從前，網絡世界有三位大神，Google 大神、Facebook 大神 及 維基大神（唔係王維基先生呀！），只要用啱 Keyword，佢地對網民幾乎係有求必應。年近歲晚，理應係要「還神」嘅，不過善信港女對於最近剛滿十五歲的維基大神有啲啲不滿，想藉呢個機會同佢反映一下，希望佢新一年會有更好的表現。
善信港女：「維基大神呀，你可唔可以多啲眷顧下好似我呢啲唔係幾識睇簡體字的香港人呀？」
唔知大家有冇發覺，其實都有好一段時間架喇，就係 Google 得出黎、有關維基的結果，都係預設左做簡體中文架！
除非其中一個結果係有粵語版（下圖），如果唔係無論係內容簡介定係維基百科個名，都唔會顯示繁體。
最搞笑嘅係，入到去個內容版面之後，揀左香港繁體，點知無論係內文定係側面的 Menu，有啲字係繁體有啲字係簡體，睇到我頭都大埋！
於是我唯有請教下 Google 大神，睇下有冇辦法，解決我嘅苦惱啦。原來早幾年前已經有網友遇到相同問題
，有人在討論區建議大家開返個維基帳號，然後更改設定。但 Google 大神話俾港女知，差唔多年年都有人問同樣的問題，睇黎個方法好似唔係幾有用，不過即管試下。
以上嘅方法喺各個瀏覽器上有不同的效果，我試過 Macbook Air 上的 Chrome 就得嘅，網上有人試過係 Windows 上的 Firefox 都得，但唔排除其他 Browser 有不同的效果。
有朋友就話，既然係咁麻煩，睇個陣㩒一下「台灣正體」咪得囉，使乜又特登整個帳號？可能係因為我細個個陣唔係「普教中」啦，其實「台灣正體」同「香港繁體」係用語上係有唔同架，想睇得親切啲，當然係睇「香港繁體」開心啲啦。至於點解登入前同登入後個「香港繁體」有咁大唔同，可能就要問返香港維基人喇！
維基百科充斥 AI 生成內容 編輯工作量大增