依莉詩：「唇彩變得唔笠又貼伏」— LIPLU溫感美唇器評測

2016-03-08

Published by

依莉詩

最近煲韓套煲上癮，見住《太陽的後裔》入面的宋慧喬嘴唇脹卜卜，難怪宋仲基會咁鍾意。奈何天氣時冷時熱，嘴唇無皮脂膜保護，容易乾燥出現唇紋，甚至甩皮，可以點算呢？今日我依莉詩就同大家試下 LIPLU 新推出的溫感美唇器套裝，睇下係咪可以做到豐潤雙唇效果先！

充滿保濕成份的美唇精華

要做到豐潤雙唇效果，套裝最先有一支美唇精華，而當中融合了維他命C衍生物、多基麩酸（PGA）及麥蘆卡蜂蜜，睇落有 D 似唇彩、淡粉紅色，唔會太油太笠，做到保濕的效果之餘，半小時內都可以維持雙唇水嫩光澤。雖然唔似潤唇膏咁有香味，不過入口苦中帶甜，咁就唔怕誤吞得太多精華而不自知。

▲ 溫感美唇器套裝入面包括一支美唇精華同一支溫感美唇器，桃紅配黑的包裝突顯性感。

▲ 美唇精華有 9mL 同普通唇彩的 size 差唔多。

▲ 精華唔會太油太笠，而且都幾水潤同保濕。

細細支溫感美唇器

至於溫感美唇器其實就好似一支唇膏型的導入棒，導頭的斜角設計就好似唇膏一樣，所以手勢同都平時塗唇膏一樣，非常方便。而美唇器使用溫感同微電流令保濕精華深層滲透到唇中，令雙唇增加水嫩感。導頭大約 42℃左右，用落暖暖地都幾舒服，開啟後 2分鐘會自動停止，唔怕用得太耐。

▲ 溫感美唇器其實就好似一支唇膏型的導入棒，非常輕巧。

▲ 導頭的斜角設計同唇膏一樣，所以手勢同都平時塗唇膏差唔多。

▲ 只要用一粒 AAA電，可以隨身攜帶。

兩種護理模式令唇彩更貼服

美唇器有兩個模式，按一下紅色LED燈亮起就係簡單護理模式，只要塗抹美唇精華或潤唇膏後，再用 2分鐘溫感功能，就可以令唇膏、唇彩更貼服持久。而按兩下藍色LED燈亮起就係深層按摩模式，同樣塗抹美唇精華或潤唇膏後，再用 2分鐘，美唇器會發出微溫同微電流，使保濕精華深層滲透到唇部肌膚之中。而我分別用過兩個模式，其實分別都唔算大，不過用完之後精華又真係無咁笠同睇落貼服咗。

▲ 紅色LED燈亮起就係簡單護理模式，只會發出微溫，令唇膏、唇彩更貼服持久。

▲ 藍色LED燈亮係深層按摩模式，同時會發出微溫同微電流，使保濕精華深層滲透到唇部肌膚之中。