仲有幾日就過年，我諗大家都一定會諗起：「又要同啲姨媽姑姐打交道，救命！」早兩日港女同同事傾計，講起「稱謂」的問題，有個靚靚同事話自己咁後生已經做左人地「姨婆」，又有同事話自己有個 BB 舅父，真係笑死我。
港女屋企係個大家庭，本來就對呢啲稱呼見慣不怪，雖然一年先見得啲親戚一兩次，但從小就接受訓練嘅我已經對於呢啲稱呼瞭如指掌，一係唔叫，否則好少會叫錯人。所以港女仲好記得小學一年班的常識科就要學識搞清楚的親戚關係，個陣我好快就上手，因為我屋企人仲多仲複雜呀！
後來大個左先發現，原來唔係個個人屋企都有咁多人，不少朋友係唔會有齊「親戚關係表」入面個啲親戚。不過隨住年紀愈來愈大，會有新稱呼出現，人會突然「升呢」，輩分會愈來愈高，例如本來全屋最細係你，個個錫到你燶，當你「升格」做左家姐阿哥，身份即刻唔同左。年紀再大少少，表哥表姐開始結婚生仔，自己就做左表姨表舅父……
隨住時代的改變，因為成本太大，加上社會環境日益惡劣，而家的人好多都選擇唔生仔，家庭愈來愈細，加上文化變遷，大家趨向「唔好咁麻煩啦，嗌名得啦」～不過有啲人仍然會保持向長輩打招呼要嗌稱號呢個「禮貌」，如果大家都遇上呢啲麻煩，唔緊要！竟然有個 App 可以幫到你：《姨媽姑姐－家族稱謂計算機》App。
iOS: https://goo.gl/dKOFnL
Google Play: https://goo.gl/uq8CWu
Microsoft: https://goo.gl/b31mk1
只要在「計算機」上輸入關係，稱謂就會自動「計算」出來。不過不同地方其實稱謂會略有不同，例如中港台對「爸爸的媽媽」的稱呼：奶奶、嫲嫲、阿嫲， 就有少少分別喇，大家要留意喔。
話時話，你準備好點樣應對幾日後開始的親戚「噓寒問暖」攻勢未？（笑）