後都無選擇用有顏色的物料直接打印，因為佢覺得「後期上油比較穩陣，就算用最普通五金鋪的 cheap cheap 油都可以上到，而且上咗油之後好多物料都可以畫上去。」

▲ 和昌大押同對上的作品有 D 唔同，唔係分開部件打印，而係一次過整件打印出來，睇落較有完整性。

▲ 雖然打印同畫數碼檔唔係 Angryangry 負責，不過佢係設計草圖都用咗唔少時間，幸好打印出來的部份都比想像中似，以致減少好多後期加工的時間。

 

簡單軟件成就集體創作

除了 Angryangry 的作品，同場亦有由 3位來自台灣的 80後藝術組合 — Fabraft 的作品。佢地的作品以「花樣年華‧集體創作」為主題，利用簡單的軟件，讓 30多位不懂 3D 繪圖的素人設計出一朶朶獨一無二的花作，更以馬拉松式 5日5夜打印及組裝成為 3D立體打印藝術花海，寄予對自己新一年的願望。成員之一的闞凱宇認為「以前無辦法 1千片花的外型都唔同，依家有了 3D Printing 就可以每一片都獨一無二，我亦希望可以藉著簡單的軟件，等唔識 Art 的朋友都可以設計，讓每個人都可以享受 3D Printing 的樂趣。」

▲  「仿生衍藝」利用了 1千片由不同人士設計的花片組合以成，因為以尼龍物料打印，所以想睇落似雲一樣軟綿綿。

科技加上手工藝的溫度

雖然說 3D 打印出來的物件每一份都大同小異，但對於闞凱宇就覺得每一份都有佢獨獨之處，「同一個檔案係製作過程中，只要加入不同的材料同改變配方都可以有唔同效果，所以就算過程中沒有用手製作，但我們都希望保留手的質感，為作品注入人情味。」

▲  另外兩樣作品都以不同的材料打印而成，左面的「會意/ Animals symbolizing」以象形文字銜接到女性姿態上，代表「文字由人創作，亦因為人慢慢轉化」，而右面的陶瓷同樣以 3D打印技術製成，縱使沒有用手製作，仍保留手的質感。

3D 打印融入家居

3D 打印唔單止走進藝術世界，就連家具都可以打印出來。同場仲展示了幾件來自青年會書院的 90後學生作品，部份作品更榮獲「2015珠港澳創客大賽」的「最佳創意銀獎」及「優秀團隊獎」，設計上絕對比得上大師級作品架！

 

 

東港城「3D打印藝術萬花園」

日期 : 2016年1月15日至2月21日 (上午10時至下午10時)

地點：東港城1樓中庭