3 月 3 日先係香港上映嘅《埃及神戰》，早被外國各大影評人插到上天花，劣評如潮（結果導演 Alex Proyas 就係日前於社交網站上大罵影評人「無品味」同「白痴」，Alex 反擊原文請按此）；即使如此並無阻佢係香港上映首日票房 No.1 。小編就抱住入場觀摩嘅心態，睇下到底係影評人真係白痴無品味定真係 Alex Proyas 電影水準不及。
故事講述凡人同神本來一齊和平生活，直到殘暴嘅沙漠神塞特用詭計戰勝咗天空之神荷魯斯，人神從此分隔。塞特更奪走荷魯斯的雙眼，令佢失去神力。凡人神偷貝克為拯救被塞特手下所殺嘅女朋友 Zaya ，以及阻止塞特殘酷統治人間，決心同荷魯斯並肩作戰重奪神眼，同塞特嘅各個手下惡鬥，勢要逆轉凡人命運！
故事一開始就直用旁白講故仔，雖無新意但尚算清晰易明；不過故仔鋪陳做得麻麻，急急入故事主線其實亦見只係為賣 CG 效果，成個劇情走向非常平淡，故事元素都係一啲可以預見嘅如沙漠神塞特嘅手下幾次襲擊。其實小編入場前就已經對呢類故事嘅內涵無太大期望，但電影嘅敘事手段的確過於簡陋，情節又係啲用到爛嘅元素構成，為成套戲扣分不少。
其實會入場睇《埃及神戰》，相信都係為咗睇佢嘅 CG 效果而唔係上面所講嘅故事情節吧。不過即使只講 CG 效果，《埃及神戰》一樣做得唔夠出色。花咗 1.4 億去製作，以電影後製嚟講絕對唔係細數字，但場景同人物太過假嘅情況仍然明顯。雖然係咁，小編覺得要比小小同情分《埃及神戰》：皆因成個故事都係講神同古埃及，本身就無現實場景需要靠 CG 去營造，而且仲有各式各樣嘅神，佢地變身同打鬥嘅 CG 都係全身同佔咗電影好大部分，所以成本一啲都唔低係正常的。不過就觀眾角度去睇的話，的確有好大嘅進步空間（小編睇完先明點解有人話「不如轉做動畫好過」XD）。
既然要講到古埃及神，最忌嘅就係 Hollywood 大戲最常出現嘅通病，就係選角多為白人。今次五位男女主角，凡人 Bek ﹑ Zaya ﹑ 沙漠神 Sat ﹑ 情愛神 Hathor 以及天空神 Horus ，五位皆為白人；而且其他神中只有智慧神 Thoth 係由黑人 Chadwick Boseman 飾演，亦無其他種族演員，更別提古埃及常見嘅中東人種。雖然大家都知呢類戲係 sell CG 而唔係真實咁還原當時故事（更何況《埃及神戰》係虛構），但難免會被觀眾同影評人詬病。
其實係咪真係各個外國影評人「無品味」同「白痴」呢？小編則覺得唔係。當劣評佔咗絕大多數嘅時候，電影嘅問題就絕對唔再係某個觀眾嘅個人主觀感受。《埃及神戰》無論係故事抑或選角上，甚至到最重要嘅環節 CG 效果上，其實都見到今次電影嘅唔成熟。即使呢類戲一向不乏鍾意睇 CG 娛樂效果嘅觀眾支持，但《埃及神戰》至今全球票房只有 3 億 1400 萬港元（記住記住， 1.4 億製作係講緊美元，換算後係約 10.9 億港元），相信各位觀眾仍然係理智的。至於票房，小編相信再點樣力挽狂瀾，亦難以扭轉劣勢 lol 。