最近港女做緊一個有關「數碼鴻溝」（Digital Divide）的小小研究，係咁易了解過教育界、學生及家長係點樣睇電子學習、資訊科技教育、用電腦做功課等議題。唔知大家對於「數碼鴻溝」呢四個咁核突的字 有咩見解呢？我初初接觸的時候就覺得佢係「貧富懸殊」、「代溝」啲 friend，以大家運用資訊科技的能力，劃分出唔同的人。事實上，意思又真係差唔多喎！
根據維基百科，數碼鴻溝（又稱數碼隔膜或數碼差距），是以使用電腦及上網的機會，及對於電腦及上網的使用能力，來看社會上來自不同背景的人的差異。
由硬件上黎睇，香港人其實好幸福，因為我地基本上都可以負擔得到一人一機仲上到網，所以喺「使用電腦及上網的機會」上，每個人的差異不太。但港女最近同一個專門研究「數碼鴻溝及資訊科技教育」的教授傾過，佢同我講，科技並不止於硬件，我地要當識得用電腦識得上網，就好似幾十年前啲人識字一樣咁矜貴，識得善用及活用呢個溝通渠道，先至係贏家。
教授口中的「善用及活用」並不只係講緊「識得用」電腦或上網，因為佢認為科技要被看待成一個新媒體，即是一個新的溝通渠道及獲取知識的方法。
過往我地使用過的唔少媒體，由最傳統的報紙雜誌書藉，到電話收音機電視，及現在的電腦智能電話社交網絡，呢啲都係科技的一部分。每一個年代，「新」媒體的出現都會改變我地的習慣、溝通方法、以至世界觀，影響我地的生活。就好似最近，大家都「善用」 Facebook 直播功能：黎明直播道歉，補習名師直播詭辯，琴日下晝仲有勁多 Post 洗我版直播王維基考慮參選立法會記者會添！有求就有供，如果冇人睇，又邊會有人咁做～
教授喺一個鐘內再三強調，「我地必須要將科技看待成一個新媒體」，因為如果單純將科技當成是硬件，咁我地就只係會用到佢好皮毛的功能，不能 make the most out of it。現時由社交網絡主導的新媒體充滿主動性，我地可以隨時隨地表達所想，甚至集合群眾智慧，例如搵 Google 大神、維基大神及 Facebook 大神等，利用群眾的力量召集幫忙，不再是單向的發放或接收資訊。
科技發展的原意從來都係改善生活，更想拉近人與人之間的距離，然而，如果大家未能平等地善用其功能，即使一人一機在手，都會出現「數碼鴻溝」。
分享到 :
最新影片
