早幾日 unwire.hk 就曾經同各位 wire 民報導過 GoGoVan 為咗打擊自動搶單外掛問題，將會加入收費制度，每次成功接單都會扣除一定數量嘅 Go 分，如果想接「大旗」（長途單），就要先確保自己有足夠 Go 分，但呢啲 Go 分都要先用真金白銀購買，等同大家平時打機要課金，而 GoGoVan 司機究竟點睇今次收費事件？會真‧罷駛定真‧唔玩？今次 unwire.hk 就訪問咗其中一位 GoGoVan 司機 Van 哥（假名）。
相信唔少 wire 民都開始對 GoGoVan 呢間公司產生反感，不過由於網站要保持「中立」，所以政治嘅嘢小編就唔討論咁多。自上次有關 GoGoVan 加入全新收費模式向司機開刀之後，unwire.hk 就收到 Van 哥回應，指可以同各位 wire 民分享一下究竟 GoGoVan 司機點樣睇今次收費事件同埋外掛搶單嘅問題。
網上唔少傳聞都話 GoGoVan 今次收費事件主要係要打擊外掛搶單問題，Van 哥就表示自己個朋友都有用，而且確實係可以搶到更多單，不過每次搶到單都要俾返 10% 出嚟，如果再加埋 GoGoVan 要 $100 收返 $6 嚟計，每次接到 $100 生意，實際落袋可能只係得 $7~80，Van 哥表示「真係比出去打份工仲少錢！」但佢同時慨嘆好多較年長嘅前輩由於都唔係好識用，要佢哋同一班後生搶真係好困難，好多時係一個地區等足成日都未必有單。而且一邊開車一邊篤 App 其實好危險，但為咗接單好多 GoGoVan 司機都同好多的士司機一樣要擺幾部電話嚟接 Order。
Van 哥其實做客貨 Van 司機都已經有 7 年，直到 2 年前 GoGoVan 推出初期就已經加入，不過佢最唔滿意就係公司嘅策略：「初初就講到為司機著想，但最近就左 Cut 右 Cut，又減少夜晚附加費又 Cut 單乜乜乜，叫班GoGoVan 司機捱吓義氣頂住先，但最後咪令到司機收入大減」。最令 Van 哥不滿就係，佢哋好多時都會係 GoGoVan 個 Facebook 發表意見，不過好快就會被人 Delete Post，真係有佢講無你講。
小編都有問過 Van 哥其實而家都仲有好多其他 Call Van App 可以用，但 Van 哥無奈地表示：「每個司機其實都有頭家，人哋個餅（GoGoVan）已經佔左 7-8 成，為咗搵食咪又係要繼續用」。Van 哥仲比喻今次 GoGoVan 個收費制度好似出去買套票咁，「我未攪嘢就已經叫我俾定錢你，俾咗錢又唔一定用到你嘅 Service」，即係就算買咗 Go 分都唔代表可以正常咁排隊接 Order，比起傳統台做法更加唔透明又唔合理。
Van 哥最後都講到，今次搵我哋 unwire.hk 都只係想幫一班 GoGoVan 司機發聲，希望大家可以了解到 GoGoVan 背後嘅運作。雖然口裡說不，但 Van 哥都直言手指好誠實咁篤緊 App，始終要租車又要油錢仲要養家，唔接多幾個 Order 根本就維持唔到生計。
相關影片:
