天氣開始回暖，廿幾度的天氣就最適合郊遊。我依莉詩就連續幾個假日去咗深水埗，嘗試係鬧市中尋找浪漫的春日氣息。如果想係戶外 hea 又擔心車程遠或者唔夠體力的話，不妨去呢幾個地方走一趟啊！
南昌公園遠離深水埗中心區，由深水埗地鐵站行過去需要 20分鐘左右，就好似城市中的一片綠洲。除了有兒童遊樂場外，更設有面積 20,000平方米的大型草坪，係香港所有公園之中最大，大家可以係草地上野餐、玩下吹吹泡，過寫寫的一日。另外，每年 3月公園中央的 30棵黃花風鈴木會盛放，變成黃金道路，吸引數以百計遊人到場賞花，係影相、寫生的好地方。
▲ 本來每年 3月都係黃花風鈴木的花期，南昌公園的 30棵黃花風鈴木盛放，會令公園變成黃金道路。不過依我連續兩星期觀察 (2/4,9/4)，今年的花遲遲未開，每棵樹只有數朵黃花。亦因為咁，遊人唔算多，可以輕輕鬆鬆咁坐係大草地上賞下花，休息下。
▲ 花樹的兩旁係香港所有公園之中最大的草地，不但可以一邊野餐一邊賞花，仲可以一齊睇書、傾計，輕鬆自在。
▲ 雖然花唔算多，但因為落過一兩陣驟雨令不少花掉到地上，唔少人都會用散落的花瓣砌出圖案影相呢！
南昌公園
交通：港鐵南昌站 D1 出口 (深水埗深旺道 20號)
係南昌公園的另一端，深水埗同石峽尾之間有一座小山丘，亦係著名的拍拖勝地。嘉頓山又名窩仔山、喃嘸山或水庫山，但因為係山下的嘉頓麵包廠，所以大家都叫佢嘉頓山。雖然山上可以逗留的位置唔多，可能坐 3-4 對情侶已經好逼，不過因為登山只需要 6-10分鐘，已經都係樓梯，非常易行，適合平日疏於運動又想欣賞日落同夜景的我們。坐係山上一邊俯瞰九龍區的舊式建築，一邊談心，都係一個唔錯的地方。
▲ 由美荷樓行樓梯上去大約只需要 6-10分鐘的路程，適合即興的人，想係都市中出走半天。
基本上全程由山腳到目的地，大約只需要6-10分鐘的路程，而雨後天清有少量雲層的天空拍出來更美。由於該路段沒有街燈，不建議自行前往，當然也建議準備好電筒以便下山時使用。此外山上是沒有廁所提供及任何補給，故此必須有完善的準備才好上山，而且黃昏時間的夏天比較多蚊子，蚊怕水當然也是必需品吧。
▲ 如果想拍到日落美景，最好選擇日落前一小時上山，我今次用天文台的 Apps 查到 6點半日落，所以大約在 5點半開始上山。不過因此山上沒有街燈，所以落山記得帶電筒啊！
嘉頓山
交通：深水埗站D2出口再沿美荷樓旁邊的通道上山
Hea 完都應該肚餓，係時候番到去深水埗中心區醫肚。呢間瑰花甜戀愛甜品屋其實係以前同音的甜品店「貴花甜」的延續，上年 12尾重新裝修後以新形象示人。雖然呢間的甜品質素同服務態度都一般，不過勝在食氣氛。店內的裝修佈置充滿復古的味道，而牆上裝有兩個鐵架同留影牆，可以俾情侶一齊扣上愛情鎖同貼上即影即有，讓這裡成為兩個人的老地方。
▲ 復古唱片機播放著一首首情歌，令氣氛更浪漫。
▲ 位坐旁邊放著一本本的舊漫畫，係唔少 8、90後的回憶。
▲ 牆身貼上「我的少女時代」的對白，簡單，但觸及少女的心情。
▲ 店內有即影即有服務，可以叫店內幫手拍照，不過我去的時候，店員的態度不太好，所以無影啦。
▲ 今次我點了兩個甜品，滾蛋兵團有布甸、焦糖燉蛋 同 雪糕， $38 唔算太貴，不過味道就一般般，特別個布甸唔滑，而且無乜味。
▲ 另外點了皇牌酒心朱古力心太軟伴玫瑰花乾雪糕， $46 都係一般價位，心太軟有少少酒味，味道都唔差。
瑰花甜戀愛甜品屋
地址：香港深水埗福華街120號地鋪（D2出口，CSL右轉）
查詢：23989499
另一間的特色甜品店以原個椰皇裝的甜品做賣點，冬天食非常窩心，夏天食清甜解渴。此外，門口設有免費的朱古力噴泉同冰凍果茶比大家食，係等緊甜品的時間可以拮下提供的水果，一齊玩下啊！
▲ 免費的朱古力噴泉係自助形式，大家可以拎起提供的棉花糖、手指餅或水果任玩任試，好好玩呢！
▲ 同瑰花甜一樣，呢度有一張小型的留影牆，而且提供一埋 pops 俾大家影相用，非常細心。
▲ 同樣，兩個人點了兩個甜品，小矮人分子蜂蜜椰皇珠 ，以原個椰皇上 $42 唔算太貴，而且蜂蜜造成的珠珠非常清甜，加上焦糖布甸椰青水，三者配合得好好，質感順滑又有層次，每隔一段時間我都會再想去食。
▲ 分子啡布甸椰皇子 ($39)，同小矮人分子蜂蜜椰皇珠差唔多，不過就由蜂蜜珠珠轉成咖啡啫喱，多了一種咖啡味，又是另一種配搭。
甜入心
地址：九龍深水埗福榮街57號文昌閣地下B
查詢：2668 0748
係西九龍中心其實好多又平又好食的食店，但我就對呢間 Cafe 360 情有獨鍾，計計埋埋都食咗好幾次了。呢度坐得舒服而且價格合理，眼見有唔少情侶同一家大細去架！D店員服務態度都好好，有次見佢地送小禮物俾一個好嘈的小朋友，仲變魔術比佢睇添！至於食物的選擇雖然唔多，不過都有 All Day Breakfast 、粉麵飯 同 窩夫，而且大部份套餐有齊湯、飲品、主食同甜品，食完會好滿足。加上大部份都係新鮮即整，特別係炸豬扒同酥皮湯，好鬆脆架！
▲ 牆身有很多可愛的牆畫，聽聞全部都係人手續筆續筆好比心機咁繪畫上去，非常有心思。
▲ 每一個餐都好似好多野食咁，呢個就有蟹籽蟹棒芝麻醬柚子冷意粉 + 比利時窩夫 + 京都抹茶牛奶 ($62)，意粉味道非常清新，非常開胃，而熱的抹茶牛奶都好有抹茶味，適合夏天食。
▲ 呢個餐就有珍寶吉列豬扒配意大利蕃茄湯螺絲粉 + 韓式年糕粒粒紅豆冰 + 特選甜品 ($58)，豬扒新鮮即炸，唔油又好鬆脆，配合蕃茄湯同樣開胃。
Cafe 360
地址：深水埗欽州街 37K 西九龍中心 6 樓 622-623、625 舖
查詢：2761 1328