有時早左起身，我就唔搭地鐵，搭下巴士慢慢熬返公司，因為一程車就可以直達公司附近，總站上又有位坐，都幾好。
今朝港女上左巴士，坐喺下層。搭左幾個站，有個哥哥上車，一嘟八達通，部機就高聲尖叫，「嗶～～～～～」，以示負錢。司機唔理佢繼續揸車，哥哥就係度扲荷包，睇下有冇散紙。好明顯佢就冇散紙啦，拎住張 10 蚊紙走過黎座位區，佢見到前排有幾個師奶，心諗實無死啦，師奶去開街市買餸，通常都有散紙嘅，於是走埋去問：「唔好意思呀，我八達通負錢唔記得增值呀，有冇 10 蚊散紙呀？」師奶 A 非常幫手，即刻打開個散紙包，睇下有冇咁多散紙，點知唔夠喎！
坐隔離個行的師奶 B 見狀即刻打開銀包，喺度數下數下，後面個排嘅師奶 C 又一齊咁做，同時我又望到坐我隔離行嘅叔叔又一齊摷銀包，咁我都又一齊摷下個袋，點知我發現今日冇帶散紙包。
呢個時候，師奶 B 已經數齊 10 蚊散紙俾左哥哥，其他人就即刻扮無野收埋自己個銀包，繼續搭車。事件就此告一段落。
我個刻即刻諗返起港女讀小學的時候，個時一個星期總會有一兩日出街要搭巴士小巴（返學係搭校巴），亦都會遇到上述情況，不過較少喺車廂中發生，通常未上車排隊個時就要「自備輔幣」，問定前後左右唱定散紙，又或者「幫人地入埋」。阿媽仲會話唱定啲毫子俾你搭車，或者留返啲散紙搭車添。
自從八達通出現左，就少左出現上述的情況，而家啲人直情唔鍾意毫子，最好唔好找俾我，收銀都唔收！金管局仲出左部「神沙收集車」，將神沙換返做紙幣或用黎增值八達通，幾方便咁。
隨住科技進步，呢啲細細碎碎的畫面逐漸只會喺回憶之中出現，而家個個都看中 P2P 金融市場，成日都講電子貨幣乜乜乜，我地嘅下一代到時可能連實體嘅錢都唔使見過掂過，只係見到一堆數字上上落落，可能係港女古老唔識得與時並進啦，唔知點解覺得有幾分唏噓…
【教學】Android 版八達通開通教學 設定比想像中容易 + 使用無難度 + 開通注意事項 【實試】八達通全國通卡深圳實試 使用體驗一樣 + 增值仍然方便 《頭文字D》限量八達通套裝【搶先看】遇熱變出經典漫畫場面 + 實物示範 + 頭D、咒術新精品