除咗矽膠表面、防水又識震的另類洗面機，B.KETTNER 今次的發佈會同時展示了一支迷你導入機 － VisoRelax 溫熱離子眼部護理儀。等我依莉詩同大家分享下佢有咩用啦！
生活節奏緊張，少不免要長期對住電腦同手機，加上唔夠瞓，眼睛疲勞之餘，黑眼圈、眼袋浮現，所以眼部專用的導入筆亦愈出愈多，而幾乎全部的目的都係一個，就係加速精華吸收。而呢支溫熱離子眼部護理儀都唔例外，以正負離子技術同溫熱功能來促進眼部血液循環，加速精華吸收。當然正負離子係用的時候唔會感覺到，不過 38-42度的溫熱就會 feel 到少少暖，唔會話太熱，就算用係眼周圍較薄的肌膚都唔會燙到。另外，隨機附送了一支眼部淡斑亮白精華，成份有由植物提取的活性精華，添加霍霍巴油，維他命A，鈣離子分析同特殊配合物，嗅落無乜味，質地唔算太厚，配合眼部護理儀打圈用吸收得都幾快。
▲ 眼部護理儀以鈦金屬作半圓接觸頭，方便貼近眼肚、眼尾等皮膚之餘，易於清潔不藏污垢，用完用紙巾抹一抹就乾淨番。
▲ 附送的眼部淡斑亮白精華質地唔算太厚，配合眼部護理儀打圈用吸收得都幾快。
呢支眼部護理儀比起之前試過的 MyB 離子導入按摩美眼筆 大，幸好機身都只有 90g，未算太重，加上充電式設計，充一次電可以用 60次，咁去旅行都唔會話太過份。而眼部護理儀的流線型設計幾好揸手，除咗用於眼部按摩，用嚟按壓太陽穴等穴位都就手。另外， 開啟後分半鐘會有提示，好讓按摩另一隻眼，當 3分鐘後會自動熄機，非常清晰。
▲ 如果LED燈閃閃下代表預熱中，大約 10秒左右預熱就完成， 3分鐘後會自動熄機，非常清晰。
▲USB插頭充電，充一次電可以用 60次，非常方便。
都係果句，用眼部護理儀代替手指塗精華一定唔怕俾手指吸收晒啲精華浪費咗，但有無效果都係要用一段時間先知。而呢支眼部護理儀溫熱的感覺雖然唔錯，可以快速舒緩眼部疲勞，不過如果要揀一支適合自己的話，我會揀一支又輕又細可以放手袋，眼攰可以隨時用。
查詢：www.bkettner.com