好多人話女仔唔捱得，所以好少會去搞 Startup。小編最近先同一間「全女班」嘅 Startup 做訪問，團隊中就有四位各有個性嘅靚女，有事業型女強人、有媽媽級、有背包旅人、仲有愛心爆棚嘅寵物主人，呢幾位美女走埋一齊並無變成一個墟，反而因為佢哋各有所長，憑佢地唔同嘅經驗，造就咗佢地嘅產品，全球定位追蹤器－TAG。
嗱嗱嗱，唔好諗錯隔離，個追蹤器並唔係用嚟放喺老公 /男朋友身上，check 住佢去咗邊嘅（當然如果你有呢個需要，你可以咁用啦，哈!）佢哋幾位話 TAG 係俾你掛喺個小朋友 / 老人家 / 寵物甚至行李上面，萬一唔見咗，只需要開個 App，就算離開咗香港都可以搵得到!
TAG 內置咗一張可以漫遊嘅 SIM 卡，原理就好似 Wi－Fi 蛋咁世界通行，買咗佢就會自動生效一年，之後就會收取月費。而 TAG 裝置同時運用咗 GPS 同 GLONASS 定位系統，令準確度縮窄至只有 5 米範圍內，令搵人、搵動物難度大大降低。用家仲可以喺隻 App 入面預設地理範圍（Geo-Fence），當裝置進入或離開預設範圍，就會通知用戶。例如，小朋友返幼稚園，你放個 TAG 入去書包度，當佢進入同離開學校範圍，或者返到屋企都會通知你，做家長嘅就安心晒啦。
除咗定位呢個基本功能之外，TAG 最特別就係可以偵測跌倒，同埋有「平安鐘」功能。裝置內嘅速度計可以用來偵測使用者嘅行動，例如老人家唔小心跌倒，而 TAG 專用嘅 App 就會彈出通知話你聽佢可能跌親喇。至於裝置上嘅按鈕，就可以俾長者當「平安鐘」用，按一吓個 App 就會彈出通知，長按 3 秒就會 Send SMS 去你預設嘅電話號碼，簡單嘅操作非常適合長者使用。不過有一點要留意，定位嘅用電量都好大，如果長期開住個 App 搵裝置會好快冇電，只可以用到一日左右；而如果唔長開 App 嘅話，就可以用到 7 至 10 日。
私隱公署：數碼港資料外洩涉 5 項違規缺失 逾保留期限仍未刪除
女仔當然係貪靚啦，所以四位美女創辦人為 TAG 呢個裝置設計咗「衫仔」，除咗有唔同顏色嘅外殼同款式，仲有得俾你夾住用、掛住用等等，女仔用又得，小朋友用又得，得咗！
TAG 係數碼港培育計劃成員之一，因為睇準數碼港有良好嘅市場推廣支援，有助佢哋衝出國際而加入。除此之外，佢哋早前喺 Indiegogo 亦推行咗一個集資嘅專案，務求將佢哋嘅產品帶到更多市場，現時佢哋已經達到咗集資目標，預計會喺今年四月面世，有興趣嘅讀者可以去 Back 返個試用吓！
私隱公署：數碼港資料外洩涉 5 項違規缺失 逾保留期限仍未刪除
