最近有條影片大熱，是一位女性跟朋友胸部交換的影片，其實當中使用了 AR 技術，一時讓此技術玩意再度炒熱，unwire 教過各位玩 VR ，今次教各位玩 AR ! 現時無論你係 iOS 定 Android 用家都可以嫁
AR 是甚麼?
其實 AR 是甚麼？簡單來說就是即時計算，將畫面加入一些特效，以下的變臉影片就是現時人們瘋狂愛玩的一種 AR
最方便方案 : Sony Xperia Z5 / Z5P
可能各位 wire 民看完片，心裡面已經在想問是甚麼 App ? 其實一早有手機公司在幾年前已經大玩 VR，當唔少手機品牌現時只停留在新機都會標榜鏡頭幾咁靚、影夜景連粒星都睇到，當然鏡頭質素確實重要時候，Sony 旗下 Xperia 系列已經由 Z1 開始，就已經內建 AR 拍攝功能，為相片加入唔同效果，由卡通、文字以至化妝舞會都有，用家無需再左搵右搵唔同 Apps。近期推出的 Xperia Z5，相機功能內便已內建 AR 效果、AR 面具和 AR 趣拍功能，更可以透過 Play Store 下載更多不同得意貼圖。
AR 效果
當中包含了三個有趣主題，分別是「童話故事」、「海洋探索」和「恐龍世紀」，選取後即可同童話故事內的小矮人或恐龍合照，更可以自行移動或放大各個物件。至於「化妝舞會」則可即時為大家進行變身，化身為小丑又得，加個可愛動物頭亦得，更會自動追蹤頭部移動，反應速度亦較以往快。
AR 面具
如果想即時化身為其他人或動物，就必定要試 AR 面具特效，只要對準鏡頭，再選取想化身的人或動物，程式就會自動幫大家 Key 個樣落去，更會隨住大家面部動作例如大笑而作出變化。呢個特效用落效果明顯反應算快，基本上無論 Key 人或動物，仲可完美配合不同人的面形，可以話完成度相當高，不過用的時候就要注意一下角度和頭部入鏡比例。
AR 趣拍
同朋友聚會少不免會影好多相留念，如果想為相片加入唔同得意效果或趣怪文字，就可以試下用 AR 趣拍呢個功能，可以加唔同有趣的圖案例如生果、星星圖案甚至是炸彈等等，大家仲可以隨意在畫面上塗鴉或寫字。呢個效果其實用在拍片會更為有趣，因為唔少特效都係一出即逝，要用相片捕捉相對上會比較困難。
其他手機又想玩 VR?
同朋友即時「反」面 – FaceSwap
改頭換面既 Apps 真係唔少，但好多時都要先影相後再執，如果可以即時同朋友換面就更好玩，就算唔影相即時笑下都好。
Face Swap Live
平台：iOS（下載）
呢隻 App 既賣點除了可以 Key 公仔之外，當中既即時換面功能更加好玩，只要同朋友頭貼頭，軟件就會自動 Detect 人面位置同即時「反」面，整體效果流暢之餘仲好 Match 添。
Real Time Face Swap
平台：Android（下載）
至於呢隻 App 所提供既功能就比較單一，只係可以做到即時人面轉換，而且流暢度同準確程度都比不上 iOS 版的 Face Swap Live。Face Swap Live 宣稱 Android 版本好快就會推出，各位 Android 用家暫時就用住呢隻玩下先。
其他 AR 換臉作品: 
動物卡通陪你影
想同恐龍呢種絕種生物合照？又或者女士們想攬住公仔影相？現時隨時隨地都可以實現你既夢想，拎起手機揀選想合照的人物或圖案，放個靚位同擺個靚 Pose，一張靚相就即時 Save 係手機，仲可以即時上傳到 Facebook 或 ig。
3Dイラスト AR
平台：iOS（下載）
內建已經有 16 種不同的 3D 模型可以直接選用，仲可以從網上下載更加多不同物件，只要調整物件的大小、位置及旋轉至合適角度，就算要同恐龍大合照都話咁易。呢款 App 特別在於物件大小位置可以隨意擺，但每個類別只有一種模型就太少。
Augment – 3D Augmented Reality
平台：Android（下載）
呢款 App 原本設計上是為了方便設計者把物品 3D 實體化供人參考，但當中亦不乏得意有趣的 3D 模型適合影相玩。賣點在於有大量用家上載不同模型，部份更加十分細緻仲識得郁添。
扮鬼扮馬化妝舞會
覺得平時影相太過單調？唔想化妝又想扮鬼扮馬？無論你用 iPhone 定 Android，只要裝個 App 就想點扮都得，唔洗俾錢之餘仲唔洗等，唔啱揀到啱，實有一款啱你口味。
Augmented Reality : Glamour
平台：iOS（下載）
好多時影相 Apps 都只可以用內建預設既公仔圖案，但始終未必每個人都啱心水，至於呢款 App 既特點在於所有用作變身既相片，都可以用 Browser 搵，揀啱之後再影相就攪掂。可以上網搵相最大好處當然係想點玩都得，缺點就係如果無得上網，呢隻 App 就變得無乜用。
Insta Face Changer Pro
平台：Android（下載）
想得閒扮鬼扮馬影下相，呢隻 App 就可以幫到你，影完相只要 Mark 返眼、鼻同嘴既位置，之後揀返想變成既動物，隻 App 就可以幫大家即時變身，除左相之外，仲可以加個動物頭變做 GIF。佢呢款 App 雖然得動物樣可以揀，但用落變身速度快效果又明顯，仲可以做 GIF 真係幾好玩。
初音 3D 演唱會
各位 wire 民身邊都可能會有鐘意初音既朋友，唔少人仲可能會專登搭飛機過日本睇初音演唱會添。初音演唱會其實都係用 VR 技術，雖然大家都只係聽虛擬初音唱歌，但一樣如痴如醉，而家只要一機在手，就可以隨時睇初音邊唱歌邊跳舞。
初音ミクAR
平台：iOS（下載）
只要開左個 App 再揀選初音就會即時載歌載舞，大家可以對初音進行縮放，除了可以聽歌之外，仲可以同初音一齊影相添。呢款 App 用落由於只係得 3 個造型同 3 首歌可以揀，對於初音迷來說未免太少。
AR Concert with Miku
平台：Android（下載）
各位初音迷如果用 Android 機就有褔，因為呢款 App 入面收錄左唔少初音歌，只要選擇特定位置之後，初音造型公仔就會即時浮現，仲會跟住手機移動角度而轉變，最重要是除左影相之外，仲可以拍埋片，真係要同初音邊唱邊跳都無問題。
分享到 :
最新影片
