零食迷期待已久的香港第一間 卡樂 B 專門店終於開幕啦！唔單止有多款日本直送的薯零食，現場仲有即叫即炸的薯片添！我依莉詩當然第一時間去試啦 !
兩層高的「薯」專門店
Calbee Plus 係日本已經有 10間店，而今次呢間係第一間海外分店，分上下兩層，上層係零食體驗工作坊，下層係體驗店，可以透過透明玻璃，睇到薯片及薯條的生產過程，而另一邊放滿日本直送限定零食 同 限量版卡通精品。無論即食定買返屋企都顧及到，鍾意薯仔的朋友去到應該好興奮。
▲ 一入到去有動畫短片介紹薯片的誕生過程，等緊鮮炸薯片的時候可以睇下解悶。
▲ 入到去好似比薯仔包圍，天花的裝飾都係一片片的薯片。
▲ 店面其實唔多大，如果多人的時候都幾逼。
即炸薯片夠熱又夠脆
一包包的薯片食得多，鮮炸嘅又有咩唔同？呢度就有即叫即炸的 波浪型、平切薯片 同 薯條 可以揀，仲可以配合埋唔同的味粉、芝士或朱古力醬，甚至揀埋日本3.5生乳軟雪糕都得。從透明玻璃開放式廚房，近距離望一個個薯仔變成手上的零食，有趣之餘，仲熱辣辣香噴噴，真係食唔停口。
▲ 廚師將一籃籃的薯片放入高溫油炸。
▲ 再經過輸送帶去到大碗，等待另一個廚師加上調味料。
▲ 唔洗十分鐘就變成一杯杯的美食啦！
▲ 除咗原味，可以加朱古力醬或雪糕，甜中帶鹹，非常特別！
▲ 如果唔想食薯片，可以揀 3.5生乳軟雪糕。不過牛奶味唔太濃，我都係覺得配薯片食比較合適。
▲價格方面同旺角 D 街頭小食差唔多，加味粉就 $29、加醬料就 $32、加埋雪糕就 $38，偶然經過食一次半次都唔過份。
依莉詩小食評
我今次揀咗香港限定的避風塘香辣味平切薯片、朱古力醬加軟雪糕薯片 同 日本人氣No.1的 Poterico芝士味薯條。避風塘香辣味薯片其實同包裝的分別不大，味道亦有 D 似之前包裝的新加坡香辣螃蟹味薯片，只係淡少少同無咁辣。相反朱古力醬加軟雪糕薯片就好特別，熱辣辣的薯片加埋軟雪糕一冷一熱，朱古力醬同薯片又一鹹一甜，絕對刺激你的味蕾！至於芝士味薯條我覺得係最特出到即炸同杯裝的分別，薯條熱辣辣，外脆內軟，仲有淡淡芝士味，多重口感。
獨家日本直送零食
除咗即炸的薯片同薯條，店內仲有多款日本直送的卡樂 B 零食同 “美味”及“樂趣” 兩個副牌的零食，大部份係普通超市同便利店都買唔到，而且價格都唔會特別貴，零食迷應該會忍唔到手，一袋二袋咁走。
▲黑糖味薯條睇到都覺得好特別。
▲ 超市經常見到一杯杯的薯條，而呢款一包就有齊白薯、紅薯 同 紫薯，薯味各有深淺，但一樣咁脆。
▲ 左面係香港優先發售的櫻花蝦味薯片，右面係栗黃金番薯條，兩款都好好味呢！
萌爆造型限量版精品
唔止有食得的，Calbee Plus店仲出售之多款圓碌碌的宅卡 B 卡通代言人 Potta 同 萌爆長頸鹿 Jagarico 的主題精品。除了小朋友至愛之迷你掛飾、女生必買之可愛毛公仔、及文儀用品等，香港概念店更獨家推出 500架宅卡B珍藏版迷你巴士模型，唔買嘢食都要 shop 下！
▲宅卡 B 卡通代言人 Potta 的精品超得意！
▲ 宅卡B珍藏版迷你巴士模型限量 500架，儲開巴士模型的朋友唔可以錯過。
▲ 另外仲有透明的薯條仔，半透明好可愛啊！
依莉詩：「鮮炸薯片夠薄夠脆」
平時買卡樂 B 都係係超市或者便利店買，估唔到今次竟然有間 shop ，而最正就係有即叫即炸的薯片賣，夠晒新鮮，唔會有「油膉味」。至於價錢方面，同包裝薯片差 3-4倍左右， 但就大約同街頭小食差唔多，都係 $30左右有交易，即炸嚟講唔算太貴。另外，日本直送的零食同精品都好特別，其他地方都買唔到，零食迷一定要去睇下。
Okashi Galleria x Calbee Plus
地址：香港灣仔皇后大道東200號利東街地下G14-15號 (合和中心對面)
營業時間：(星期一至日) 10:00am – 10:00pm
