拍片穩定神器!邊跑邊拍都唔會震

讚好此文:

五月 3, 2016 •數碼相機, 相機配件

相信唔少 wire 民平時都會用手機影相或者拍片,放假時候甚至會拎埋部單反出去,對於鐘意戶外活動嘅朋友,亦可能會用 GoPro 記錄每個時刻。除非擁有一雙「石膏手」,否則拍片嘅時候點都會有手震,同影相唔同,由於拍片喺連續畫面,所以如果片中有較大嘅震動,其實睇嘅人都會非常辛苦,針對越來越多人有拍片需要,各種輔助產品亦大行其道,當中以可以大大提升穩定性嘅穩定器最受用家歡迎。

pic0002

10 秒裝好自拍 Video 神器

Big Balance DM Dual 用上新一代三軸防震技術,主要喺針對各位鐘意用手機拍片或自拍,同以往同類型產品唔同,安裝方便同快好多,無論用 iPhone 6s/PLUS 嘅用家,裝咗部電話上去之後,只要加上唔同嘅配重,一開機就可以自動平衡到,唔會好似以前咁,要左右慢慢移動以取得最佳平衡。除咗可以夾電話之外,佢個夾同時可以夾得實 GoPro,真正達到一物多用,唔洗為咗唔同產品再買唔同配件,如果諗住夾 GoPro 嘅話,就要留意佢個位只係夾到最基本嘅外殼,即喺大家如果有用防水殼果啲就唔得。

pic0007

▲將手柄由直轉橫,令到自拍時更好手感,轉換角度都更靈活。

DM Dual 仲有一個好特別嘅設計,就喺佢既手把位置可以拆下,再安裝喺機身後方另一個擴充點,咁就可以由直立式變為自拍 Mode,拍出嚟既效果仲有啲航拍 Feel,好適合去 Party 或者一大班人活動嘅時候用。相信好多人平時都未必會用到平衡桿,往往臨出發之前先發現無電,DM Dual 啲電池只要叉 30 分鐘就用得,就已經可以玩到 3 個鐘。操控上佢嘅反應可以話相當快,就算快速移動都可以跟得上,加埋電話都唔會覺得太重,但如果喺女仔嘅話,始終長時間舉高手自拍點都會有點吃力。

pic0008

建議零售價:$2,780(五月初上市)

 

為 GoPro 度身訂造

如果各位 wire 民鐘意運動而又有 GoPro 嘅話,咁另一款 DM Go 會更適合,佢同 DM Dual 唔同嘅地方在於摩打設計,負摩打力度專為 GoPro 度身訂造,扭力更大反應更快更準確,可以完全跟到用家嘅移動角度同速度,而且唔會因為快速移動出現震動,而且仲有唔同配件可以將 DM Go 安裝喺頭盔或者單車之上。另外,DM Dual 主要都喺針對正手拍攝果時用,至於 DM Go 就更可以反手使用,當用嚟拍攝「低炒」角度或者貼近地面拍攝就更加方便。可能大家會擔心咁 GoPro 個遙控點算呢,廠商一早已經留定個位,等大家可以將個遙控都放埋喺手柄上面,而且單身操作絕對無問題,試過點扭點郁點轉都一樣追得到。

pic0001

pic0005

▲只喺針對 GoPro 所以更輕巧細小,用起上嚟就手又可以點郁都跟得到,同時預留位置放遙控。

建議零售價:$2,480(五月初上市)

 

360 度旋轉手柄極速拍攝

相比起手機或 GoPro 呢類較流動隨身嘅拍攝裝置,無反相機就可以提供高一級嘅拍攝質素同設定,而近期身邊唔少朋友都玩 A7。Big Balance Gibbon GN1 Plus 就係專門針對無反相機而設,由於無反相機大小同重量都較手機重。試過拎上手,發現 GN1 Plus 裝咗相機都依然相當輕巧,配標準鏡頭唔會有頭重尾輕或者鏡頭下墜嘅問題,當然要配長鏡就會有一定難度。GN1 Plus 另一個較特別之處就係兩軸設計,刪減左右移動功能,如果要左右轉動就要自己整個「華麗轉身」。不過好處就喺更穩定、更順暢,現場所見只要將主手柄作 45 度傾斜,就算跑步畫面都依然十分穩定,主手柄其實更可以 360 度旋轉,無論打直打橫定「低炒」都一樣無問題,配合埋副手柄,令到相機嘅重量可以平均作出分配,比起平時雙手拎機仲舒服,對於要拍攝較動感嘅影片就會十分適合。

pic0003

pic0006

▲主手柄可以作 360 度旋轉以配合唔同拍攝上嘅角度,睇示範就算快跑依然穩定。

建議零售價:$4,180(四月尾上市)

 

查詢:方正環球

 • 不想錯過新科技 ? 請 Follow unwire.hk FB 專頁http://facebook.com/unwirehk/
• 要入手生活科技潮物 即上 unwire store
https://store.unwire.hk/

讚好此文:


Comments are closed.

unwire TV



更多同類文章:

最新文章