成功打入多個國際影展嘅新加坡導演邱金海所執導嘅《無限春光 27 》,終將係今個月尾 4 月 21 日係香港上映。呢部情色作品並唔係導演嘅第一次嘗試,早係 97 年導演就做過題材同敘述手法都相似嘅《十二樓》,雖然小編並無睇過,不過有唔少聲音都話今次《無限春光 27 》水準並不及過去嘅《十二樓》;既然已經有唔少人做過比較,小編就以第一次觀賞導演邱金海作品嘅角色去睇下,到底《無限春光 27 》屬好屬壞。
電影講述六個以不同時代為背景、但發生係同一個酒店房間,因性與愛而連繫起來嘅故事。由第一段日佔時期一段同志愛情故事講起,再到五六十年代的第二 ﹑ 三段故事,講述從事脫衣舞孃的蘭姐認為女性應比男性更有主導權,展現女性主義的抬頭;以及第三段的毒品派對,充斥著酒精﹑性﹑音樂,加上格格不入的空虛 Damien 吸入毒品過多死亡。第四段則走到七十年代,講述全亞洲首次的變性手術前,Noi 和他的同性戀人 An 對於手術的掙扎;第五段和第六段則分別是八十和九十年代,男子 Boon 與人妻真理子發生的婚外情以及男孩明俊陪同女孩秀媛來到散心以忘掉前男友。
六段故事以 Damien 的靈魂徘徊在酒店房 27 去串連著,不過 Damien 係第三個故事先出現,而一開頭 Damien 已經出現係荒廢嘅酒店中,再突然插入兩段佢未有份參與嘅故仔,令到頭兩個故仔變得突兀。雖然如此,但由何超儀飾演嘅脫衣舞孃故事亦係小編整部電影最愛故事。除咗因為係電影中唯一嘅歡樂故事外,亦都見到一啲舊時香港電影嘅影子。可惜始終就整體而言,六段故事難以串連起來變得鬆散,令到電影缺乏電影感,引起嘅問題會比想像中大。
電影感鬆散會引起最大嘅問題當然就係:「六個故事連埋一齊到底想表達乜主題?」其實導演係想藉著呢六個「性」與「愛」嘅故事去側看新加坡嘅社會變化。從日佔時期即四十年代,每個故事代表一個十年,一直說到九十年代,看著新加坡人對於性愛觀念之間嘅轉變。六個故事包含著不同性傾向,甚至有變性人題材,而且每個故事拍出來都的確幾有外國優秀嘅獨立電影水準同味道,但當將六個故事放在一起就係另一回事:不但難以「側看社會變化」,主題感覺亦非常模糊。
雖然六個故事較鬆散,對主題闡述較弱,但若將其中某啲故事獨立起來睇,其實亦非不堪。當中包括係上文提及嘅何超儀所飾演脫衣舞孃嘅第二個故仔,較為跳脫嘅呢段更加係預告中最常出現片段嘅故仔(所以小編有啲覺得比預告 fake 咗)。
要數可看性高,除咗脫衣舞孃嘅故事外,當然就係由 AV 女優西野翔同大馬靚仔模特王冠逸嘅婚外情故仔,呢個故事更加係貫穿到片尾最後。西野翔飾演一個來自日子嘅女子,係 27 號房同新加坡男孩 Boon 發生關係,但其後 Boon 慢慢發現真理子已婚,而且並唔願意為 Boon 放棄婚姻,大概係因為老公能夠提供更好嘅物質生活比佢。真理子呢個角色由自信且撩人心弦,再到離開 Boon 後在房外哭泣,以及最後片尾滿佈皺紋的和與 Boon 一模一樣的機械人在床上的模樣,明顯導演為這個角色的人物性格下了點功夫,而西野翔卻又驚人地勝任。
總的來說,其實觀眾若將這部電影視作六部短片去睇,其實每個故事水平都相當唔錯,以亞洲水平來說蠻高的;但當六部短片組合起來成一部完整電影時,每段短片沒頭沒尾的狀態和較牽強的連接令到電影感非常鬆散,對於其主題「側看新加坡近年社會變化」闡述更是顯得乏力。亦因主題感覺模糊,大量的「愛情動作」場面亦因此變得給人庸俗的感覺,與導演上一部相似題材作品《 12 樓》水準亦有所相差。