免費搭纜車！昂坪 360 再推港人優惠

又到 3月，唔少公司都會發佈上年的業績，昂坪 360 都唔例外，更表示上年的訪客量由 2014年的 183萬下降至 2015年 162萬，跌幅達 11%。當中歐美及亞洲客佔 50%，其次是內地及澳門佔29%，而港人佔21%。有見及此，昂坪 360 將會係今年推出多款港人優惠，抵唔抵就依家話俾你知啦！

生日優惠免費來回

海洋公園有生日免費入場就幾乎個個都知，原來昂坪360 生日都有得免費乘坐昂坪纜車標準車廂來回一次。兩個一去變相買一送一，都幾抵。如果啱遇著保養及維修日，壽星可以係生日月份內，另選其他日子乘搭。

小朋友 $1 搭纜車

如果一家大細可以揀 3 月 21 日至 5 月 15 日去搭，是關每位購買正價標準車廂車票或購買正價 360 娛樂套票 (標準車廂) 的成年人都可以加 $1 帶一個 3 至 11 歲1小童乘搭相同款式的昂坪纜車車廂或享用所購同款式的 360 娛樂套票。

老友記 1人價錢  4人行

邊個話 4個人一定要打麻雀，只要你夠 65 歲或以上，只要係 6 月期間 (星期六、日及公眾假期除外)，以正價購買一張纜車車票，就可以免費帶同 3 個「老友記」乘搭昂坪纜車。湊夠腳，就可以平平地一同舒展身心、展現活力啦！