早前依莉詩借咗部 PocketScan 迷你掃瞄器返嚟，趁住部機未還，我就立即用嚟玩下喇。到底呢部係咪美容產品呢？原來唔係！
呢部機其實係一部流動 Scanner 嚟嘅，使用方法好簡單，只需要以手機用藍牙連接 Scanner ，一按佢上面個掣︳佢就識得自己掃描，你可以好似髹漆咁，係你要 Scan 嘅平面上不斷髹，咁佢就會將圖像掃瞄入你手機果度，事後幫你自動校正返個位置，其實個功能都係好方便嘅，唔怪得 KickStarter 咁快就集到資啦！
▲ Pocket Scan 嘅正面同埋底部，佢底部個掃瞄器同平日所見嘅差唔多。
首先，睇下佢 Scan 平面嘅功能先啦！我哋試咗幾樣功能，首先我哋試咗一啲平面嘅嘢先：
▲ 可以見到 Scan 平面嘢係比較準確，而且佢可以幫你用 OCR 處理返啲文字，變成可以係電腦/手機編輯。
▲ 咁中文又點？中文都 Scan 到嘅，不過係 OCR 無咁準確…
▲ 即使係好大本嘅畫冊，都掃瞄到，我估佢可以 Scan 到差不多 F4 Size 嘅紙張。
正經嘅嘢試完，我哋試第二啲。第一時間試下依莉詩個額頭先，佢話驚見到晒啲毛孔好核突：
▲ 左同右嘅對比：完全睇唔到毛孔，因為佢啲頭髮遮住晒。同埋，佢額頭太細根本就唔夠面積俾佢 Scan…
之後我哋 Scan 條魚，因為見到依莉詩就嚟煮飯，枱面擺咗條魚：
▲Scan 完出嚟，似係小小成功，睇到佢個形狀，但都係「岩岩蠶蠶」咁，因為條魚算係個面積大小小，又比較平。
Scan 完條魚，Scan 返啲正常啲嘅嘢，小編天恩話想試下 Scan 掌紋睇相，我哋就成全佢：
▲其實佢係 Scan 得幾清晰的，不過係因為唔夠大俾佢郁，所以唔能夠完整 Scan 入去。下次睇掌可以唔使面談了，直接 Scan 咗個掌紋佢俾玲玲師傅喇！
出賣完同事，最尾都逃唔過「被出賣」嘅命運：我要 Scan 自己塊面…
▲ 哇…好核突呀啲毛孔呀鬚根呀出晒嚟，正面啲睇，佢嘅解析力都唔差，負面啲睇，佢唔能夠還原返做一個立體咁上下的樣子出嚟
雖然話，佢係一個 Portable 嘅 Scanner ，但係始終受限於佢嘅物理性質，佢始終都係做唔到立體掃瞄咁嘅效果。對商務人士嚟講，的確係方便咗，市面有好多唔同嘅手機 App，但係 OCR 功能都未必做到好多語言，呢隻都令我有少少失望，就係佢中文方面嘅 OCR 做唔到，希望佢遲啲改進到就好喇！