愈來愈多 Party Room 係工廠區開業，唔少都以家的感覺做招徠，但最近依莉詩就發現到一間另類的 Party Room，不但以科幻做主題，所有裝修都由舞台道具師製作，場景栩栩如生。不過萬萬都估唔到負責人原來係 3個「嬌的的」女生。
最近因為想搞 Party ，於是就上網搵資料，竟然俾我搵到這間以龍同 Steampunk 為主題的 Party Room。經過幾句的訊息聯絡之後，負責人就答應俾我上去參觀。一出 lift ，一道巨型的、有點像古蹟中通住秘道入口的石門出現係我眼前，正當我猶豫緊應該點入去之際，一個「嬌的的」、雞仔聲的女仔出來迎接我。不久另一位女生入嚟自我介紹，說她們都是負責人。心諗，之前訊息間不是說場內的裝修都係佢地自己負責，咁負責人唔係應該係男人嗎？栩栩如生的龍同無數的水管，佈置點樣睇都似係出自男仔的手筆，但萬萬都估唔到 Space Lab 從設計到裝修都係由眼前「嬌的的」的 AYA 同 好多口水的 ARNO ，以及未有路面的朋友，3個女仔一手包辦。或者佢地知道我心中的疑問，ARNO 立即自嘲大家係「女漢子」，「除咗唔飲酒唔食煙，其實內心係一個男人」，更笑言「如果有 10個人企係度，唔會估到所有的設計同裝修係由 AYA 同另一個女仔所做的。」果然係好大的「反差萌」！原來由 3-4年前興 Party Room 開始，佢地見幾得意，而 AYA 同另一個女仔都係做演藝道具出身，整開舞台佈景，所以決定整一個屬於自己的舞台。
▲ 一出 lift ，一道巨型的、有點像古蹟中通住秘道入口的石門出現係我眼前，就古蹟中通住秘道的入口。
▲ 打開石門，仲有一道 Steampunk 風格的銅門，十分神秘。
▲ 門與門中間有一個骷髏頭，神秘帶點恐怖。
看著比起大台佈景還要逼真的佈置，原來這樣單單是製造費就用了過百萬。為何要用這麼高的成本去開 Party Room 呢？AYA 坦言「就係道具師的執著，會將每個位都精雕细琢，要做到最逼真為止。」至於點解明明係 3個女仔的 Dream Room ，點解要以科幻做主題，ARNO 覺得主打家的感覺，好溫馨的主題已經太多，「出嚟玩應該要好似去咗第二個世界咁，要科幻 D ，好似迪士尼，有代入第二個世界的感覺」，而 AYA 又鍾意睇科幻電影同鍾意龍，所以最終就從 50幾個主題中揀咗呢兩個主題。亦因為主題少見，除咗吸引到家長想為小朋友開 Harry Potter 生日會，更吸引了一班人來拍 MV、微電影等。
▲ 正當我係度研究邊條水管係真的時候，原來全部水管都係假的。
▲ 龍的表情非常逼真，好有電影感。
▲ 牆壁造到好似化石咁，事實上中間大開係用嚟投影的白牆。
製作咁大型的道具已經難，仲要由 3位女士一手包辦，當中又遇過 D 咩困難呢？AYA 笑言「裝修咗 3 個月，就食咗 3個月塵，因為當時天氣又熱又未裝冷氣，做到成身臭汗。」ARNO 補充錢同物料都唔係問題，最緊要係時間，因為 3位各有正職，要抽時間出嚟裝修已經係夜晚的事，不過「因為興趣，幾辛苦都會抽到時候做，就好似睇波咁，鍾意的話，唔瞓都要睇。」雖然花了這麼多的金錢同時間，幸好得到屋企人的支持，AYA 的爸爸幫咗佢好多，因為佢本身做裝修同電工，所以走線個 D 都係佢幫手，AYA 笑言「有咁責任感的師傅係邊度搵！」問到能否回本，佢地就異口同聲咁話「Game is life，最緊要開心，自己又可以承擔，屋企人又體諒的情況下，可以認真地玩住先。」
▲ 因為係自己裝修，所以佢地都好著重每一個細節，幾乎每一個櫃都融入係佈置入面，唔講真係未必知。
▲ 就連冷氣都藏得好埋呢！
▲ 將牆身推開，入面掛滿工作坊用的工具，收納得好整齊。
▲ 打開另一遁牆，原來係化妝桌，果然百變。
起初我入到去以為 Space Lab 只有漂亮的四面牆，原來 Party Room 應該有的唱K、卡 game、飲品等呢度都有，只係收得太埋發現唔到。而更特別的是佢地提供了幾十個 Steampunk 的道具俾大家玩面具舞會，十分特別。
▲ Steampunk 的道具非常有型，可以開面具舞會。
▲ 一眼未必睇到，不過呢度都有得唱 K ，同一般 Party room 無異。
Space Lab